contact

CB Trun/Rabius

Caum postal 153

7166 Trun

+41 78 789 74 36

secretari@cb-trun-rabius.ch 

 

© 2018 by cb-trun-rabius.ch

and he scores - and scores - and scores ...

Pil secund giug dil campiunadi da primavera ei il CB serendius a Sevelen. Leu spitgava il cau-casa cun in plaz da ballapei sc'in teppi - ed insumma ei tut semidau... Enstagl d'ina baracca stat uss in bi baghetg cun terrassa amiez dus plazs da ballapei. Propi in project gartegiau dad A tochen Z... Mo finiu cun caussas superficialas - la finfinala ei l'equipa da Mario Solèr e Carlo Tuor vegnida a Sevelen culla finamira da bandunar il plaz - emporta buca con bials e verds - cun treis puncts. Oravontut vulan ins buca piarder il contact cullas equipas alla testa dalla tabella. 

Aschia pretendan ils trenaders dils giugadurs gia naven dall'entschatta concentraziun cumpleina ed oravontut da nezegiar las caschuns che sedattan - cuntrari al giug dil venderdis vargau encunter Lumnezia. Quels plaids para mintgin che stat sil plaz en mondura ner-alva dad haver priu a cor. Trun/Rabius fa numnadamein squetsch gia l'emprema minuta e lantschescha schon baul ils sperts giugadurs dallas alas cun bals ellas gassas. Beinspert meina ina tal'acziun sur l'ala seniastra allura al 0:1 pil hosp. In ferm pass digl Orlando naven dalla lingia dad out viers il gol meina in defensur digl adversari tuppamein egl agen gol. Il CB fa vinavon squetsch ed ei premuraus da far in proxim gol - per gie buca schar vegnir si dubis ni forsa vegnir malsegirs. Gia la 9avla minuta marca il Patrizio il 0:2 sin in bi pass dil Clau. Puspei meina il medem recept ad in gol. Para ch'ils trenaments han purtau fretg ... ;-)

Il 0:3 suonda pauc pli tard entras Daniel Lopez. Ina bial'acziun vegn era el da serrar giu senza grondas miserias e lai al goli negina schanza. Negina schanza ha il goli digl adversari era tier il proxim gol dil Patrizio dalla marca "same procedure as before". Puspei vegn il bal dall'ala el miez nua ch'in attaccader ei postaus per marcar il gol. Gia suenter 12 minutas stat ei 0:4 pil hosp dalla Surselva. Tgi havess quintau cun in tal effort e resultat suenter quei temps da giug?! Ils giugadurs da Sevelen paran dad esser surdumandai dad A tochen Z - sco era il giuven arbiter. Suenter ina cuorta pausa serevegn era el puspei da sia "nervusadad" e sa arbitrar vinavon. 

Silsuenter va lura buca pli aschi bia ensemen - era cunquei che Sevelen fa entginas midadas en siu giug. Las proximas minutas va ei aschia empau vi e neu cun bals liungs. Il CB ha piars empau sia levezia e fa grev a sesez la veta. Las schanzas sil gol da Sevelen ein empau pli raras - denton vegn Sevelen sez tier ina schanza suenter in culp liber ed ina pintga malprecauziun da vart dils giugadurs dil CB. La finfinala vegnan goli e defensiun denton da sclarir quell'acziun senza cuntergol. 

Suenter ina mes'ura marca il Patrizio il 0:5 entras in bellezia siet sc'in streh el cantun liung seniester, quei sin pass dil Clau. Oz para tut da funcziunar!! Las minutas suenter surpren il CB puspei la bitgetta dil giug e quei plai buc al cau-casa. Lez serevantschescha cun fouls pulit grops e malreclis sco pitgar ellas combas da davos en - astgan curiosamein denton tuttina restar sil plaz... Avon pausa marca la finala il "Tiz" siu quart gol pil 0:6 sin pass da Daniel Lopez. Cun quei resultat va ei ella cabina. 

La tensiun ei naturalmein buca pli aschi aulta suenter pausa. Tuttina ein ils giugadurs da Sevelen premurai da silmeins marcar in gol da honur encunter il CB. Aschia emprovan els da smaccar en la defensiun. Entras in pign malfatg reussescha ei buc al defensur da spedir naven il bal, aschia che quel setschenta gest avon ils peis agl attaccader da Sevelen, al qual ei gartegia da marcar igl 1:6 la 50avla minuta. 

El decuors dallas proximas minutas fan ils trenaders allura entginas midadas per dar la pusseivladad allas reservas da dar empau bal. Quellas portan niev anim el giug dil CB - oravontut il Sergio fa bia squetsch sill'ala dretga e vegn tier beinenqual bial'occasiun. Deplorablamein ha igl arbiter tscheu e leu enzatgei encunter da schar mitschar in attaccader en ner ed alv persuls encunter gol - malgrad che quel ei oriundamein buca staus en ina posiziun scumandada numnada "offiside". Trun/Rabius lai perencunter buca stermentar e dat vinavon siu giug a moda ruasseivla, denton tuttina cun perschuasiun encunter anavon. Cun in'acziun fetg dira vegn allura il Remo mess per tiara d'in defensur en mellen. Tuppamein sefa el mal en quell'acziun e sto cuort suenter vegnir midaus ora puspei. Bien migliurament en quei cass da cheu anora!! 

Pil Remo tuorna il "goalgetter Tiz" sil plaz e marca silsuenter aunc igl 1:7 ed igl 1:8. El fa quei sco sch'ei dess nuot pli sempel - "sco da beiber aua"... In ulteriur gol lai igl arbiter buca valer - malgrad ch'il Patrizio ha entschiet a cuorer ell'atgna mesadad cura ch'el ei vegnius lantschaus naven dall'atgna da sedisch. Tut en tut ein sis (!!!) gols en in giug denton avunda per oz! Ins sto gie buca sittar ora tut la puorla gia l'entschatta dalla sesiun. Cun quella prestaziun eis el claramein il "matchwinner" per oz! 

Cuort avon la fin vegn Sevelen aunc da marcar il 2:8 cun in bi siet sper la petga en. Quei mida perencunter nuot pli vid il resultat meritau pil CB, il qual ha mussau ina per part oreifra prestaziun e che ha perschuadiu dad A tochen Z. Aschia fa ei plascher da dar ballapei - sco era da mirar ballapei. Lein sperar ch'ils giugadurs mantegnien quella fuorma pils proxims giugs. Tgisà nua che quei meina allura la finfinala ella tabella?! 

 

Informaziuns: 0:1 (5' autogol), 0:2 (9' Patrizio), 0:3 (10' Daniel Lopez), 0:4 (12' Patrizio), 0:5 (30' Patrizio), 0:6 (44' Patrizio), 1:6 (50' Sevelen), 7:1 (75' Patrizio), 1:8 (78' Patrizio), 2:8 (85' Sevelen)

Formaziun: Sandro Tomaschett – Fabian Cajacob (55' Gian-Andrea Beer), Damian Schmed, Livio Janka, Sandro Orlik – Clau Berther (62' Sergio Regufe), Carlo Gautschi (45' Beat Cadruvi), Salvatore Staglianó (C), Orlando Monn – Patrizio Decurtins (62’ Remo Alig), Daniel Lopez (45’ Daniel Monn) 

Reservas: Sergio Regufe, Remo Alig, Daniel Monn, Sandro Orlik, Beat Cadruvi, Gian-Andrea Beer

 

bènaltè! - il magazin dil cb

   
1. ediziun - 2016   2. ediziun - 2017   3. ediziun - 2018