contact

CB Trun/Rabius

Caum postal 153

7166 Trun

+41 78 789 74 36

secretari@cb-trun-rabius.ch 

 

© 2018 by cb-trun-rabius.ch

finiziun mediocra dad ina cuntenteivla sesiun d’atun

Pil davos giug dalla sesiun d’atun ha ei num per l’equipa dalla Cadi da serender giu Domat e giugar encunter in’equipa ch'era sil pupi segiramein schazegiada en pli fleivla ch'il CB. Suenter las fermas prestaziuns els davos giugs sperava il CB da cuntinuar cun las victorias en seria. Da tipica aura da november cun temperaturas arcticas e vents freids ha igl arbiter dau liber il giug ad uras.

Tgi che ha tertgau ch'il CB prendi il giug naven dall’entschatta enta pugn ei vegnius trumpaus. L’emprema vegn insumma buc el giug e las cumbinaziuns dallas jamnas vargadas paran dad esser emblidadas. La 12avla minuta vegn lu il caucasa da Domat lu schizun aunc dad ir en avantatg cun 1:0. Ei va pli che mes’ura tochen ch'ils aspectaturs astgan veser l’emprema schanza dil CB Trun/Rabius. In siet ord la distanza dil Livio munchenta denton la finamira. La proxima acziun remarcabla porta lu igl 1:1: Suenter ina flanchetta dil Piet pren il Tiz ora cun siu pei seniester e metta il bal en las maschas dil gol. Cun quei resultat van las equipas ellas cabinas.

Suenter pausa vegn il CB cun slontsch ora sil plaz e creescha las empremas minutas entginas acziuns prigulusas. Aschia vegn igl Orlando suenter ina flanca dil Salva bunamein da marcar il secund gol, gartegia denton buca sco giavischau il bal. E mo ina minuta pli tard vegn il Clau tier ina bun'acziun, mo era el munchenta la caschun. Suenter quellas acziuns schabegia denton in liung temps nuot remarcabel. L’equipa da Domat entscheiva a turschar cement e barricadescha la zona da puniziun cun dus tiarzs dall’equipa. Aschia eis ei fetg grev pil CB da vegnir atras e crear acziuns prigulusas. Il CB va pli e pli offensiv per recaltgar ils treis puncts, sto denton era dar adatg ch'ils attacaders da Domat vegnien buca da crear conters. La davosa minuta ha il Salva lu aunc ina buna schanza da gol suenter in pass el dies dalla defensiun, mo ei resta tier il pari.

En tut priu ei quei stau ina dallas fleivlas prestaziuns dil CB en quella sesiun d’atun. Igl ei donn che l’equipa ei buca vegnida da recaltgar in'ulteriura victoria. Medemamein san ins denton era veser che l’equipa dalla Cadi ha dapi otg giugs buca pli spiars e siara il campiunadi sil tierz plaz avon la pausa d’unviern – quei cun treis puncts differenza sil leader dalla Val Lumnezia.

Culla sesiun d’atun astg’ins segiramein esser fetg cuntents. L’equipa ha spiars mo in giug, gudignau tschun e fatg treis paris. Pli cuntenteivel che la tabella ei denton il svilup dil ballapei sez. Ins astga esser spanegiaus, co l’equipa cuntinuescha il campiunadi la primavera nua che l’equipa vegn puspei a saver quintar cul Gian-Andrea ch'ei puspei disponibels. Buca pli dalla partida vegn il Piet ad esser. El vegn – sco gia menziunau el davos rapport – a turnar ella Hollandia. Danke Piet für deine frohe Art und deine technischen Meisterleistungen, die du dem fussballverrückten Trun gebracht hast – wir werden dich vermissen und weiterhin viel Spass beim „kleren wassen“.

 

Informaziuns: 12’ 1:0 Domat, 45’ 1:1 Patrizio Decurtins

Formaziun: Sandro Tomaschett – Fabian Cajacob, Damian Schmed, Livio Janka, Sandro Orlik – Dani Monn (46’ Clau Berther), Salvatore Staglianó, Beat Cadruvi (82’ Philippe Vincenz), Orlando Monn, - Patrizio Decurtins (75’ Sergio Regufe), Piet Raap

Reservas: Clau Berther, Sergio Regufe, Philippe Vincenz, Carlo Gautschi, Bruno Regufe 

 

 

Gliesta da gols sesiun d’atun 2017:

Patrizio Decurtins:     8

Piet Raap:                  7

Daniel Caldeira:         6

Clau Berther:              3

Daniel Monn:             3

Sandro Orlik:              1         

Orlando Monn:           1

Damian Schmed:       1

Autogols:                    1

bènaltè! - il magazin dil cb

   
1. ediziun - 2016   2. ediziun - 2017   3. ediziun - 2018