pausa d'unviern

La sesiun da ballapei digl onn 2021 ei terminada. Nus engraziein a tuts pils buns discuors, las bialas emoziuns ed il sustegn – seigi quei als giugs a casa ni era ordeifer! Tals aspectaturs e fans ein semplamein grondius!

Nus selegrein gia ussa da puspei seveser sil plaz da bal la primavera 2022!

pola fiera trun/rabius ô dil cup grischun

Mintgaton sa ei ir spert. Na, jeu manegel buc il comeback da Thomas Gottschalk e «Wetten Dass..?» mobein las midadas duront ina fin d’jamna da ballapei. Atgnamein havess Trun/Rabius giu da giugar la sonda campiunadi a casa encunter Tusaun-Cazas, mo cunquei ch’il plaz a Pustget ei cuvretgs cun neiv ei quella partida vegnida stuschada per ina jamna. E cunquei che Puschlav ha medemamein buc saviu giugar a Tinizong lur giug da campiunadi han las duas equipas fatg il meglier ordlunder e priu avon la partida dil ¼-final dil Cup grischun. Aschia che Trun/Rabius ha astgau serender la dumengia viers Brusio. Tut quella fuola ha crei jeu buc fatg bein all’equipa dalla Cadi, numnadamein era ei buc giugau 10 minutas che Nicola Pola haveva gia sittau dus gols per Puschlav. Silsuenter anfla Trun/Rabius finalmein ella partida, mo gest ella megliera fasa dils hosps fa Pola siu tierz gol. E cuort suenter aulza Fontana schizun sin 4:0. Buc giugau 30 minutas e gia ei la partida ton sco decidida. Quei haveva Trun/Rabius priu avon auter. Suenter pausa emprova il CBTR da far baul il gol mo in siet da dumengias da Alessandro De Campo rumpa quella aspiraziun. Silsuenter vegn Trun/Rabius tuttina aunc tier bunas schanzas e dus gols entras Silvan Muoth e Gianin Derungs, mo per dapli tonscha ei buc quei di a Brusio. Sco tal ei quei giug segir ina gronda trumpada per Trun/Rabius, mo memia gronds fastitgs vegn el era buc a schar.

 

informaziuns: Cup grischun, ¼-final; Valposchiavo Calcio – CB Trun/Rabius 5:2 (4:0); Casai, Campascio – 60 aspectaturs

gols: 2. Nicolo Pola 1:0, 8. Nicolo Pola 2:0, 25. Nicolo Pola 3:0, 28. Matteo Fontana 4:0, 63. Alessandro De Campo 5:0, 73. Silvan Muoth 5:1, 85. Gianin Derungs 5:2 (penalti)

Trun/Rabius: Mauricio Cathomas; Mirco Pfister (75. Remo Alig), Livio Janka, Ramon Orlik, Sandro Orlik; Denis Monn (46. Silvan Muoth), Fabio Caduff (46. Mathias Flepp), Salvatore Stagliano (75. Denis Monn); Clau Berther (46. Damian Schmed), Patrizio Decurtins (83. Fabio Caduff), Remo Alig (46. Gianin Derungs)

Valposchiavo Calcio: Lorenzo Tuena; Luca Cristiano, Alessandro Fiorina, Massimiliano Fiorina, Saran Rampa; Mattia Cathieni, Alessandro De Campo, Oscar Cortesi, Mattia Merlo; Nicolo Pola, Matteo Fontana

remarcas: Trun/Rabius senza Beat Cadruvi, Orlando Monn, Daniel Pfister

       

CB Trun/Rabius  |  Caum postal 153  |  CH-7166 Trun  |  +41 78 789 74 36  |  secretari@cb-trun-rabius.ch