Zum Inhalt

bènaltè! 2023

prefaziun

Uonn ei tut niev! – Dad ina vart dat ei uonn per l‘emprema ga ina versiun dil «bènaltè!» digitala e da l‘autra vart ei tut era niev per mei. Jeu sun vegnida eligida sco actuara dil CB Trun/Rabius a caschun dalla davosa radunonza generala. Per mei ei quei all‘entschatta stau in tec curios. Jeu audel duront mintga seduta novas informaziuns ed astgel per l‘emprema ga era integrar miu meini e mias ideas.

Il motiv daco ch‘jeu hai dau tier a quei post ei, perquei ch‘jeu hai calau da dar ballapei e level buc extrar dil club. Aschia hai jeu viu quei sco buna schanza da vinavon esser part dil club. Gia da pintga sun jeu mintga dumengia ida a mirar co nossas equipas dattan. Suenter hai jeu mezza entschiet a dar, sun era savens stada cun la cassa dil club duront ils giugs ed oz astgel vinavon esser ina part dil club.

Jeu stoi aunc s’endisar in tec vid quei post, denton sun jeu perschuadida che quei ei ina buna caussa.

Uss giavischel jeu a vus bien divertiment da leger nossa nov’ediziun dil «bènaltè!»!

Salids sportivs
Svenja Tomaschett

impressum

EDIZIUN ED EDITUR
8. ediziun | uost 2023

CB Trun/Rabius
Caum postal 153
7166 Trun
cb-trun-rabius.ch
+41 79 774 25 39
secretari@cb-trun-rabius.ch

REDACZIUN
Mauro Alig
Gian Carlo Candinas
Patrizio Decurtins
Gino Maissen
Denis Monn
Selina Tomaschett
Svenja Tomaschett
Sandro Tomaschett

INSERATS
Andri Bearth

Jasmin Bearth

Davide Beer

Fabian Collenberg

Pietro Jacomet

Sandro Orlik

Lorena Spescha

editorial

Preziadas lecturas, preziai lecturs

L’otgavla ediziun dil «bènaltè!» ei l’emprema che vegn distribuida online – silmeins en fuorma digitala pia. Ditg e liung ei numnadamein buca stau clar co ei mondi vinavon cun nies magazin, il qual s’auda enzaco gia tiegl inventari. Ina buna part da nossas lecturas e nos lecturs spetgan mintgamai vess da tener enta maun il «bènaltè!» avon che la sesiun d’atun entscheiva sin nos plazs da ballapei. Nus stuein denton trumpar vus; tener enta maun saveis quella gada buc il magazin – silmeins buc la fuorma da pupi. Secapescha saveis vus quella ga era leger il «bènaltè!» sin vies smartphone, tablet ni che vus saveis tenor basegns era tener il monitur da vies computer per haver enzatgei enta maun. Quei ei la finfinala surschau a mintgin; e forsa dess era la moda e maniera da leger la versiun digitala in pèr legras anecdotas da raquintar, tgisà. Quellas saveis vus forsa leger ella proxima ediziun – premess che quella cumpara…

À propos magazin: Tenor il «Duden» ei in magazin in stampat broschau che cumpara regularmein. En quei senn fuss «blog» (la scursaniziun da «Weblog») forsa pli adattau, mo in diari ei il «bènaltè!» era buca propi… Basta, seigi tgei che vegli: Ils artechels dad uonn vegnan edi sur la pagina-web dil CB Trun/Rabius. E sco ei para haveis vus anflau quella – cass cuntrari savesses vus buca leger quei artechel. E cun quei ei nossa finamira contonschida enaquella che noss’otgavla ediziun ha contonschiu vus.

