• home
  • home
  • in debachel nunspitgau per l’emprema

in debachel nunspitgau per l’emprema

Mo dus dis suenter la terrada encunter il direct concurrent Schluein/Glion ha ei giu num pil CB Trun/Rabius da serender giu Bogn Ragaz e giugar encunter il davos dalla tabella. Sil pupi atgnamein ina clara caussa; denton ei Bogn Ragaz miez el cumbat per restar en quarta ligia ed ils giugadurs dall’emprema savevan ch'ei vegni a dar in grev giug. 

Il CB entscheiva bein il giug e vegn gia baul entras il Dani tier ina buna schanza da gol. Denton era il caucasa da Bogn Ragaz dorma buca giu las empremas minutas. Suenter in quart d’ura vegn igl adversari lu tier ina buna acziun da gol cun in culp liber. Quei culp liber vegn lu era nezegiaus immediat cun in «schlenzer» plazzau el cantun liung ed ei stat 1:0 per Bogn Ragaz. Mo ina minuta pli tard stat ei gia 2:0 per l’equipa sogngagliesa – quei suenter in corner. Tgei cletg survegn il CB Trun/Rabius en quella fasa da squetsch in penalti ella 24avla minuta. Mo oz para ei buca dad esser il di dils hosps dalla Cadi: Il Livio, schiglioc aunc mai munchentau da marcar dil punct ord endisch meters, metta il penalti vid la latta. Mo cuort suenter vegn il Dani Monn puspei tier ina bun’acziun: Suenter in bellezia pass ella gassa dil Clau vegn el persuls avon gol, munchenta denton medemamein da marcar il 2:1. “Tgi che fa buca els davon – lez survegn els davos...” Quella floscla da ballapei ha pauc corrispundiu aschi fetg sco ell'emprema mesadad da quei giug. Ella 30avla minuta survegn la squadra da Bogn Ragaz numnadamein era in penalti. Il Flavio en gol ha neginas schanzas ed aschia stat ei 3:0 per il davos dalla tabella. Cun quei resultat van ils giugadurs ella pausa.

Suenter pausa vegn il CB puspei meglier el giug. Ils giugadurs paran dad esser fiug e flomma da volver il giug. Aschia marchescha il Tiz suenter 56 minutas era igl emprem gol per la squadra dalla Cadi; quei mo duas minutas suenter ch’el era vegnius midaus en. Mo sis minutas pli tard marchescha il Salva schizun il 3:2 suenter in bi pass da Daniel Lopez. Ussa ein tuts perschuadi: quei giug ei aunc buca piars ed il renomau «momentum» ei silla vart dils hosps. Tut vegn denton auter: Mo treis minutas pli tard, la 65avla minuta, marchescha Bogn Ragaz il 4:2. E lu suondan diesch minutas d’emblidar. La 69avla stat ei 5:2, ea 72’avla gia 6:2 e la 75avla minuta marchescha Bogn Ragaz entras in penalti schizun il 7:2. Il CB para sco perplex. Il giug ei vargaus ed il davos quart d’ura schabegia nuot relevant pli. 

Tgei che dat segiramein da studegiar ei suandont: sis! da siat gols ein curdai suenter standards (dus penaltis, dus corners e dus culps libers). Pils proxims giugs vala ei da secuntener pli clever e far pli paucs fouls maneivel dalla zona prigulusa. Medemamein ston ils giugadurs avon il gol vegnir persequitai bia pli intensiv e mintg’um sto encurir in cuntergiugadur: ei sa buca esser che Bogn Ragaz vegn pliras gadas senza problems tier tgauas. Quei ei denton buca mo ina critica alla defensiun mobein all’entira equipa. Buca in sempel giug eis ei era stau per il Flavio che ha dau siu emprem giug en gol pil CB Trun/Rabius. Era ils juniors A Denis e Ramon han puspei dau cull’emprema ed ein, sco gia menziunau el davos rapport, in gudogn per l’equipa. Ei dat dis nua che semplamein pauc tochen nuot va si. Sco trenader Mario e capitani Salva han gia resumau cun raschun suenter il giug: igl engaschi ha atgnamein constau. Tuttina ei il giug staus ina fetg gronda trumpada per equipa, trenaders ed era per ils numerus aspectaturs da Trun/Rabius che han anflau la via a Bogn Ragaz (engaziel fetg!). Il tren davontier dalla tabella ei suenter las davosas duas terradas ius ed il victur dalla quarta ligia vegn tgunsch a vegnir eruius denter Lumnezia e Schluein. Pil CB Trun/Rabius vala ei da mussar ina reacziun da Gliendisdis Tschuncheismas a Pustget encunter Val.

 

Informaziuns: 7:2: 1:0 15’ Bogn Ragaz, 2:0 16’ Bogn Ragaz, 3:0 30’ Bogn Ragaz, 3:1 56’ Patrizio Decurtins, 3:2 62’ Salvatore Staglianó, 4:2 65’ Bogn Ragaz, 5:2 69’ Bogn Ragaz, 6:2 72’ Bogn Ragaz, 7:2 75’ Bogn Ragaz

Formaziun: Flavio Schuoler – Sandro Orlik, Damian Schmed, Livio Janka, Orlando Monn – Gian Andrea Beer (75’ Denis Monn), Beat Cadruvi (75’ Carlo Gautschi), Salvatore Staglianó (C) (62’ Daniel Monn), Clau Berther (39’ Ramon Orlik)– Daniel Lopez, Daniel Monn (54’ Patrizio Decurtins, 75’ Clau Berther)

Reservas: Patrizio Decurtins, Ramon Orlik, Carlo Gautschi, Denis Monn