pausa d'unviern

La sesiun da ballapei digl onn 2021 ei terminada. Nus engraziein a tuts pils buns discuors, las bialas emoziuns ed il sustegn – seigi quei als giugs a casa ni era ordeifer! Tals aspectaturs e fans ein semplamein grondius!

Nus selegrein gia ussa da puspei seveser sil plaz da bal la primavera 2022!

in remis sco finiziun

Al davos giug dalla runda d’atun retscheiva Trun/Rabius a Pustget la squadra da Tusaun-Cazas. Omisduas equipas san cun ina victoria aunc far il segl sin il 4. rang ella tabella. Malgrad l’aura bruta da november sa Trun/Rabius inaga dapli sefidar sil sustegn da ses fideivels fans, respect a tuttas ed a tuts che han anflau quei di la via ord casa. Persuenter vegnan ei era remunerai cun ina dallas meglieras prestaziuns dil CBTR avon pausa. L’equipa da casa controllescha clar la partida. Ella 26. minuta va Trun/Rabius fadegiau en avantatg. Gianin Derungs ha inaga dapli il nas fin d’in attaccader e nezegia ina malsegirtad dil goli da Tusaun. Paucas minutas pli tard aulza Ramon Orlik il resultat suenter ina situaziun da standard, aschia che Trun/Rabius va cun igl avantatg solid da 2:0 ellas gardarobas cauldas.

Tusaun-Cazas vegn suenter pausa pli ferm ô dalla cabina, denton vinavon senza occasiuns malsegiras. Tochen ella 61. minuta; suenter ina corna sesenta negin responsabels per Nico Bundi e lez ha sempel da marcar igl emprem gol pils hosps. Quei gol vess buc stuiu esser. Trun/Rabius havess giu avunda caschuns da procurcar per il 3:0, mo lai vegnir aschia igl adversari anavos el giug. Quei gol aulza aunc inaga la cadenza dalla partida. 10 minutas avon la fin metscha Gianni Schweigl dalla defensiun. Igl emprem siet vegn Mauricio Cathomas aunc da tener, il secund va denton ella reit per il 2:2. Paucas minutas avon la fin vegn il CBTR aunc inaga tier ina schanzuna, mo il plaz ei capeivlamein leischens ed igl attaccader seleischna gest el falliu mument.

Cun quei resta ei tier il 2:2. Cun in plaz amiez la tabella sa Trun/Rabius segir mirar anavos sin ina mesa sesiun gartegiada. Dapi tschun giugs ha l’equipa dalla Cadi buc spiars, il punct culminont ei segir la victoria encunter il capogruppa Bogn Ragaz. La collaboraziun cun Danis-Tavanasa ha fitgau pei e la qualitad dall’equipa per la 3. ligia ei absolut dentuorn.

 

informaziuns: 3. ligia gruppa 1; Trun/Rabius – Tusaun-Cazas 2:2 (2:0); Pustget, Trun – 120 aspectaturs

gols: 26. Gianin Derungs 1:0, 37. Ramon Orlik 2:0, 61. Nico Bundi 2:1, 80. Gianni Schweigl 2:2

Trun/Rabius: Mauricio Cathomas; Damian Schmed, Livio Janka, Ramon Orlik, Sandro Orlik; Daniel Pfister (57. Clau Berther), Denis Monn (81. Mirco Pfister), Silvan Muoth (62. Fabio Caduff), Salvatore Stagliano; Patrizio Decurtins (83. Remo Alig), Gianin Derungs

Tusaun-Cazas: Emre Akca; Christof Spörri, Aaron Patt, Yanik Brot, Andri Grischott; Silvan Ambühl, Leandro Rüedi, Nico Bundi, Matti Battaglia; Jairo Mathias Caluori Wachter, Gianni Schweigl

remarcas: Trun/Rabius senza Beat Cadruvi, Mathias Flepp, Orlando Monn

       

CB Trun/Rabius  |  Caum postal 153  |  CH-7166 Trun  |  +41 78 789 74 36  |  secretari@cb-trun-rabius.ch