Mo lein puspei turnar als motivs per la versiun digitala digl otgavel «bènaltè!». Sco gia menziunau igl onn vargau ha il CB giu beinenqual project sil plan da lavur per 2023. Aschia san ins naven dad uonn finalmein era dar in ni l’auter giug la sera – e quei naven dad immediat cun avunda glisch. 🙂 L’installaziun dall’illuminaziun a Pustget ei per dus motivs stada decisiva per questa decisiun. En emprema lingia levan ins buca mulestar ils numerus sponsurs pliras ga per differentas fatschentas. Tut ils sponsurs che han susteniu il project d’illuminaziun vegnan consequentamein menziunai cheu. Da l’auter maun ein ina buna roscha redacturs dil «bènaltè!» vegni clamai el «comite da cazzolas» – sco quei ei cun buna glieud. Quels han per motivs da temps capeivlamein buca vuliu contribuir al «bènaltè!» dad uonn. (Per lur grondiusa contribuziun en favur dall’illuminaziun seigi denton era engraziau! E sche nus essan gest tier quei tema: era la redacziun dil «bènaltè!» ei adina puspei alla tscherca da buna glieud! ;-)) Cunquei che la motivaziun da scriver era avon maun tier tut:tas ei negin «bènaltè!» stau negin’opziun! Aschia ha la redacziun decimada tschercau novas vias e la finfinala realisau en otg l’otgavla ediziun – e secapescha havein nus era nezegiau las novas pusseivladads. Consequentamein anfleis vus buca «mo» texts screts, mobein era contribuziuns en fuorma dad audios e videos. Igl avantatg cheutier: vus stueis buca leger tut sez:zas. 😉 Forsa che quei fatg po cumpensar che vus saveis buca tener enta maun il «bènaltè!» dad uonn.

Sco usitau ei era la sesiun vargada puspei capitau ina massa che duei buca restar el tschellau. Plinavon rapportein nus era da temas generals davos las culissas. Questa ediziun ei dedicada en special a differents temas d’avon, duront e suenter il giug da ballapei – seigi quei sil ni spel plaz. Aschia mirein p.ex. silla preparaziun dalla stad, descrivin scenas dalla cabina che sulettamein las equipas vesan per ordinari, illustrein las emoziuns sin baun da reserva, mo era quellas suenter il giug en fuorma da fiastas. Secapescha anflan era certs «classichers» dil «bènaltè!» plaz en cheu. Aschia astga la top-11 buca muncar – per numnar in exempel.

En quei senn giavischein nus a vus bien divertiment culla lectura dall’otgavla ediziun dil «bènaltè!» e sperein dad era en fuorma digitala saver delectar vus cun nossas contribuziuns. Sin seveser sil ni spel plaz da ballapei e Hop Trun/Rabius!

per la redacziun – Sandro Tomaschett

AVON IL GIUG

  1. Nudar giu lingias – en 30 secundas
  2. Claudio Bundi – il trenader dalla 3. ligia raquenta
  3. Avon il giug en cabina …
  4. Cavazzins ed associaziuns avon la sesiun 2023/2024
  5. 5 aspects avon il giug dall’equipa da giuvnas Team Surselva

da Gino Maissen

da Denis Monn e Patrizio Decurtins

ils 11 da zercladur 2023 

Igl ei las minutas che la tensiun crescha. Cu ins tuorna en cabina suenter il cuorer en. Nus havein rimnau enqual tun e sun da quels muments tensivs avon ch’ei va anavos sil plaz da ballapei per dar il giug.

Metter in microfon en cabina tier in’equipa. Enzatgei che probabel buca tut ils giugadurs e trenaders han bugen. Denton cunquei ch’ei mava en quei davos giug da campiunadi 2022/2023 sil pupi per nuot pli per nossa emprema equipa, eisi buc stau ina gronda caussa da saver tschentar il microfon amiez la cabina a Trun-Pustget. L’affischa quella dumenegia suentermiezdi allas 15:00: CB Trun/Rabius encunter igl FC Landquart. Igl ei las 14:46

Audio 1 – Salvatore conta

Aschia ha nies bien Salvatore Staglianò beneventau il microfon 17 minutas avon ch’el ei ius sil plaz a Pustget a dar siu davos giug da campiunadi per l’emprem’equipa. Ei para sco sch’el hagi gudiu siu davos giug da 3. ligia.

