contact

CB Trun/Rabius

Caum postal 153

7166 Trun

+41 78 789 74 36

secretari@cb-trun-rabius.ch 

 

© 2018 by cb-trun-rabius.ch

in pari senza gols el “spitzenkampf”

Suenter duas ga haver stuschau in giug da campiunadi muort plazs en malas cundiziuns ha ei il venderdis vargau era giu num per l’emprema equipa dil CB Trun/Rabius d’entscheiver la secunda mesadad dil campiunadi. Cun il CB Lumnezia spitgava lu gest quella equipa che ha sco suletta saviu pitgar l’emprema ella sesiun d’atun. Quei debachel a Vella era segiramein aunc el tgau ad enqual giugadur cu igl arbiter ha dau liber il giug a Rabius da mesa las nov.

Culla finamira da recaltgar treis puncts ein omisdus aspirants per in plaz da podest ella tabella i ella partida ed igl ei reussiu meglier al caucasa da far squetsch sil gol digl adversari. Gia suenter ina minuta vegn il Beat tier ina excellenta schanza, gartegia denton buca sco giavischau il bal. Cuort suenter vegn il CB Trun/Rabius puspei entras il Beat tier ina schanza da gol. Silsuenter suondan denton vegn minutas plitost lungurusas pils aspectaturs ch'ein vegni en roschas a mirar il derbi sursilvan. Neginas schanzas da gol ein duront quei temps remarcablas ed il giug viva da cumbats, bals aults, sbagls individuals e kicks liungs dils golis. Quei ha segiramein era da far in ton cul plaz ch'ei aunc buc diltuttafatg ulivs e fa aschia grev da cumbinar e schar ir il bal ellas atgnas retschas – a Lumnezia sco era al CB Trun/Rabius. Suenter 25 minutas vegn lu il CB Lumnezia tier in culp liber ord ina buna distanza da biebein vegn meters. Il culp liber va denton lunsch sur il gol da Sandro ora ed ils adherents dil caucasa san trer flad profundamein. Cuort suenter vegn era il CB tier in culp liber, nua che Livio porta il bal precis en direcziun petga liunga. Leu ei il Fabian “Buzzi” sedeliberaus da siu cuntergiugadur e vegn libramein tier ina tgaua – il bal va denton lev sper il gol ed era il Giani vegn buca pli da siglir el bal e metter el ellas maschas. Aschia van ils giugadurs cun in 0:0 ella pausa.

Tgi che ha tertgau ch'il giug semidi in tec suenter pausa vegn trumpaus. Ins senta ch'omisduas equipas vulan far igl emprem gol, denton negin’equipa ei promta dad arver davostier. L'emprema schanza suenter pausa s’auda puspei al CB Trun/Rabius. Suenter ina bial'acziun sur l’ala dretga dat Clau viaden il bal e suenter in disuorden vegn il bal miez aults tier Dani che pren il bal ord il stan volley – munchenta denton per pauc la finamira. Il CB vegn en quella fasa denton buca da smaccar en Lumnezia ed ei suonda las megliera quart d’ura dils hosps. Ella 60avla vegnan els puspei tier in cul liber che munchenta il gol da Sandro mo per pauc. E mo 5 minutas pli tard sa il CB engraziar ad Orlando ch'ei stat buca 0:1 per Lumnezia. Cun ina «grätscha» enorm impurtonta e senza temas da sperdita spedescha il giugadur cun la numera 2 il bal ord la zona da puniziun avon ch'igl attacader da Lumnezia vegn vid il bal. Encunter la fin dil giug han ins il sentiment ch'omisduas equipas san viver cun il pari e tgi che ha spitgau in «Offensivfeuerwerk» ellas davosas minutas ha spitgau adumbatten.

En tut priu ei quei stau ina prestaziun cuntenteivla dall’emprema encunter il leader da Lumnezia. Cunzun la defensiva inclusiv goli han perschuadiu ed igl ei buca vegniu fatg sempel alla ferma offensiva dil CB Lumnezia. Medemamein vala ei da ludar igl engaschi dall’entira equipa ch'ei per gronda part dil giug staus fetg buns. Tier quella caschun vala ei aunc d’engraziar a tut quels/quellas ch'ein segidai da far kiosk e grill e che han aschia procurau per in emperneivel venderdis sera per ils numerus aspectaturs da quei «Spitzenkampf». Per l’equipa da Mario e Carlo vala ei uss da focussar sil proxim giug che ha gia liug l’jamna proxima ordeifer a Sevelen. Leu ston ina victoria e treis puncts esser la finamira dil CB Trun/Rabius.

 

Informaziuns: 0:0

Formaziun: Sandro Tomaschett – Fabian Cajacob, Damian Schmed, Livio Janka, Orlando Monn – Clau Berther, Beat Cadruvi, Salvatore Staglianó (C), Beat Cadruvi, Gian Andrea Beer (46’ Sergio Regufe) – Remo Alig (46’ Patrizio Decurtins), Daniel Monn (77’ Daniel Lopez) 

Reservas: Sergio Regufe, Patrizio Decurtins, Daniel Lopez, Sandro Orlik, Philippe Vincenz, Carlo Gautschi, Samuel Sossai

 

bènaltè! - il magazin dil cb

   
1. ediziun - 2016   2. ediziun - 2017   3. ediziun - 2018