proxims giugs

19-10-2019, 16:00 CB Trun/Rabius II - FC Sargans IIb
20-10-2019, 15:00 CB Trun/Rabius I - FC Buchs I
  • funcziunaris

    president Otto Beer +41 79 610 54 21 This email address is being protected from spambots. You need JavaScript enabled to view it. cassier
    Read More
  • 1. equipa

    giugadurs #1 Andri Nay #12 Mauro Alig #2 Orlando Monn
    Read More
  • 2. equipa

    giugadurs #1 Flavio Schuoler #15 Silvan Cajacob #2 Christof Derungs
    Read More
  • trenaders

    1. equipa Donat Albin (C) +41 78 602 57 77
    Read More
  • juniors

    juniors A - IG Surselva a Grp. (Coca-Cola-League) juniors B2 - IG
    Read More
  • seniors

    Bei den Senioren ist jeder willkommen der das fussballerische Seniorenalter
    Read More

la proxima gala dall’emprema

Suenter la clara victoria encunter Sevelen la jamna passada, spitgava cun l’equipa da Vaz Sut la proxima sfida pil CB Trun/Rabius. L’equipa da Vaz Sut sesanflava avon il giug – sco era il CB - alla testa dalla tabella; pia sil pupi in ferm adversari. La runda d’atun veva l’emprema gia giu sias miserias e contonschiu in pari ordeifer. Ils aspectaturs a Pustget spitgavan aschia sin in giug da gronda tensiun.

Punct las treis dat igl arbiter liber il giug ed il caucasa fa squetsch naven dall’emprema minuta. Ils giugadurs sdrimai ner/alv vegnan cun quei pressing offensiv gia suenter treis minutas tier ina schanza: Giani vegn tier ina buna caschun da sittar e munchenta mo lev la finamira. Suenter sis minutas eis ei lu tuttina gia schi lunsch: Livio dat naven da davos in bi pass ella gassa sil Salva che porta il bal amiez sill’altezia dalla da sedisch. Ils aspectaturs creian ch'ei vesien buc endretg - aber igl ei il defensur central Livio ch'ei currius atras in sprint tochen la zona da puniziun e marchescha cun saung freid igl 1:0 pil caucasa. Quei gol animescha la squadra da cuntinuar cun quei tempo rasant ed ei vegn giugau in ballapei fetg dinamic. Pils hosps da Vaz sut va quei tut memia spert ed aschia eis ei buca da smarvegliar che Dani vegn da marcar il 2:0 la 22avla minuta, quei suenter ina fetg bial'acziun dall'ala seniastra si da Giani e Salva. La fidonza en sesez crescha cun mintga acziun ed il Tiz fa la 35avla minuta vinavon cun quei ch'el ha calau la jamna passada: sittar gols. Suenter ina bial’acziun singula marchescha el cun in “lupf” il 3:0. Cun quei resultat van las duas equipas ella pausa. 

Ils aspectaturs che spitgavan in giug da gronda tensiun ein pia baul vegni trumpai. Ed era suenter il te da pausa dat il CB buc ord mauns il giug. Suenter pliras schanzas d’aulta qualitad machescha il capitani Salva la 67avla minuta cun in aschinumnau «schlenzer» il 4:0 suenter in bellezia pass el «lauf» da Daniel Lopez. Mo quater minutas pli tard ein lu era las davosas speronzas da Vaz sut da recaltgar puncts a Pustget sparidas: Igl Olli lai sill’ala dretga ora treis giugadurs e vegn aunc da metter il bal amiez avon il gol nua che Daniel Lopez ha buca miserias da marcar il 5:0. «Quei che in «ussaverteidiger» sa, sa era tschel» - aschia survegn il Daniel mo tschun minutas pli tard per la secunda gada il bal sil tablar ch'el sto mo pli stuschar sper il goli ora. Quella gada survescha il Sandro il giugadur portughes cun in perfetg pass ord la defensiun ed aschia stat ei gia 6:0. Oz para ei propi da gartegiar tut all’emprema. Era il Salva ha survegniu gust da marcar gols e fa la 81avla minuta suenter in pass da Clau aunc il 7:0 pil CB Trun/Rabius. La 86avla minuta marchescha lu era aunc Vaz sut in gol d’honur cun in «briefkasta»; quei ei denton mo cosmetica dil resultat.

L’emprema equipa gudogna pia il secund giug en seria cun sis! gols differenza. Quei savevan ins segir buca spitgar avon il giug, cunquei che Vaz sut ha el passau bia gadas fatg grev ei all’equipa dalla Cadi. Oz ha il CB propi mussau in ballapei fetg attractiv che ha la finfinala era purtau fretg. In pressing dall’entira equipa encunter il bal han ins darar viu en aschi ina intensitad a Pustget. Era han ils giugadurs cumbinau fetg bein tras las atgnas retschas ed era las schanzas ein per gronda part vegnidas nezegiadas – aschia fa ei plascher! 

Mo tuttina vala ei ussa da star cun omisdus peis giun plaun e da buca vegnir garmadis, numnadamein ord dus motivs: Per ina ha Vaz sut segiramein buca mussau in bien giug e per l’autra stat gia d’Anceinza, proxima gievgia, in giug d’immensa impurtonza sil program per l’emprema: Las 16:00 retscheiva numnadamein la secunda equipa da Schluein-Glion il CB Trun/Rabius. Omisduas equipas ein aspirants sigl emprem plaz dalla tabella ed omisduas equipas ein en ina buna fuorma. Suenter ils davos resultats sa il CB Trun/Rabius denton ir cun in fetg bien sentiment giu Schluein sil grond plaz a Crap Gries cun la finamira da prender cun treis puncts. En quei senn: HOPP CB TRUN/RABIUS!

 

Informaziuns: 7:1: 6’ 1:0Livio Janka, 22’ 2:0Daniel Monn, 35’ 3:0Patrizio Decurtins, 67’ 4:0Salvatore Staglianó, 71’ 5:0Daniel Lopez, 77’ 6:0Daniel Lopez, 81’ 7:0 Salvatore Staglianó, 86’ 7:1 Vaz sut

Formaziun: Sandro Tomaschett – Sandro Orlik, Damian Schmed, Livio Janka, Orlando Monn – Gian Andrea Beer, Beat Cadruvi (79’ Clau Berther),  Salvatore Staglianó (C), Clau Berther (46’ Sergio Regufe) – Patrizio Decurtins (38’ Daniel Lopez), Daniel Monn (69’ Carlo Gautschi) 

Reservas: Sergio Regufe, Daniel Lopez, Carlo Gautschi, Fabian Cajacob, Andri Nay

 

 

  • bènaltè!

    bènaltè! 2018 - 3. ediziun Miez uost ei la tiarza ediziun dil bènaltè! cumparida. Ils habitonts dallas vischnauncas Sumvitg e Trun
    Read More
       

CB Trun/Rabius  |  Caum postal 153  |  CH-7166 Trun  |  +41 78 789 74 36  |  secretari@cb-trun-rabius.ch