Enzatgei che s’auda tier mintga giug da ballapei ei la controlla digl arbiter. Quellas ein tut tenor arbiter adina in tec differentas. Quei di da zercladur 2023 ha nossa buna federaziun digl OFV denton puspei tertgau da schar vegnir siadora in arbiter da lunsch lunsch naven. Aschia ch’in arbiter da Wittenbach SG ha astgau arbitrar quei giug. Allas 14:49 entra el en cabina ed astga numnar si quels nums romontschs ch’ein per in Songaglies – per part – pulit jasters.

Audio 2 – controlla d’arbiter

Igl arbiter banduna suenter quella procedura immediat la cabina e surlai lezza als giugadurs e trenaders. La cabina s’auda uss cumpleinamein all’equipa. Igl ei ils davos muments avon ch’ei va ora sil plaz. Certs giugadurs sefan aunc bials cun metter si schel da cavels e cun mirar che la mondura, ils parastgeinas ed ils calzers stettien a moda perfetga. Auters vegnan plaunsiu nervus ed ein en ina sort tunnel. Ed igl ei era il mument che trenaders e capitanis prendan aunc inaga il plaid per baghegiar si la tensiun e per far vegnir neunavon quels che ein buc aunc propi cheu cul tgau. 

Tier quei giug eisi lu stau las  las 14:53 cura ch’il trenader Roland Decurtins ed ils capitanis Mathias Flepp e Sandro Orlik han fatg «heiss» l’equipa.  Tier quei giug encunter igl FC Landquart dils 11 da zercladur 2023 ha quei tunau suandontamein.

Audio 3 – plaids avon il giug

Quels plaids avon ils giugs tunan savens semegliont. Con bia ch’ils giugadurs prendan denton si da quellas informaziuns sa denton negin. Fuss probabel da dumandar a mintga giugadur singul. Las 14:57 semetta l’equipa sin via viers il plaz da ballapei…

… Il resultat final da quei giug da campiunadi? 2:5 spiarda il CB Trun/Rabius. Suenter ina solida emprema mesadad va la secunda mesadad pulit ellas caultschas. Hmm, fussi forsa stau da metter da pausa il microfon en cabina?

da Gian Carlo Candinas

da Gino Maissen

da Gino Maissen

da Gino Maissen

da Gino Maissen

da Gino Maissen

da Gino Maissen

da Gino Maissen

da Gino Maissen

La preparaziun d’unviern per la sesiun da ballapei che suonda ei fetg impurtonta. Biars svilups vegnan fatgs en questa fasa. Cunzun la cundiziun e la coordinaziun vegnan baghegiadas si els trenaments avon la sesiun da ballapei. L’equipa sesanfla puspei ed ei vegn luvrau vid la dinamica ell’equipa. Ils trenaders e las trenadras han gia fatg bien e bein patratgs tgei preparaziuns ch’ein aunc da far per che nus giuvnas seigien semtgadas per ils proxims meins da ballapei.

Ils trenaments igl unviern han per gronda part liug en hallas polivalentas. Il trenament consista dad ina vart dad exercezis da cundiziun sco per exempel staffettas, trenaments dad intervals ni differents posts e da l’autra vart dad exercezis da coordinaziun sco per exempel la scala. Tier ils trenaments avon la sesiun s’audan era aunc il camp da trenament (fotografia seniester), il qual l’equipa da giuvnas ha absolviu uonn a Verona ell’Italia. 

Ils trenaments duront la sesiun da ballapei ein mess si auter ch’ils trenaments d’unviern avon la sesiun da ballapei. Cheu mettan il trenader e la trenadra in auter focus ch’aunc avon la sesiun. Tier ils trenaments duront la sesiun da ballapei savein nus ell’equipa reagir sin capacitads muncontas ch’ins ha observau en in giug da campiunadi. Cunquei ch’ils trenaments duront la sesiun han liug sin il plaz da ballapei ordaviert han ins in toc dapli opziuns da trenar. Tier ils trenaments duront la sesiun s’audan exercezis da sittar sin gol (fotografia dretg),exercezis cul bal vid il pei ed era exercezis da pass cun l’entira equipa – sco per exempel staffettas cul bal en differentas formaziuns. 

