contact

CB Trun/Rabius

Caum postal 153

7166 Trun

+41 78 789 74 36

secretari@cb-trun-rabius.ch 

 

© 2018 by cb-trun-rabius.ch

ina victoria che porta levgiament

La davosa victoria dalla sesiun da primavera haveva l'emprema equipa saviu festivar encunter Taminatal - e quei avon varga in meins, ils 23 d'avrel. Ils giugs consecutivs era ei buca pli reussiu als giugadurs da dar ballapei sco quei ch'els san, tochen la dumengia vargada encunter Walenstadt. Leu ha sulettamein il cletg muncau. Aschia eis ei stau neras uras da puspei turnar alla victoria encunter Landquart, levan ins buca curdar pli a bass ella tabella ed aschia lavagar ina sesiun ch'ei - oravontut igl atun - stada marcada da per part fetg bunas prestaziuns. 

Da fetg aultas temperaturas e sin in plaz plitost dir dat igl arbiter liber il giug a Landquart. Il CB Trun/Rabius surpren beinspert il commando dil giug e vegn gia baul tier bunas occasiuns da gol. Aschia vegnan oravontut las acziuns sur las alas cun nos dus spertezia giugadurs Clau ed Orlando malsegiras. Ina tal'acziun meina allura ella 9avla minuta era al 0:1. In pass dil Clau anfla la via avon il gol, nua ch'igl Orlando pren en schuber il bal e setta quel ellas maschas. 

Las proximas minutas suondan ulteriuras schanzas dalla marca "hochkarätig", ellas qualas ei gartegia buc a nos attaccaders da stuschar il bal sper il goli vi. Piet, Patrizio e Clau vegnan lantschai pliras ga fetg bein ellas gassas e san cuorer quasi persuls encunter il gol da Landquart - denton reussescha ei ad in ni l'auter dad alzar il resultat. Schizun il gol vit vegn buca tuccaus suenter in corner... Quei cuosta bia gnarva - oravontut sper lingia. Plinavon caschunan cuort avon pausa duas scenas ell'atgna da sedisch per in pèr cavels grischs tiels trenaders. Landquart vegn schiglioc buca malsegirs avon gol avon pausa. Pil pli vegn operau cun bals liungs che vegnan purtai dil vent favoreivel. Tut quels vegn la defensiun denton da sclarir senza miserias. 

Cul resultat da 0:1 terminescha igl arbiter l'emprema mesadad. Gia cheu havess Trun/Rabius saviu menar cun silmeins 0:6... Capeivlamein ein ils trenaders buca cuntents culla prestaziun e pretendan ella secunda mesadad in spert 0:2 e silsuenter ulteirurs gols - ed oravontut dapli anim e plascher da dar bal. Cun quels plaids tarmettan Mario Solèr e Carlo Tuor lur giugadurs anora sil plaz. 

Il te da pausa para dad haver fatg bein al CB. Sco sch'ils giugadurs havessen buiu "Zielwasser" gartegia ei suenter pausa da sittar gols. Puspei surpren Trun/Rabius la bitgetta dil giug e vegn sur las alas ora. Ella 51avla minuta smacca il Piet in bi pass dil Clau sur la lingia en; finalmein il 0:2 meritau. Duas minutas pli tard suonda in "copy-paste" da quell'acziun: Puspei vegn il Clau cun tempo dall'ala dretga giuadora, setta il bal enamiez e quella ga eis ei igl Orlando che procura pil gol. Sur la latta, la petga, la latta, ... anfla il bal la finfinala la via ellas maschas. 

Ussa para l'emprema dad haver anflau il regl da far gols. Schizun ils defensurs ughegian tscheu e leu dad ir anavon - e settan schizun gols. Iso Tambornino fa ella 63avla minuta il 0:4; quei entras ina flanca dall'ala dretga che anfla la via directa sur il goli ora ed en gol. Trun/Rabius dominescha silsuenter il giug senza far pli gronds sforzs. Landquart sesprova da far dapli pressing, vegn denton buca tier schanzas da gol. In culp liber settan els lunsch sur il gol ora ed ils corners vegn il CB da sclarir bein. 

À propos ils defensurs fan gols: La 80avla minuta ha il Fabian vonzeivi bia plaz sill'ala seniastra. El pren la caschun e cuora encunter il gol, lai ora il goli cun ina fenta e setta il bal a moda segira ella reit. Il 0:5 munta allura era il resultat final. 

Suenter varga in meins reussescha ei finalmein al CB Trun/Rabius da bandunar il plaz cun treis puncts. Uss vala ei da prender cun il positiv ord quei giug e da dar tut la proxima fin d'jamna encunter Mels. Leu ha il CB numnadameina aunc in quen aviert. 

 

Informaziuns: 9’ 0:1 Orlando Monn, 51’ 0:2 Piet Raap, 53’ 0:3 Orlando Monn, 63’ 0:4 Iso Tambornino, 80’ 0:5 Fabian Cajacob

Formaziun: Sandro Tomaschett – Iso Tambornino, Damian Schmed, Carlo Gautschi, Fabian Cajacob – Clau Berther, Salvatore Staglianó, Beat Cadruvi, Orlando Monn – Piet Raap, Patrizio Decurtins

Reservas: Philippe Vincenz, Sandro Orlik, Denis Monn

bènaltè! - il magazin dil cb

   
1. ediziun - 2016   2. ediziun - 2017   3. ediziun - 2018