proxims giugs digl atun 2021

3. ligia:  24-10-2021, 15:00 a Pustget CB Trun/Rabius 1 Grp. - FC Landquart 1
4. ligia: 20-10-2021, 20:15 a Mutteins US Danis-Tavanasa 2 Grp. - US Schluein Glion 2

clara victoria per trun/rabius el derbi

Da bellezia aura d’atun ed avon ina grondiusa culissa a Pustget surpren Trun/Rabius immediat la bitgetta el derbi sursilvan e va gia suenter gnanc duas minutas en avantatg entras Patrizio Decurtins. Il proxim gol lai buc spitgar ditg; Gianin Derungs vegn lantschaus cun in bi pass liung da Sandro Orlik e setta il 2:0 per l’equipa da casa. Gnanc duas minutas pli tard il proxim gol; Clau Berther semetta atras ed aulza il resultat sin 3:0 cun in ferm e plazzau siet. Puh, uss stuein nus trer flad inaga! Igl ei pia gnanc giugau 15 minutas e schon meina Trun/Rabius 3:0 el derbi! Ideala entschatta per l’equipa dalla Cadi ed ina pulitta frida per ils Lumnezians. Il CBTR pren uss anavos empau il tempo, controllescha denton vinavon la partida e va ella 37. minuta schizun cun 4:0 en avantatg entras Damian Schmed. Da pausa dat ei pia dabia da discussiunar per ils numerus aspectaturs.

Suenter il te da pausa croda il nivel dalla partida. Trun/Rabius sto buc pli e Lumnezia ha miserias da vegnir tier dapli. La megliera schanza per ils Lumnezians sedat entras in culp liber da Matias Alig che Mauricio Cathomas parescha denton. Ed aschia eis ei plitost in spitgar tochen che l’ura muossa 90 minutas. Cuort avon la fin tuttina aunc in ulteriur gol per il CBTR; Patrizio Decurtins setta siu secund gol da quei di aschia ch’il resultat final munta à 5:0. Trun/Rabius gudogna pia clar il derbi sursilvan grazia a cunzun ina ferma prestaziun ell’emprema mesadad. 

 

informaziuns: 3. ligia gruppa 1; Trun/Rabius - Lumnezia 5:0 (4:0); Pustget, Trun – 310 aspectaturAs

gols: 2. Patrizio Decurtins 1:0, 11. Gianin Derungs 2:0, 13. Clau Berther 3:0, 37. Damian Schmed 4:0, 85. Patrizio Decurtins 5:0

Trun/Rabius: Mauricio Cathomas; Damian Schmed, Livio Janka, Ramon Orlik, Sandro Orlik; Daniel Pfister (60. Remo Alig), Mathias Flepp (62. Denis Monn), Salvatore Stagliano, Clau Berther (75. Silvan Muoth); Patrizio Decurtins, Gianin Derungs (71. Fabio Caduff)

Lumnezia: Martin Mark; Danilo Blumenthal, Tizian Casanova, Manuel Casanova, Mauro Cadonau; Matias Alig, Pascal Marc Derungs, Andriu Alig, Gion Alig, Dario Capaul; Dino Blumenthal

remarcas: Trun/Rabius senza Beat Cadruvi, Orlando Monn, Mirco Pfister

       

CB Trun/Rabius  |  Caum postal 153  |  CH-7166 Trun  |  +41 78 789 74 36  |  secretari@cb-trun-rabius.ch