La sortida la sonda sera avon il giug da campiunadi la dumengia suentermiezdi s’auda bunamein vitier – gest sco il trenament il venderdis sera. Biaras, naturalmein buca tuttas giugaduras, van aunc bugen la sonda sera en sortida. Bia gadas seraduna bunamein l’entira equipa davontier sin la plazza da sault tier ina ni l’autra schinumnada «halla-party». Ina gronda fermezia dall’equipa da giuvnas ei la solidaritad ell’equipa (fotografia giusut). Ir en sortida ensemen ni visitar auters events s’audan era sin il program duront la sesiun da ballapei. Sche l’atmosfera ell’equipa constat era sper il plaz da ballapei, sche rinforzescha quei nossa prestaziun d’equipa sil plaz. 

Il viadi tier il giug da campiunadi ei gest aschi impuronts sco il sescaldar avon il giug. Duront il viadi, seigi quel cuorts ni pli liungs, vegn beinenqual caussa discussiunada, sco per exempel la tabella dalla quarta ligia da giuvnas ni las adversarias (fotografia seniester). Il bia vegnan era las schanzas per quest giug quintadas ed emprems patratgs tactics fatgs. Auter che aspects da ballapei vegnan era la sortida dalla sera avon ni aspects da nossas vetas privatas discussiunai. Il viadi prepara nus sin nies giug da campiunadi d’in maun e per l’autra pren el a nus empau la tensiun che nus savein senza grondas agitaziuns ir en cabina. 

La fasa finala e cun quei las davosas preparaziuns avon in giug da campiunadi han liug en cabina. L’equipa sescomia e sesemtga pil giug. Las giuvnas prendan ora rintgas, cadeinas ni ulteriur fittem. La mondura dall’equipa vegn en funcziun, ils parastgeinas ed ils calzers da ballapei vegnan montai. Vinavon ha ei tier ina ni l’autra giuvna da basegns da far «il tapen» musculaturas (fotografia dretg) ch’ein per part gia lev blessadas ni sco mesira preventiva. En cabina vegn aunc la davosa gada discurriu davart la tactica dil giug ed il trenader e la trenadra animeschan la finfinala l’equipa avon che las giuvnas serendan sil plaz da ballapei.

da Selina Tomaschett

seniors

promoziun da cultura

DURONT IL GIUG

  1. Radio Bagdad – Renzo Albin raquenta …
  2. Avon, duront e suenter pausa al kiosc a Pustget
  3. 5 aspects duront il giug dall’equipa da giuvnas Team Surselva

«Radio Bagdad» – Renzo Albin raquenta …

Renzo Albin, anteriur giugadur e trenader dil CB Trun/Rabius e dall’US Danis/Tavanasa ei enconuschents pil legendar «Radio Bagdad». Co Renzo ei insumma vegnius sill’idea da commentar in giug da bal ficitiv el stil da «Radio Bagdad» udis vus els proxims treis audios.

Audio 1 – Historia dil Radio Bagdad

Audio 2 – Commentari Radio Bagdad 1

Audio 3 – Commentari Radio Bagdad 2

da Mauro Alig

Ord igl archiv

CBTR – ballapei duront corona

commentari da Renzo Albin à la «Radio Bagdad»

Tier ils giugs a casa sco era tier ils giugs ordeifer ha l’equipa da giuvnas adina cun giugaduras sil baun. Nies grond cletg ei che nus havein bia giugaduras che vegnan a dar giugs da campiunadi, achia ch’il trenader e la trenadra han il pensum dad eleger e metter si in’equipa che astga vegnir cun al giug. Quella decisiun fan il trenader e la trenadra dall’equipa biaras gadas duront la sesiun ed adina cun igl interess dall’equipa en egl. Aschia ch’ei sedat enqual gadas ch’il baun da reserva ei bein emplenius (fotografia seniester). Sil baun da reserva vegn il giug da campiunadi obersavaus e surdlunder vegn discussiunau fetg intensiv. Las giugaduras sescauldan ni cargan in’ulteriura gada si las energias per ch’ellas seigien promtas per ina midada.

