contact

CB Trun/Rabius

Caum postal 153

7166 Trun

+41 78 789 74 36

secretari@cb-trun-rabius.ch 

 

© 2018 by cb-trun-rabius.ch

dir cumbat e bia gnarva per treis puncts

Suenter la prestaziun plitost magra la fin d'jamna vargada encunter Domat spitgavan tuts ina reacziun dall'emprema equipa encunter il secund davos rangau dalla tabella da 4. ligia. Quella reacziun han ils giugadurs denton mussau mo en fasas dil giug e cun quella pretaziun danovamein buca perschuadiu diltuttafatg.

L'entschatta dil giug marchescha il CB Trun/Rabius gia presenza el giug e vegn gia baul tier schanzas: Gia la secunda minuta vegn in siet da nies attaccader Remo deviaus ad ina corna. Tschun minutas pli tard sieta il Damian ina tgaua sper il gol ora, quei suenter in bi culp liber viaden ella da sedisch digl adversari da Panaduz. Igl emprem quart d'ura fa l'emprema equipa l'impressiun da controllar il giug; sulettamein las schanzas che sedattan stuessen vegnir nezegiadas meglier dils giugadurs sil plaz. Panaduz da l'auter maun vegn sporadicamein denton era malsegirs avon gol, quei oravontut sur spertsa acziuns sur l'ala dretga. 

La 20 e 21avla minuta suonda allura in'occasiun dubla pil capo-settagols Patrizio. Suenter dus bals liungs vegn el mintgamai da semetter atras bein encunter il defensur en blau-tgietschen; il siet sin gol vegn denton paraus dil goli ni ch'el munchenta per pauc la finamira. Suenter quellas acziuns vegn Panaduz allura tec a tec meglier el giug e surpren empau il dictat dil giug - e vegn leutier aunc tier occasiuns da gol suenter cornas ni acziuns spertas sur las alas. En quella fasa dil giug lai il CB smaccar en davostier memia fetg ed ei leutier savens memia lunsch naven dil cuntergiugadur. Il surpli da plaz nezegia il caucasa oravontut amiez il plaz fetg bein e vegn aschia da sfurzar si a Trun/Rabius siu giug. Gest en quella fasa - pli exact la 29avla minuta - reussescha ei al CB da sedeliberar dil squetsch entras in'acziun sco ord il cudisch da tactica: Il siet da deliberaziun setschenta amiez il plaz tier Remo, il qual lantschescha immediat e precis il dretg mument il cametg Orlando sill'ala seniastra. Lez pren cun il bal cun tut sia spertadad, aulza il tgau e vesa da vart dretga il Clau che cuora tut persuls viers il gol. Il pass vegn gest sco quei ch'el stuess ed il Clau ha negina miseria da plazzar il bal el cantun liung per schar negina schanza al goli - 0:1. Quei gol ei in ver highlight e muossa con sempel ed effectiv che ballapei sa esser.  

Sinaquei vegn il CB puspei meglier el giug e dominescha da principi dad A tochen Z. Gest quater schanzas vegnan ils giugadurs en ner-alv da crear avon pausa entras dar spert ed exact. Aschia vegn il Tiz danovamein da semetter atras viers il defensur central; ses siets munchentan denton per pauc il rectanghel desiderau. La 40avla vul il Remo plazzar il bal memia exact; suenter ch'el vegn lantschaus sill'ala dretga e sa ir persuls encunter il goli tucca el deplorablamein mo la petga dil cantun liung. Plinavon va era in siet da nies capitani Salvatore sur il gol ora. Cul resultat da (mo) 0:1 van las duas equipas pia ella pausa. 

Per la secunda mesadad vesan ils biars pertuccai aunc potenzial e cunzun era "aria ad ault", pia beinenqual punct che sa vegnir migliuraus. Aschia vala ei p.ex. da star pli datier digl adversari per buca schar dar quel siu ballapei. Suenter pausa surpren denton l'equipa da casa puspei la bitgetta ed il CB para dad esser culs patratgs aunc ella cabina. Aschia han ins puspei pulittas miserias da sedeliberar ord l'atgna zona defensiva suenter acziuns mo per part malsegiras da Panaduz. In siet da tals ord biebein 25m munchenta la 53avla mo per pauc la crusch. Tschun minutas pli tard meina ina corna da Panaduz ad in malfatg da Trun/Rabius; il bal tucca tuppamein il maun/bratsch d'in dils nos, aschia ch'igl arbiter dubitescha buca secunda e muossa sil punct. Il penalti meina allura agl 1:1 - ed ad entgins cavels grischs dapli tier certas persunas spel plaz. 

