contact

CB Trun/Rabius

Caum postal 153

7166 Trun

+41 78 789 74 36

secretari@cb-trun-rabius.ch 

 

© 2018 by cb-trun-rabius.ch

clara victoria el davos giug a casa

Cun bia fidonza en sesez ha il CB retschiert la cazzola cotschna, igl FC Taminatal, la dumengia tier il davos giug 2017 a Pustget. Sco “La Quotidiana” ha menziunau era ina victoria in stuer pil caucasa; era per che la distanza da puncts sin Lumnezia vegni reducida. Ellas cartas ha segiramein era giugau che Vaz-sut, in concurrent direct pils emprems plazs dalla tabella, ha spiars siu giug encunter Bogn Ragaz ed aschia savevan ils giugadurs en cass d’ina victoria selegrar dad esser ils emprems catschadurs dil leader Lumnezia.

Ed il CB Trun/Rabius lai naven dall’emprema minuta buca dubis tgi ch’ei il schef sil plaz. La novavla minuta vegn il Clau da sittar sil gol bandunaus dil goli; mo in dils treis giugadurs sin lingia da Taminatal vegn da sclarir il siet. La 14avla e 15avla minuta vegn il caucasa era da metter entuorn igl engaschi sil plaz en gols. Suenter in bi pass ella gassa dil Salva tauscha Piet il bal vi sil Daniel che marchescha igl 1:0 per l’emprema. Mo ina minuta pli tard stat ei gia 2:0, quei suenter in bellezia solo dil Tiz. Ed il CB tegn ad ault la “pace”: Aschia eis ei il Beat che vegn tier in siet ch’il goli pren denton ord il cantun. La proxima gronda schanza porta lu puspei in gol. Il 3:0 marchescha Piet suenter in precis pass dil Clau. Ed il Clau ei era tier la proxima acziun el center: Ils adversaris da Taminatal vegnan tier l’emprema acziun prigulusa suenter in corner, mo tgei cletg era il Clau tier la petga liunga e setta naven il bal. Cuort avon pausa marchescha il Tiz lu aunc siu second gol persunal ed aschia va l’equipa cun il resultat cumadeivel da 4:0 ella cabina.

Suenter pausa va ei vinavon sco tochen dacheu: La 50avla marchescha il Clau siu gol persunal suenter ina bial’acziun singula. E mo ina minuta pli tard fuss ei bunamein reussiu al Damian da marcar il sisavel gol suenter ina tgaua. Quei 6:0 vegn otg minutas pli tard, denton eis ei quella gada negin giugadur dil CB che fa il gol, mobein in autogol dils hosps. La 70avla minuta muossa il Daniel sias qualitads vid il bal e meina ora la mesa defensiun da Taminatal. Cun in pass precis survescha el igl Olli che vess ord tschun meters mo pli da tuschar il bal el gol – mo el gartegia buc endretg il bal e munchenta aschia il proxim gol. Cunquei ch’il giug ei denton aschi unilaterals prendan ils giugadurs ed ils aspectaturs quella scena cun humor. Che Taminatal vegn la 72avla e 90avla aunc da marcar dus gols d’honur schai plitost vid la munconza dall’emprema, mo il resultat dalla partida ei mai periclitaus. Aunc da menziunar eis ei ch’il Piet ha la 88avla marcau il 7:1, quei ch’ei stau siu davos gol a Pustget. Il Piet banduna deplorablamein nus e va anavos en sia tiara paterna, ella Hollandia. Aschia vegn el cuort avon la fin midaus ora ed ils aspectaturs engrazian ad el per siu prestau cun ina “Standing Ovation” e grond applaus.

Il CB ha puspei mussau ina prestaziun suverana ed ha incantau ils aspectaturs a Pustget cun ballapei offensiv e bialas cumbinaziuns. La proxima fin d’jamna serenda il CB a Domat per giugar il davos giug dalla sesiun d’atun. Tenor la tabella e la fuorma dall’emprema sto ina victoria esser la finamira da quei giug. E cun ina victoria vegness il CB segiramein a saver ir ella pausa d’unviern sin in plaz da podest - quei che fuss segiramein ina buna caussa.

 

Informaziuns: 14’ 1:0 Daniel Caldeira, 15’ 2:0 Patrizio Decurtins, 27’ 3:0 Piet Raap, 43’ 4:0 Patrizio Decurtins, 50’ 5:0 Clau Berther, 59’ 6:0 autogol Taminatal, 72’ 6:1 FC Taminatal, 88’ 7:1 Piet Raap, 90’ 7:2 FC Taminatal

Formaziun: Sandro Tomaschett – Fabian Cajacob, Damian Schmed, Livio Janka, Sandro Orlik – Clau Berther (63’ Sergio Regufe), Salvatore Staglianó, Beat Cadruvi (67’ Orlando Monn), Piet Raap (89’ Patrizio Decurtins), - Patrizio Decurtins (63’ Daniel Monn), Daniel Caldeira

Reservas: Orlando Monn, Daniel Monn, Sergio Regufe

 

bènaltè! - il magazin dil cb

   
1. ediziun - 2016   2. ediziun - 2017   3. ediziun - 2018