• home
  • home
  • di dallas portas aviartas a pustget

di dallas portas aviartas a pustget

La sesiun da bal 2017/18 ha tochen dacheu aunc buca propi mussau nua ch’il viadi dil CB meina. Avon il giug encunter Bogn Ragaz sesanfla l’equipa amiez la tabella e per tener il contact cun las equipas alla testa era ina victoria necessaria. Suenter la petra terrada egl emprem giug encunter Lumnezia ha il CB denton buca spiars in giug ed aschia eran ils aspectaturs a Pustget spannegiai, schebein quella seria possi tener.

Il giug entscheiva atgnamein bein pil CB: Las empremas minutas han ils attacaders schanzas che ston atgnamein da gol en. Mo igl ei igl adversari da Bogn Ragaz che marchescha igl emprem gol en quella partida, quei denton fetg fortunau entras in “prellball” sco ord il cudisch. Quei betta la squadra da casa denton buc ord il concept ed aschia marchescha il CB entras Daniel e Clau ils proxims dus gols dalla partida, quei mintgamai suenter bialas acziuns dallas alas si. Schegie ch’il caucasa ha sut controlla il giug vegn igl adversari da Bogn Ragaz da marcar il 2:2 cuort avon pausa. Dall’efficienza dall’equipa songagliesa savess l’emprema segir e franc tagliar giu ina schiba; il CB vess numnadamein stuiu ir cun in avantatg en cabina.

Cun gest treis midadas da pausa emprovan ils trenaders Mario e Carlo da recaltgar ils treis puncts giavischai: Ed ina midada porta immediat fretg. Gnanc ina minuta suenter esser el giug vegn il Tiz da marcar il 3:2 suenter in bellezia pass dil Piet. Mo ei va buca ditg ch’igl adversari vegn puspei dad egalisar – igl ei propi da survegnir cavels grischs. Mo l’equipa da casa lai buca pender il tgau. La 74’ dat ei lu il proxim gol: Puspei eis ei il Tiz che vegn suenter ina biala acziun da Piet ed Olli vid il bal e stauscha il bal cun in studegiau „schieber“ sper il goli vi. E mo duas minutas pli tard stat ei gia 5:3 pil caucasa. Orlando semetta atras encunter siu adversari e lantschescha Piet che porta puspei il bal avon il gol - nua ch’il Patrizio marchescha siu tierz gol dil giug. Finalmein in tec aria pudessen ins tertgar; mo las gnarvas dad aspectaturs e trenaders vegnan propi messas sill’emprova. La secunda equipa da Bogn Ragaz vegn aunc inaga dad egalisar il giug: 5:5 suenter 86 minutas. Il giug cuoza buca pli ditg, mo il CB ei l’equipa che vul exnum gudignar quei giug. Ed aschia eis ei igl Olli che dat in sforz dall’ala si e survarga cun sia immensa spertadad igl adversari e setta cun in siet plazzau il gol tiel 6:5 la 90avla minuta. La davosa minuta marchescha Piet lu aunc il 7:5 cun in bi siet suenter in pass da Bruno.

Tschontscha il resultat che vesa plitost ora sco in resultat da hockey sin glatsch per sesez - davontier top, davostier flop? Gliez fuss veramein formulau la caussa in tec sempel. Denton ha il CB segiramein survegniu memia biars gols ed al goli Philippe san ins tiels gols veramein buca far grondas reproschas. Da studegiar dat segir era ch’il CB ha aunc schau vegnir anavos Bogn Ragaz el giug suenter in 5:3. Legreivel ei segiramein las bialas cumbinaziuns sur las alas che han procurau per enqual gol. Ussa vala ei pil CB da focussar vinavon e buca piarder puncts ils proxims giugs – tenor ils resultats dils davos giugs ei l’emprema denton sill’endretga via.

 

Informaziuns: 6’ 0:1 FC Bad Ragaz 2, 9’ 1:1 Daniel Caldeira, 29’ 2:1 Clau Berther, 40’ 2:2 FC Bad Ragaz 2, 46’ 3:2 Patrizio Decurtins, 50’ 3:3 FC Bad Ragaz 2, 74’ 4:3 Patrizio Decurtins, 76’ 5:3 Patrizio Decurtins, 82’ 5:4 FC Bad Ragaz 2, 86’ 5:5 FC Bad Ragaz 2, 90’ 6:5 Orlando Monn, 92’ 7:5 Piet Raap

Formaziun: Philippe Vincenz – Fabian Cajacob, Damian Schmed, Carlo Gautschi, Sandro Orlik (77’ Silvan Cajacob) – Clau Berther (89’ Bruno Regufe), Salvatore Staglianó, Livio Janka (46’ Beat Cadruvi), Daniel Monn (46’ Orlando Monn), - Piet Raap, Daniel Caldeira (46’ Patrizio Decurtins)

Reservas: Orlando Monn, Patrizio Decurtins, Beat Cadruvi, Silvan Cajacob, Bruno Regufe