contact

CB Trun/Rabius

Caum postal 153

7166 Trun

+41 78 789 74 36

secretari@cb-trun-rabius.ch 

 

© 2018 by cb-trun-rabius.ch

victoria el derbi – secunds ella tabella

Avon il davos giug da campiunadi era clar: Il CB Trun/Rabius sto gudignar il giug e far neginas cartas melnas, lu ei il pass sil secund plaz ella tabella aunc pusseivels. Sper quella motivaziun da survargar en davosa minuta il rival da Schluein-Glion vess il derbi tradiziunal gie atgnamein schon giu dad esser avunda motivaziun per mobilisar las forzas ina ultima gada avon la pausa da stad. Avon ina biala culissa dat igl arbiter liber il giug sonda sera las sis. 

Ins pudess tertgar che mo ils giugadurs dil caucasa da Tavanasa han sefatg en ch'il giug ei gia daus libers. Suenter treis minutas marchescha l’US Danis-Tavanasa numnadamein gia igl 1:0 suenter ina durmida collectiva dils hosps da Trun. Ni defensiun, ni goli ein cheu cul tgau ed aschia vegn Tavanasa suenter ina sempla acziun tier igl emprem gol dil giug. Il gol fa denton buca vegnir neunavon ils hosps dil CB. Anzi, Tavanasa vegn mo tschun minutas pli tard puspei tier ina fetg buna caschun. Tochen pausa vegn il CB buca tier ina buna acziun da gol; igl ei propi ina mesadad dad emblidar e l’equipa sa esser leda che Tavanasa ha buca marcau in secund gol.

Suenter pausa vegn il CB lu meglier el giug. Ils trenaders Mario e Carlo han para anflau ils dretgs plaids ed ils medems endisch giugadurs vegnan sco midai ora puspei sil plaz. Aschia menziunescha era igl ex-trenader dall’USDT Gabi Derungs suenter il giug: «Cheu ves’ins puspei inagada tgei ch'aschia ina pausa sa far ora.» Ils hosps han propi surpriu il zepter ed ella 56avla minuta dat il Dani in fetg bi pass ella gassa sigl Orlando. Lez survarga la defensiun da Tavanasa cun sia spertadad e sa mo pli vegnir frenaus cun ina tipica «notbremsa» - penalti ei la logica consequenza. Il goli dall’USDT emprova aunc dad irritar il Livio; lez ha denton puspei anflau siu saung freid ch'el veva schau per in di a casa (enstagl da prender cun quel a Bogn Ragaz) e marchescha senza problems igl 1:1. Quei gol dat vinavon slontsch al CB e gnanc diesch minutas pli tard marchescha il Tiz siu 21avel (!!!) gol dalla sesiun. Il 2:1 per l’emprema croda suenter ina precisa flanca dil Dani Monn che nies caposettagols metta cul tgau ella reit. La 80avla vess lu atgnamein il tierz gol giu da curdar, mo igl Olli sco era il Pipo munchentan l'occasion dubla. Quei ch'il vegl Monn ha aunc munchentau, fa il giuven dils dus frars mo duas minutas pli tard in bien ton meglier. Döönis marchescha numnadamein cun in siet ord biebein vegn meters il 3:1; nuota in schliet mument da far igl emprem gol pil CB Trun/Rabius. Il giug ei aschia decidius e Tavanasa vegn buca pli da far squetsch silla defensiun dil CB.

La sesiun da bal 17/18 ei cun la victoria el derbi aschia a fin. Quella sesiun terminescha il CB Trun/Rabius sil fetg bien secund plaz. Sch'ins mira cun tgei miseria da blessuras che l’emprema ha giu da cumbatter cunzun ils davos giugs, sche san ins propi tschintschar d’ina sesiun gartegiada. Pauc ha muncau e l’equipa da Mario e Carlo vess fatg il pass en tiarza ligia. Ils fans dil CB astgan en mintga cass esser spanegiai co l’equipa vegn a sepresentar la proxima sesiun – speronza cun in meglier emprem giug da campiunadi ch'igl onn passau. Cun in tec pli bia constanza ei lu numnadamein era il pass anavos en tiarza ligia pusseivels.

 

Informaziuns: 3’ 1:0 Daniel Pfister, 56’ 1:1 Livio Janka, 65’ 1:2 Patrizio Decurtins, 82’ 1:3 Denis Monn

Formaziun: Flavio Schuoler – Fabian Cajacob, Carlo Gautschi (25’ Damian Schmed), Livio Janka, Ramon Orlik – Sandro Orlik (71’ Denis Monn), Beat Cadruvi (78’ Philippe Vincenz), Salvatore Staglianó (C), Orlando Monn – Patrizio Decurtins (89’ Carlo Gautschi), Daniel Monn (84’ Mirco Pfister)

Reservas: Philippe Vincenz, Damian Schmed, Mirco Pfister, Denis Monn

 

 

bènaltè! - il magazin dil cb

   
1. ediziun - 2016   2. ediziun - 2017   3. ediziun - 2018