Sco sche quei fuss denton puspei stau il segn dad alzar empau la cadenza vegn Trun/Rabius mo treis minutas pli tard dad ir en avantatg: In pass dil Dani sur la defensiun el cuntermoviment ora surpren il Clau e lai era quella ga negina schanza al goli - 1:2. Uss spetgan tuts ina reacziun dil CB el senn dad in ulteriur gol - mo puspei vegn ei auter. Gia la 64avla minuta liberescha la latta pil hosp. Suenter ina corna demuossan ils giugadurs en ner-alv danovamein miserias da spedir naven il bal; ferton ch'igl emprem siet va ella latta, vegn il secund bloccaus ed il tierz munchenta per cletg la finamira. Mo ei vegn aunc mender... In bodycheck el dies digl attaccader da Panaduz la 70avla minuta meina ad in ulteriur penalti pil caucasa. Era quella ga ha igl Andri insumma negina schanza da parar il siet. 2:2 - ed aunc dapli cavels grischs tier certas persunas sper il plaz...  

"Quei vegn schon bien", audan ins d'in ni l'auter giugadur sil plaz. Aschia aulzan tals puspei la cadenza e vegnan pauc suenter il 2:2 tier in'occasiun da gol suenter ina corna. Il siet pulit ferm vegn denton paraus dil goli. La corna suandonta sedat ina schanza pil Tiz, il qual sieta deplorablamein sper gol ora. La 80avla minuta va ei vonzeivi spert: In foul cuort avon la da sedisch meina ad in culp liber. Il Salva pren dabot il bal, lantschescha il Clau che sa cuorer persuls encunter il goli - e lez marchescha cun saung freid il 2:3. Uss munglassen quels treis puncts finalmein esser ils nos! Il resultat quietescha denton aunc adina buca la gnarva dils trenaders, dils giugadurs sil baun e dils aspectaturs. La fasa finala ei marcada da bia hectica e cumbat - ballapei vegn plitost dau pauc. Detg sincer impedescha igl arbiter "engles" era plitost in giug flessegiont... Cuort avon la fin astga allura aunc in adversari bandunar pli baul il plaz, quei suenter dus fouls dalla marca "grop" encunter il Sandro ed il Clau. 

Per la finala rumiar ord peis tut ils dubis marchescha il Daniel aunc in culp liber la 92avla minuta. Il bal sittaus a bass anfla la via sper il mir ora viers il cantun cuort - e sur il goli ora. Il 2:4 munta allura medemamein il resultat final che porta al CB treis puncts e che segirescha la secunda posiziun ella tabella da 4. ligia, malgrad ch'ins ha tenor il meini dils biars buca viu ina gronda differenza denter il secund ed il secund davos plazzau ella tabella. 

Da menziunar ei en quei connex con fetg ch'ils meinis davart in giug san divergir: Ferton ch'enqualin ei perschuadius ch'ins ha dau in pulit bien giug quetan auters ch'ins hagi dau miserabel. La finfinala eis ei ord mia vesta persunala stau ina mischeida da bunas acziuns sco p.ex. il gol al 0:1 ni las reacziuns mintgamai suenter in cuntergol, cunzun entras alzar il tempo d'ina vart; da l'autra vart han ins denton darar giu il sentiment che l'equipa seigi propi segira da sesezza e ch'in cuntergol sappi curdar suenter mintg'acziun ella da sedisch entras il fatg ch'ins ha parzialmein giu grondas miserias da sedeliberar ord l'atgna zona. Era amiez han ins per part schau memia bia plaz agl adversari ed aschia survegniu zunghegiau si il giug da quel. Tut en tut sun dil meini che la prestaziun ei en scadin cass stada megliera ch'il giug precedent, denton era fermamein perschuadius che nus savein dar in tut auter ballapei. In ulteriur fatg positiv en caussa: Avon entgins onns havessen nus cun tutta garanzia spiars in tal giug, sco era quel encunter Domat. Quei ei in indezi pil svilup dall'equipa ell'endretga direcziun - silmeins quei che pertucca il resultat. La finfinala ei quei il sulet che quenta la fin dil giug...

In cordial engraziament aunc a nos fideivels aspectaturs che han priu la via suttapeis per sustener nus a Panaduz. Engraziel fetg!

 

Informaziuns: 15’ 0:1 Clau Berther, 56’ 1:1 FC Panaduz, 58' 1:2 Clau Berther, 69' 2:2 FC Panaduz, 70' 2:3 Clau Berther, 92' 2:4 Daniel Monn

Formaziun: Andri Nay – Christof Derungs (46' Daniel Monn), Damian Schmed, Carlo Gautschi, Sandro Orlik – Clau Berther (89' Denis Monn), Beat Cadruvi, (67' Dario Schuoler), Salvatore Staglianó (C), Orlando Monn – Patrizio Decurtins, Remo Alig

Reservas: Livio Janka, Denis Monn, Daniel Monn, Dario Schuoler, Sandro Tomaschett

 

bènaltè! - il magazin dil cb

   
1. ediziun - 2016   2. ediziun - 2017   3. ediziun - 2018