contact

CB Trun/Rabius

Caum postal 153

7166 Trun

+41 78 789 74 36

secretari@cb-trun-rabius.ch 

 

© 2018 by cb-trun-rabius.ch

debachel a vella

Suenter bunas prestaziuns el Cup svizzer encunter l'equipa da Diepoldsau ed el giug amicabel encunter l'emprema da Schluein ein ils giugadurs semess sin via cun in bien sentiment en Val Lumnezia. Quei, schegie ch'ils davos dus giugs a Bual eran i a piarder e tuts savevan che Lumnezia ha ina ferm'equipa. Da temperaturas meins emperneivlas, gie bunamein arcticas per quei temps digl onn, dat igl arbiter liber il giug punct las 17:00.

Il giug entscheiva fetg uliv ed ins senta tier domisduas equipas il respect digl adversari. Aschia ein las empremas diesch minutas dominadas da cumbats a miez il plaz. L'emprema scena da gol s'auda lu als hosps dil CB Trun/Rabius. Suenter in bi pass ella gassa dil Clau vegn il Patrizio vid il bal e tila encunter gol. El emprova da metter il bal el cantun liung cun in “ussarist” da siu ferm pei dretg, gartegia denton pli fetg il bal cul péz. Aschia va il bal lev sper il gol ora; ed era igl Orlando po buca pli tier quei bal – lai denton sentir la petga la direzia da sia stgeina. Suenter surpren lu Lumnezia la bitgetta e va cull'emprema acziun da gol en avantatg. In culp liber vegn bellezia sil tgau ad in giugadur lumnezian che metta il bal sut la latta – 1:0 pil caucasa. Il CB Lumnezia fa uss squetsch e va ella 22avla minuta entras il spert attaccader 2:0 en avantatg. Ils hosps vegnan menai avon ed aschia ei il trenader Mario bunamein zunghegiaus da midar enzatgei. El porta il Beat ella 30avla per gudignar il surpli amiez. Tochen pausa gartegia ei silmeins al CB Trun/Rabius da quietar il giug; acziuns prigulusas dalla vart dils hosps ein denton era buca da notar.

Tgi che ha tertgau ch'ils giugaurs dil CB Trun/Rabius vegnien oda pausa sco midai ora vegn trumpaus bein spert. Certs fans ein aunc vida empustar lur gervosas che Lumnezia marchescha gia il 3:0. Quei schabegia suenter in corner, nua ch'il giugadur lumnezian seglia pli ault ch'ils giugadurs da Trun che fussen atgnamein biebein 20 centimers pli gronds – quei gol astga ei mai e pli mai dar. E mo duas minutas pli tard stat ei gia 4:0. Ella 52avla minuta cumbinescha il CB Lumnezia puspei sco ei para e plai tras las retschas dils hosps; in giugadur vegn persuls avon Sandro che sa lu era far nuot pli. Silmeins emprovan ils giugadurs da Trun aunc d'anflar ina via anavos el giug, mo ei para da gartegiar semplamein nuot als hosps. Suenter in culp liber dil Daniel ella 75avla vegn il goli da Lumnezia mo da rebatter il bal. Il Damian reagescha il spert e vegn vid il bal, mo el metta lez ord treis meters sur il gol – tgei caussas. Enstagl da silmeins aunc far in gol, aulza Lumnezia sin 5:0 entras in'acziun dils dus ferms giugadurs da quei giug. Suenter in bellezia lupf dil Mauro sur la defensiun centrala dil CB Trun/Rabius cuora il Yanick speraso e marchescha senza problems il tschunavel gol.

Pil CB Trun/Rabius vala ei da beinspert emblidar quella prestaziun. Igl ei propi gartegiau nuot als hosps e tuts eran intec surdumandai vid tgei ch'igl ei propi schischiu. Lumnezia ha segiramein era dau in ferm giug e dominau cunzun amiez sur grondas parts dil giug, vitier han els aunc giu il saung freid avon il gol. Lein sperar che l'equipa vegni el proxim derbi che suonda gia l'autra fin d'jamna encunter la secunda da Schluein d'anflar anavos tier siu giug.      

Informaziuns: 16’ 1:0 Gion Ursin Alig, 22’ 2:0 Yanick Demont, 50’ 3:0 Mauro Demont, 52’ 4:0 Dino Blumenthal, 83’ 5:0 Yanick Demont

Formaziun: Sandro Tomaschett – Fabian Cajacob, Damian Schmed, Carlo Gautschi, Silvan Cajacob (45’ Salvatore Staglianó) – Livio Janka – Orlando Monn, Sandro Orlik (30’ Beat Cadruvi), Piet Raap, Clau Berther – Patrizio Decurtins (45’ Daniel Monn)

Reservas: Beat Cadruvi, Salvatore Staglianó, Daniel Monn, Samuel Sossai, Philippe Vincenz

 

bènaltè! - il magazin dil cb

   
1. ediziun - 2016   2. ediziun - 2017   3. ediziun - 2018