Il rudi l’entschatta sil plaz da ballapei avon il giug da campiunadi ha ina gronda muntada per noss’equipa (fotografia giusut). Duront il giug da ballapei ei quei il davos mument nua che la capitania ha aunc ina gada la schanza da buglir ensemen l’equipa e motivar tuttas. Tier l’equipa da giuvnas eisi dapi in temps usit che mintgamai ina giugadura raquenta ina sgnocca cuorta. Quei duei prender la tensiun e garantir che las giugaduras sappien ir luccas el giug e propi mussar lur entir potenzial senza gronda nervusadad. 

Biaras gadas eisi per las giugaduras da gronda impurtonza dad aunc saver brattar in dus plaids cun il trenader ni la trenadra avon ch’ir sil plaz da ballapei (fotografia dretg). Il trenader declara aunc ses davos patratgs tier la tactica e la dinamica el giug. La giugadura retila aunc tier il trenader ni la trenadra ils davos tips per duront il giug saver metter entuorn la teoria en la pratica. 

Mintga giug da ballapei ha in auter caracter. Certs giugs ein fetg sperts e dinamics cun paucs cumbats propi corporals denter las giugaduras. Auters giugs ein denton gest il cuntrari. Las giugaduras ston cumbatter per mintga bal ed il contact fisic denter las protagonistas ei fetg gronds (fotografia giusut). Quels giugs da campiunadi cun biars cumbats corporals ein ina gronda stenta – sco ins tgunschamein s’imaginar. Biaras energias vegnan druvadas gia baul il giug e la cundiziun vegn pli e pli pintga cun mintga minuta che varga. 

Il post da tener la bandiera dalla vart dil plaz da ballapei ei tier noss’equipa insumma buca populars. Neginas giugaduras surprendan bugen quei post. Cun grond sforz ed il bia en duas vegnan il trenader e la trenadra da surmenar ina ni l’autra da liquidar quei. Ils motivs per la nunpopularitad da quest post ein fetg differents. Per ina dat ei arbiters che gnanc fan stem da quella persuna cun la bandiera – per exempel vegn la bandiera alzada ed igl arbiter lai tuttina dar vinavon. Quei sa esser fetg frustront ed ins ha il sentiment ch’ins savess gest aschi bein sligiar si quei post en in tal cass. Per l’autra ein las discussiuns sil baun da reserva il bia dètg interessantas ed aschia vul negina voluntariamein ir da tschella vart dil plaz, nua ch’ella sa buc suandar las discussiuns sil baun. 

da Selina Tomaschett

SUENTER IL GIUG

  1. Top-11 da «giugadurs specials»
  2. Tgei fa atgnamein … ?
  3. Fiastas legendaras – regurdientschas dad Otti Steiner, Markus Steiner e Renzo Albin
  4. «Tgi’s e tgei’s» en cabina cull’emprema equipa dil CBTR
  5. 5 aspects suenter il giug dall’equipa da giuvnas Team Surselva

Top-11 dad Armin Albin

Audio – Armin Albin declara sia top-11

da Patrizio Decurtins

Top-11 da Patricia Maissen

Audio – Patricia Maissen declara sia top-11

da Patrizio Decurtins

Fiastas legendaras – Otti e Markus Steiner raquentan …

Otti e Marianne Steiner ein stai per biars onns ils ustiers dall’Ustria Ischi a Trun, era numnada «Tschèser». Duront quels onns han els fatg atras biaras fiastas. Cun agid dil fegl Markus raquenta Otti sias historias da fiastas ch’ein vegnidas festivadas el Tschèser.

