contact

CB Trun/Rabius

Caum postal 153

7166 Trun

+41 78 789 74 36

secretari@cb-trun-rabius.ch 

 

© 2018 by cb-trun-rabius.ch

ina terrada che fa mal a crap gries

Secund encunter tierz - ni era: USSI encunter CBTR. Tut ils adherents dil ballapei sursilvan spitgavan sin quei rencontre da gievgia Anceinza. Avon ina biala culissa cun 270 aspectaturs vegn il derbi sursilvan daus liber las 16:00.

Il giug entscheiva fetg malruasseivel e l’US Schluein/Glion sco era ils hosps dil CB Trun/Rabius vegnan buca propi da far zatgei productiv cul bal ellas empremas diesch minutas dil giug. Suenter 12 minutas han ils hosps dalla Cadi lu l’emprema scena commemorabla: Suenter ina bial’acziun singula vegn il Clau tier in siet ord 25 meters che metta il goli da Schluein denton buc avon pli gronds problems. Cuort suenter vegn era il caucasa tier ina buna acziun: il siet digl attacader munchenta denton era la finamira. Suenter 17 minutas vegn puspei il Clau da menar ora siu cuntergiugadur cun in bi tunnel e survescha il bal amiez. Leu survegn Livio denton il bal el dies e vegn buca da plazzar quel en gol. Beat vegn denton aunc tier il secund siet; el vegn aber medemamein buca da marcar il 0:1 pils hosps. Quei eis ei lu stau per in mument cun bunas scenas da gol. Omisduas equipas vegnan buca da cumbinar e giogan cun bals aults. Ins senta ch'ei va per bia en quei giug da campiunadi e negin vul propi riscar zatgei. Cuort avon pausa vegn aunc il caucasa tier ina excellenta schanza: Suenter in bial'acziun dil «flügel» dretg va il bal atras la da sedisch dil CB nua che amitgs ed adversaris munchentan denton «il curom». 

Suenter pausa vegnan ils giugadurs da Schluein meglier el giug e vegnan en ina plitost fleivla fasa dil CB da marcar igl emprem gol da quella partida. Suenter in «iiwurf» dil cantun vegn il bal a miez nua che negin giugadur dil CB sesenta responsabels da tener il capitani digl adversari. Lez di engraziel e marchescha cul péz igl 1:0. Cuort suenter vegn Schluein puspei tier ina buna schanza da gol. Il culp liber ord biebein ventgatschun meters sgola denton lev sur il gol da Sandro ora. Ils aspectaturs spetgan ussa sin ina reacziun dils hosps. Il CB lai denton peda tochen ella 73avla minuta. Lu porta il Dani in corner ella zona da puniziun perfetg sil tgau da Sandro. Lez vegn denton buca da smaccar endretg il bal ed aschia va el sur il gol ora. Diesch minutas pli tard vegn il Dani sez aunc tier ina schanza da gol. Suenter in bi pass ella gassa eis el denton in tec memia plauns ed il goli da Schluein vegn ora bein e sa sclarir la situaziun. In «Schlussfurioso» dat ei buc pli. Ils giugadurs rutinai da Schluein giogan a fin il giug las davosas minutas a moda suverana. Suenter il giug vegn ei aunc in tec pli hectic ed il Sergio survegn aunc ina carta cotschna suenter ina acziun nunnecessaria – quei vess definitiv buca stuiu esser e porta auter che puncts da puniziun nuot al CB.

La seria da giugs senza terradas ei pil CB Trun/Rabius pia a fin. Il giug a Crap Gries ei segiramein buca staus in giug per «Fussballästhetiker». Igl ei buca sempel dad anflar motivs e raschuns daco ch'ils hosps dalla Cadi han buca saviu cuntinuar cun las prestaziuns dallas davosas treis jamnas. Il pressing offensiv dallas davosas jamnas sco era la segirtad ellas cumbinaziuns era sco naven. Sch'il plaz grond ni la nervusadad pon declarar quei stat ellas steilas. Ina victoria fuss suenter quella prestaziun buca stada meritada. Schluein ha denton era buca giugau aschi in perschuadent giug ch'in pari fuss forsa stau il resultat il pli gest. Exact en da quels giugs vala ei denton da smaccar en il bal – sin tgei moda e maniera era adina – e quei ha halt mo Schluein fatg quei di. 

Ina caussa ei denton tuttina legreivla quella gievgia d’Anceinza: Ils giuvens giugadurs Ramon Orlik e Denis Monn han dau lur debut cun l’emprema equipa dil CB Trun/Rabius. Omisdus ein segiramein duas empermischuns pil futur. Medemamein ha il Flavio Schuoler survegniu il pass ed astga naven dad ussa dar cun il campiunadi. Per l’equipa vala ei da beinspert emblidar quei giug e cuntinuar gia proxima sonda a Bogn Ragaz cun las prestaziuns dallas jamnas passadas. Il campiunadi va aunc tschun giugs e per l’emprema ei aunc tut pusseivel.

 

Informaziuns: 1:0: 1:0 53’ US Schluein/Glion

Formaziun: Sandro Tomaschett – Sandro Orlik, Damian Schmed, Livio Janka, Orlando Monn – Gian Andrea Beer (80’ Sergio Regufe), Beat Cadruvi (75’ Ramon Orlik), Carlo Gautschi (62’ Daniel Monn), Clau Berther – Daniel Lopez, Salvatore Staglianó (C) (88’ Denis Monn)

Reservas: Daniel Monn, Ramon Orlik, Sergio Regufe, Denis Monn, Patrizio Decurtins, Flavio Schuoler

 

bènaltè! - il magazin dil cb

   
1. ediziun - 2016   2. ediziun - 2017   3. ediziun - 2018