proxims giugs digl atun 2022

3. ligia:  08-10-2022, 16:00 a Ruggell FC Ruggell 1 - CB Trun/Rabius 1 Grp.
  4. ligia: 09-10-2022, 15:00 a Mutteins US Danis-Tavanasa 2 Grp. FC Celerina 1 Grp.
5. ligia: 08-10-2022, 17:00 a Vella CB Lumnezia 2 - CB Trun/Rabius 3a Grp.

spitachel a pustget

Finalmein! El quart giug dalla sesiun gartegia ei al CB Trun/Rabius d’ir per ils emprems 3 puncts. Mo entochen che quels ein stai sut tetg eis ei stau da cumbatter – e quei cumbat ha procurau la fin finala per in spitachel. Lein denton far pass per pass en quei rapport.

La dumengia ein las duas equipas ch’ein aunc senza puncts ella gruppa 1 dalla 3. ligia semiseradas a Pustget. Pia, gia baul ella sesiun ina partida che sa esser in muossavia per la cuntinuaziun dalla sesiun. Las empremas 20 minutas ein relativ ulivas, silsuenter surpren l’equipa da casa denton tec a tec il commando dil giug e vegn entras Robin Monn tier duas bunas occasiuns. Mo ô dil nuot tuttenina il 0:1 per Tusaun/Cazas. Ina duscha freida pil CBTR. Mo ei vegn aunc mender, paucas minutas avon pausa il 0:2 per Tusaun! Ils numerus aspectaturs a Pustget ein consterni, sa quei uss propi esser?! La cabina da Trun/Rabius trembla da pausa sco quei ch’ella ha pauc fatg ils davos onns ed ils trenders reageschan cun gest 3 midadas. E pilver, il CBTR vegn uss tut auter ô da cabina e gia suenter 1 minuta vegn Daniel Pfister mess a tiara ella da sedisch e procura per in penalti. Patrizio Decurtins nezegia la caschun e setta igl emprem gol per l’equipa da casa. Trun/Rabius smacca vinavon e vegn 4 minutas pli tard tier il proxim penalti. Quella ga pren Gianin Derungs il bal e marca il 2:2. Mo ei vegn aunc meglier, Ramon Orlik aulza suenter ina corna il resultat sin 3:2 per Trun/Rabius. La partida ei pia vulvida enteifer gnanc 15 minutas! Ils fans a Pustget ein en extasa. Suenter quei gol secalma il giug puspei empau. Tusaun/Cazas emprova da reagir e vegn ellas davosas 10 minutas aunc tier duas bunas schanzas suenter duas situaziuns da standard. Mo il bal anfla buc la via ella reit, aschia ch’ils 3 puncts restan a Pustget. Ina impuronta victoria pil CBTR. Per Trun/Rabius cuntinueschi mesjamna cul 1/4-final el Cup Grischun ad Untervaz e sonda cul 1/16-final dil Cup Svizzer ad Urnäsch.

 

informaziuns: 3. ligia gruppa 1; Trun/Rabius – Tusaun/Cazas 3:2 (0:2); Pustget, Trun – 280 aspectaturAs

gols: 31. Tusaun/Cazas 0:1, 40. Tusaun/Cazas 0:2, 47. Patrizio Decurtins (penalti) 1:2, 51. Gianin Derungs (penalti) 2:2, 58. Ramon Orlik 3:2

Trun/Rabius: Damian Schmed; Mirco Pfister, Ramon Orlik, Lucas Maissen, Denis Monn; Robin Monn (87. Orlando Monn), Beat Cadruvi (46. Sandro Orlik), Mathias Flepp (79. Silvan Muoth), Orlando Monn (46. Daniel Pfister); Patrizio Decurtins (61. Remo Alig), Salvatore Stagliano (46. Gianin Derungs)

Tusaun/Cazas: Niclo Devonas; Christof Spörri, Aaron Patt, Leandro Rüedi, Matti Battaglia; Diego Raho, Thomas Kienast, Nico Bundi, Alberto dos Santos Maia; Luca Michael, Gianni Schweigl

remarcas: Trun/Rabius senza Fabio Caduff, Mauricio Cathomas, Livio Janka, Pascal Schmed

       

CB Trun/Rabius  |  Caum postal 153  |  CH-7166 Trun  |  +41 78 789 74 36  |  secretari@cb-trun-rabius.ch