Audio 1 – Otti Steiner

Audio 2 – Markus ed Otti Steiner

Audio 3 – DJ Pipo ed ulteriuras historias

Audio 4 – Fiasta d’inauguraziun dil plaz da bal

da Mauro Alig

Fiastas legendaras – Renzo Albin raquenta …

Renzo Albin, anteriur giugadur e trenader dil CB Trun/Rabius e dall’US Danis-Tavanasa raquenta ord sia vesta sur dallas «fiastas legendaras» ch’els han festivau.

Audio 1 – Fiastas legendaras Renzo I

Audio 2 – Fiastas legendaras Renzo II

Audio 3 – Gliendisdis suenter fiastas Renzo

Sche Ti has era festivau ina fiasta cul CB Trun/Rabius ed has interess da raquintar quellas historias, lu astgas bugen s‘annunziar sut benalte@cb-trun-rabius.ch. Engraziel fetg! 

da Mauro Alig

Tgi ha shampoo? 

Ina dallas grondas malsognas tier l’emprema equipa dil CB ei il diember da shampoos per far la duscha. Cun parter ina ni l’autra gada tuorna denton mintgin ord la duscha ch’el freda bein. Bugen vegn lu empermess da prender cun la proxima ga in exemplar. Las empermischuns vegnan denton buca adina tenidas.

Tgi drova il pli bia tape/cremas?

Ozildi per certins bunamein tuttina impurtont sco dad haver ils calzers da ballapei ei il tape ni in etg d’unscher en. Era per far tener ils parastgeinas dat ei differentas praticas. Ferton che certins han che tonscha cun ina socca drovan auters dapli cola d’isolar che biars electricists en in entir onn.

Tgi ei il pli plaun?

Sco dapertut dat ei differentas spertadads. Seigi quei da sescumiar, da far la duscha ni era da far la frisura. Tgi ch’ei denton propi il pli plaun ei grev dad eruir. Cun raquintar siat ga dil gentar ch’ins ei gest vid magunar eis ei naturalmein clar ch’ins sescomia buc aschi spert. In tema ch’ei era fetg populars ei per exempel la sortida vargada. Mo mirar ch’ils trenaders audien nuot da quei…

Tgei calzers toffan il pli fetg?

Prender ord la tescha ils calzers da ballapei caschuna meinsvart tscheras aischas tier in vischin ni l’auter. Oravontut sch’ei ha pluviu duront il davos trenament ni sch’ils calzers han buca viu enzatgei auter ch’il venter dalla tastga entochen il di da giug.

Tgi vegn adina memia tard?

Sche giug a casa ni ordvart emporta buc. In ni l’auter vegn adina memia tard. Las stgisas pil retard ein lu ina megliera che l’autra e contonschan bunamein status da cult. Savens ei la via buca vegnida anflada propi. Stgisas pli ridiculas sco per exempel reparaturas da storas ni servis dalla bognera sesanflan era adina puspei denteren.

Tgi ha buca cun schigentamauns?

Cu in tgil blut vegn ord la duscha sa ei meinsvart esser capitau che la mumma ha buca pachetau il schigentamauns puspei. Sco gia cul savun ha ei era num cheu parter aschi ditg sco ei schigenta aunc. Bugen vegn lu tratg si in l’auter. Cun ina vegliadetgna dad um tschentau munglass la mumma denton buca pli stuer pachetar pil di da giug. 

Tgi sesa nua en cabina?

En cabina da casa ein ils plazs bein reparti, aschia che mintgin sa nua ch’el ha da seplaccar e nua buc. Ordvart ei quei buc aschia e gliez caschuna bunamein in disuorden tiels giugadurs. Per part vegn schizun pretendiu che la situaziun da seser seigi stada responsabla per la terrada. Dapi lu han ins adina schanetg nua ch’ins astga prender plaz.

