contact

CB Trun/Rabius

Caum postal 153

7166 Trun

+41 78 789 74 36

secretari@cb-trun-rabius.ch 

 

© 2018 by cb-trun-rabius.ch

il cb trun/rabius retuorna en 3. ligia!!!

Cun la victoria el giug capital encunter Schluein-Glion gartegia ei all’emprema equipa dil CB da turnar suenter quater onns absenza en tiarza ligia. Meglier vess la sesiun buc saviu ir a fin - ni pils giugadurs, ni pils trenaders partents Mario e Carlo. Els bandunan l’emprema cun la megliera finiziun pusseivla.

Gliendisdis Tschuncheismas, punct las quater: da ferma dracca dat igl arbiter liber il giug a Crap Gries, nua che l’emprema equipa dil CBTR frunta silla secunda equipa dall’USSI. E quei giug ei buc in giug sco tut ils auters. Cun ina victoria el davos giug da quella sesiun sa il CB numnadamein gudignar il campiunadi en quarta ligia ed aschia far il pass en tiarza. Per il caucasa da Schluein va ei atgnamein per nuot pli. Schebein tier ina terrada, sco tier ina victoria restan els sil tierz plaz ella tabella.

Tonaton tartignassen ils dalla Foppa bugen la sesiun al rival dalla Cadi - quei sentan ins gia naven dalla bial’entschatta. Suenter mo otg minutas va l’USSI lu era meritadamein en avantatg. Ina durmida collectiva ella defensiun dil CB Trun/Rabius possibiletscha agl attacader dil caucasa, Ronny della Morte, da mitschar. El aulza ina flanchetta cul péz sur il goli Dani Monn o - igl 1:0 ei gia cheu; in’entschatta suboptimala pil CB. Cunquei che Schlarigna ha gudignau il davos giug encunter Tavanasa drova la squadra dalla Cadi exnum tut ils treis puncts ord quei giug. Ed il cuntergol para silmeins in tec dad haver clamau neunavon ils hosps. Ils defensurs ein uss pli datier digl um ed ins emprova da cumbinar encunter anavon. La ferma dracca engreviescha denton fetg in ballapei cultivau per omisduas equipas. Cunzun dad ina vart dil plaz han ins il sentiment ch’ei setracti plitost d’in swimming pool dalla “Badi Glion” che dil plaz da bal a Schluein. Ruschnadas da giugadurs e bals che stattan eri nunspitgadamein ein aschia negina raritad. En mintga cass vegn il CB Trun/Rabius in tec meglier el giug. La 23avla minuta survescha igl Olli cun ina biala flanca il Clau sill’ala dretga, siu siet cul «vollerist» munchenta denton la finamira. Quei ei denton ina dallas paucas schanzas ell’emprema mesadad. Schebein Schluein sco era Trun/Rabius vegn silsuenter buc propi da crear enzatgei prigulus ella da sedisch digl adversari. Aschia meina il caucasa da pausa cun 1:0.

Suenter pausa lai la plievgia pli e pli fetg suenter. Il CB lai persuenter insumma buc suenter, anzi: En lur davos plaid da pausa paran ils trenaders Mario e Carlo dad haver anflau ils dretgs plaids. Ils hosps dalla Cadi vegnan cun slontsch ord cabina. Ei vegn dau anavon pli spert e pli pauc cumplicau. Ina biala acziun per exempel ella 55avla minuta: Il Clau ed igl Ivo dattan ensemen in pass dubel, la flanca sa in defensur da Schluein lu denton aunc deviar tier in corner. Quei corner setta il Clau sco usitau dalla vart dretga. Quella ga vegn il bal denton buc ad ault, mobein a bass el dies dall’entira defensiun. Leu spetg’il Gion-Andrea exact el dretg liug e marchescha cul pei dretg igl 1:1 pils hosps – il CB ei anavos el giug e para uss porpi da gudignar il surpli. Mo gest en quella fasa sesenta il CB en ina situaziun forsa gia memia segirs: Ei vegn schau ir il bal vi e neu davostier ellas atgnas retschas... mo memia ditg; in pass dil Denis va directamein els peis digl attacader da Schluein. Il siet da Dario Derungs gartegia denton mo la latta ed aschia san ils numerus fans dil CB Trun/Rabius a Crap Gries trer profundamein flad. L’equipa lai denton buc tementar ed influenzar da quei fauxpas e pren puspei enta maun il zepter. Gnanc diesch minutas pli tard eis ei lu aschi lunsch ed il CB va l’emprema ga en avantatg: La 67avla minuta vegn il Beat tier il bal a miez suenter in cumbat, meina o in giugadur e dat lu cun siu pei dretg in pass perfetg ella currida da nies «Speedy Gonzales» Orlando. Igl Olli lai siu cuntergiugadur meters davos el e setta cun siu fleivel pei seniester in «vollerist» ella reit – 1:2. Cun quei resultat fuss igl emprem plaz realitad. Quei fact blochescha denton insumma buc l’equipa; il CB dat vinavon anavon. Cunzun il Salva che ei vegnius midaus en da pausa procura per malruaus davontier e munchenta la finamira duas gadas mo lev. È il Beat vegn aunc inaga tier ina buna schanza da gol; siu «schlenzer» sgola denton è sper la crusch sperasvi. Sulettamein inaga – la 85avla minuta – seglia il puls tiels fans dil CB aunc inaga siado. In attacader da Schluein metscha alla defensiun, vegn denton buca da nezegiar la schanza e setta il bal ord anghel git siado ellas neblas.

Mo quei eis ei lu è stau, igl arbiter schula giu il giug ed il CB gudogna il giug capital. Quei munta medemamein che l’emprema fa il pass anavos en tiarza ligia. Ditg han ins duront la sesiun tertgau che quei vegni buc ad esser pusseivel uonn, cunquei ch’il CB Schlarigna era ordavon naven dall’entschatta. Mo cu igl ei iu per la ligiongia han ils Engiadines mussau gnarvas… E gliez ha l’emprema dil CB Trun/Rabius buc. Schegie ch’il caposettagols Tiz ha muncau quasi l’entira primavera han ils trenaders Mario e Carlo menau l’equipa alla testa da quella quarta ligia ed aschia gest fatg a sesezs il pli bi schenghetg da cumiau pusseivel. Aschia seigi cheu aunc inaga engraziau ad els dus per lur nunstunclenteivel engaschi, jamna per jamna, sur onns o. Lur successurs Donat Albin e Philippe Vincenz astgan aschia surprender in’equipa da tiarza ligia - ina gronda sfida ed ina gronda schanza il medem mument.

 

Informaziuns: 8’ 1:0 US Schluein-Glion, 56’ 1:1 Gion-Andrea Nay, 67’ 1:2 Orlando Monn

Formaziun: Daniel Monn - Sandro Orlik, Gion-Andrea Nay (74’ Damian Schmed), Livio Janka, Fabian Cajacob - Orlando Monn, Beat Cadruvi, Denis Monn (89’ Clau Berther), Clau Berther (C) (83’ Carlo Gautschi) - Ivo Albin (66’ Ramon Orlik), Remo Alig (46' Salvatore Staglianó)

Reservas: Andri Nay, Christof Derungs, Mattias Candinas, Damian Schmed, Salvatore Staglianó, Ramon Orlik, Carlo Gautschi

 

bènaltè! - il magazin dil cb

   
1. ediziun - 2016   2. ediziun - 2017   3. ediziun - 2018