contact

CB Trun/Rabius

Caum postal 153

7166 Trun

+41 78 789 74 36

secretari@cb-trun-rabius.ch 

 

© 2018 by cb-trun-rabius.ch

victoria malgrad capriolas dall'aura

Sco finiziun da questa sesiun d'atun spitgava il giug da cup ils giugadurs dall'emprema equipa. Cunquei ch'igl october ei tochen ussa staus aschi bials, eran ils biars dils giugadurs semess en sin in emperneivel giug. S. Pieder ha denton giu auters plan per quella sonda. Cura che l'equipa sesanflava numnadamein en cabina, ha el tertgau da sbassar las temperaturas e da schar curdar scrottas neiv giu da tschiel enstagl dalla plievgia. Il giug sin neiv ei staus marcaus da scenas fetg amisantas - denton era dad aviras ed acziuns affonilas da vart digl adversari. In special giug pretenda en quei senn in special rapport en fuorma da statistica ordinada alfabeticamein. En quei senn bien divertiment. 

 

31 aspectaturs han malgrad l'aura plitost scardalida anflau la via a Pustet per sustener nus - ENGRAZIEL FETG! 

1 big-save da nies goli la 19avla minuta per salvar igl 1:0. In secund siet ord biebein 35m ha el menau ella latta. 

9 caffès Lutz ha in sulet aspectatur buiu duront il giug. Fa tuttina smarvegliar ch'el purtava buca caultscha cuorta duront quei giug. Sto esser ch'el ha eventualmein tuttina inaga giu freid...

1 carta cotschna nundispiteivla havess igl arbiter stuiu mussar ad in giugadur en mellen per dar in schliep al Livio. 

2 cuntergols suenter haver menau 3:0. Igl emprem siet el cantun liung a bass ed il secund egl anghel ("Winkel") lain al goli negina schanza. 

230 dapli detta-pei schelada suenter ni era gia duront il giug. La duscha cun aua caulda ha buca mo fatg bein als piuttis... 

6 giugadurs (forsa era dapli...) han gia jamnas avon il giug dil quart-final pretendiu che tal vegni daus la sonda enstagl dalla dumengia muort la fiasta d'october a Cuera. Silmeins tons han allura era sperau ch'il giug mondi buc ella prolungaziun per ch'els sappien ton pli spert tener enta maun in "Mass"! 

2 gols dil Dani Monn - las cundiziuns nunusitadas paran dad haver motivau nies attaccader. Forsa eis ei era la fiasta d'october da sonda sera - tgisà... 

121 kilometers han ils Lusitanos stuiu far cun auto per puspei arrivar a casa - quei pli probabel cun haver pulit la tg... dalla finiziun dil giug. Silmeins han els buca stuiu pitir freid sin lur viadi da retuorn... (--> mira proxim punct)

3028 liters aua caulda han ils Lusitanos duvrau per far la duscha suenter il giug. Per cletg flessegia avunda aua caulda en nossas duschas a Pustget - buca sco en auters loghens ch'ins sto cuorer giu dil plaz per esser igl emprem ella duscha. 

20 minutas ha scret in "propi mo" cuort rapport davart nies giug sin iniziativa dil Damian che ha tarmess la foti. Che las "20 minutas" han buca tarmess in messadi da push per in eveniment talmein impurtont fa veramein surstar. La finfinala ha il CB contonschiu il miez-final dil Cup grischun cun quella victoria. 

4 pausas per schubergiar las lingias dil plaz. Cunquei ch'ei neveva scrottas pulit grossas han las lingias stuiu vegnir schubergiadas dalla neiv per ch'igl arbiter vesi schebein il bal sesanfla egl out ni aunc el plaz. Certins han schizun duvrau la tabla da serrar il plaz per quei intent ;-) (--> mira fotis)

7'623'487'564 scrottas da neiv han empleniu il plaz da ballapei che quel era la fin els cantuns curclaus cun 5-6cm neiv. La neiv ha procurau per beinenqual scena amisanta nua che giugadurs ein selischnai talmein ch'els ein i sper il bal ora. Ultra da quei han ins stuiu dar quitau els cumbat in encunter in; era conters che attaccaders han saviu cuorer persuls encunter il gol han nuota muntau ch'il bal vegni adina cun... Ils "Abstoss" e culps libers han ins denton saviu sittar giu d'in mantun neiv, aschia che quels vegnevan tuttina dètg lunsch. 

11 tgaupentels sil ed in pèr spel plaz. Cun acziuns diltuttafatg affonilas e deplazzadas sin in plaz da ballapei ein certs giugadurs curdai si a moda oreifer negativa. Dar cumbels el dies ni in schliep el tgau davos e silsuenter curdar per tiara e far sco sche tschel havess pitgau ins ei buca gest in segn da bia caracter! Tresta caussa in tal secuntener - capeta denton da temps en temps tier talas equipas... 

47 ga bess en falliu il bal ("Foul-Iwurfs") da giugadurs en mondura melna. Il better en il bal semegliava plitost in pass da bal canaster ni in stuschar il bal... Tuttina ha igl arbiter buca quitau necessari dad interrumper il giug per quei motiv. 

1 victoria da 3:2 che munta il miez-final dil Cup grischun - nua che Cuera spetga sil CB. Duront fasas dil giug ha il CB dau buca mal risguardau las relaziuns dil plaz fetg specialas. Oravontut suenter pausa han ins magari denton era schau dar ballapei empau memia fetg ils Lusitanos, aschia che quels ein vegni a schanzas ed han aschia saviu sittar dus gols. 

 

Informaziuns: 16’ 1:0 autogol Lusitanos (Remo Alig), 42’ 2:0 Daniel Monn, 60' 3:0 Daniel Monn, 69' 3:1 Lusitanos, 76' 3:2 Lusitanos

Formaziun: Sandro Tomaschett – Fabian Cajacob, Damian Schmed, Livio Janka, Sandro Orlik – Clau Berther, Beat Cadruvi, Salvatore Staglianó (C), Orlando Monn – Daniel Monn (88' Mattias Candinas), Remo Alig (72' Denis Monn)

Reservas: Flavio Schuoler, Denis Monn, Pierin Monn, Mattias Candinas, Christof Derungs

 

 

bènaltè! - il magazin dil cb

   
1. ediziun - 2016   2. ediziun - 2017   3. ediziun - 2018