Tgei plaid fa il capitani?

Avon il giug ei il plaid impurtonts per tgei era adina. Cheu dat ei differentas variantas. Per exempel il favugn cun bia canera e parolas, ils plaids ruasseivels e bein ponderai sco dad in priedi ni era damondas da quiz ch’ein grevas da capir. In capitani haveva dumandau ora l’equipa sin tala moda avon in giug ch’il pli stregn dall’jamna sissu ei buca stau d’absolver ils trenaments, mobein d’emprender plaids romontschs per vegnir ordlunder tier il proxim plaid.

Tgi ha bugen il te da pausa?

La bubronda bein fadegiada da pausa ei buc adina in deletg da beiber. Buca mintga club porscha in te da pausa che gusta ad in e scadin. Naven da te ner ni te da glatsch ord in pac da tetra ha ei dau beinenqual differenta bubronda. Igl ei adina grev da far endretg a mintgin, cunzun sche l’equipa consista d’in bien diember da someliers da te. La fin dil di gusta il te tuttina il meglier a casa a Pustget.

Tgi sto aunc far il basegns?

Sch’igl ei la gnarva ni mo il gentar san ins buca sclarir cumpleinamein. Denton adina puspei capeta ei che odurs monstrusas damognan entochen en cabina. Quei pil displascher dall’entira raspada. Buccas nauschas pretendan aunc oz ch’il club da ballapei dalla Val Puschlav hagi gia stuiu renovar la cabina da hosps el baghetg niev suenter la viseta dil CB.

Adina puspei sun jeu confruntaus culla damonda daco che nus s’entupeien adina aschi baul avon ils giugs. Varga in’ura avon stuein nus serimnar. Cun quels schabetgs descrets cheu sura vegn quella damonda forsa rispundida per in ton. Avon il giug ei buca mo da trer en ils calzers ed allez! Avon mintga singul giug vegn scret ina pintga historia unica. Magari ei quella buca speciala, auters dis capetan denton caussas ch’ins tegn endamen l’entira veta. Forsa eis ei ussa clar a certins daco che nus fagein giu ad uras avon il giug. Dil reminent – cuorer en e sescaldar fagein secapescha era aunc eifer quell’ura plein historias.

da Denis Monn

Suenter il giug da campiunadi ei il di aunc buca diltut alla fin per las giugaduras. Quei sa esser in grond levgiament suenter ina victoria (fotografia sura). La strentga part ei vargada, denton ston las giugaduras aunc ademplir certs pensums avon ch’il di da ballapei ei vargaus. Per ina eisi il pensum dallas giugaduras da rimnar tut las butteglias ch’ein vegnidas repartidas avon il giug entuorn igl entir plaz da ballapei. 

Suenter il giug da campiunadi fan tuttas giugaduras la duscha. Ils calzers da ballapei vegnan gia tratgs ora avon ch’entrar en cabina e tuttina serimna bia miarda en las cabinas; aschia per exempel pastg dil plaz, pflasters ni shampoo. Aschia ch’igl ei era il pensum dallas giuvnas da suenter che la cabina ei vegnida duvrada da schubergiar lezza scosauda. Quei post da schubergiar las cabinas ston il bia las giugaduras surprender che san far sco davosas la duscha – ni las qualas han il pli ditg da far la duscha. Propi las giugaduras che schubregian buca bugen sefestginan da far la duscha. 

Sco schubergiar las cabinas s’auda era il rimnar las monduras vitier. La cabina dall’equipa da giuvnas ei caotica (fotografia giusut). Dapertut ha ei calzers, vestgadira, monduras, soccas da sport, giaccas, bubrondas, snacks e bia auter uorden che las giugaduras drovan pil giug da campiunadi. Cu il giug da campiunadi ei vargaus e tuttas giugaduras han finiu da far la duscha ha ei num: Far uorden! Stediamein han las giugaduras semplamein bess la mondura e las soccas da sport giun plaun, aschia che la giuvna che surpren il post da monduras sto gl’emprem rimnar tut igl uorden e cavigliar quei en la tastga gronda da monduras. La tastga gronda da monduras vegn disponida sin viadi a casa tier la linscharia dalla Casa Depuoz a Trun. La Casa Depuoz fa adina ina super lavur da lavar, sortir e cavigliar nossas monduras pil proxim giug da campiunadi. 

Sil viadi anavos a casa suenter il giug da campiunadi ei l’atmosfera egl auto empau differenta ch’avon il giug. La tensiun ei vargada e las giugaduras ein marcadas dil giug. Forsa ina ni l’autra che ha mal la musculatura ni ei vegnida blessada levet, per exempel cun effusiuns da saung, ina stendida, ina sgurgnada ni cun vischigias. Aschia che biaras giugaduras drovan quei temps dil viadi sco temps da pussar e da sluccar empau il tgierp. Autras ein aunc fetg presentas el giug e discuteschan las acziuns principalas dallas 90 minutas vargadas. 

Sco finiziun d’in di da ballapei mein nus cull’equipa da giuvnas a magliar zatgei. Tier ils giugs da campiunadi ordeifer eisi tier nus bunamein schon tradiziun che nus mein giu Cuera el McDonalds. Quei ei adina ina buna caschun da paterlar e da rinforzar la dinamica ell’equipa. E per l’autra ha il giug da ballapei fatg gronda fom! Tier giugs da campiunadi a casa mein nus sco equipa savens a magliar ell’ustria da Stefano a Trun ni giu Glion a magliar in kebab tiel Kadir. 

Quellas treis impressiuns cun aspects avon, duront e suenter in giug da ballapei dall’equipa da giuvnas duein dar a vus in meglier maletg dil ballapei da giuvnas en Surselva. Igl artechel illustrescha las bunas varts dil ballapei da giuvnas – denter auter il teamspirit, las amicezias e las legras seras da cumpignia sil ni spel plaz da ballapei. 

Il ballapei da giuvnas ei aunc buc avunda derasaus en nossa regiun e quest input duei animar buobas e giuvnas dad entscheiver a dar ballapei en noss’equipa. Forsa fas gest ti beingleiti part da nies cader?

da Selina Tomaschett

Cordial engraziament a tut ils sponsurs per lur generus sustegn!

engraziament e prevista

Preziadas lecturas, preziai lecturs

Cun quest artechel haveis vus contonschiu la fin dil «bènaltè!» 2023. Nus engraziein per vies interess e sperein che nus haveien saviu delectar vus sin ina moda e maniera ni l’autra. Forsa han certs raquents puspei evocau emoziuns en vus – ni silmeins striunau in surrir en vossa fatscha?

Co quella versiun digitala ha plaschiu a vus astgeis vus bugen communicar el formular suandont. Bugen astgeis vus cheu era far paleis vies meini general en caussa «bènaltè!», proponer tematicas per ulteriuras ediziuns e secapescha votar schebein la novavla ediziun duei cumparer en fuorma digitala ni puspei sin pupi. Co quella novavla versiun vesa la finfinala ora – sch’ei dat insumma ella – sto la redacziun haver endamen el decuors digl onn vegnent. Sil pli tard l’entschatta dalla sesiun 2024/2025 veseis vus allura co e cum. 😉

Per finir vi jeu buca munchentar d’engraziar als sponsurs che han susteniu finanzialmein la realisaziun dil project da cazzolas a Pustget, la cumissiun che ha procurau per l’organisaziun da tal, la suprastonza, sco era tut ils ulteriurs gidonters en caussa – e secapescha era alla redacziun per haver giu la curascha dad ir novas vias cun quest’otgavla ediziun dil «bènaltè!».

En quei senn giavischein nus a vus sil ni spel plaz da ballapei ina buna sesiun 2023/2024. Sin seveser sil ni spel plaz da ballapei e Hop Trun/Rabius!

per la redacziun – Sandro Tomaschett