Sisavel giug dalla sesiun 

L’emprema equipa dil CB Trun/Rabius ei stada sin viseta la sonda vargada tier l’equipa da Netstal, en la val Mollis. La regiun ei buc ina jastra; avon in onn ha Armon Orlik astgau festivar cheu il tetel digl ESAF – e cun quei daventaus retg. Il plaz da bal schai sut in grond cuolm ell’umbriva, datier dalla patria e tuttina lunsch naven ei schai il Tödi denter quellas duas vals. Avon il giug ha l’equipa dalla Cadi treis puncts dapli sil conto che Netstal, pia ina buna schanza per far sis puncts ordlunder.  

Duront cuorer en eis ei da s’endisar empau vid il plaz che ha empau ruosnas ed ei malulivs. Mo las cundiziuns ein per omisduas equipas las medemas, munta ei dat neginas stgisas. L’equipa dalla Cadi entscheiva meglier la partida ed ha in pèr bunas cumbinaziuns sur la vart seniastra. En la 6avla minuta ha Mirco Pfister l’emprema tirada sin gol, quei naven da la vart seniastra ordeifer la da sedisch. Ord quella acziun sedat denton negin success, il goli peglia quell’emprova cun omisdus mauns. Quater minutas suenter ha Daniel Lopes ina buna acziun atras il miez nua ch’el vegn mess per tiara ed ei dat in tir liber ordlunder. Quel setta el grad sez, mo ei sedat denton era buc in gol ord quella situaziun. Ella minuta 12 va Netstal cun 1:0 ordavon; il gol per els ei sedaus sur la vart seniastra, ord lur vesta. Silsuenter dat ei bia acziuns sur omisduas varts, mo negina equipa che sa metter in accent impurtont alla partida. Entochen la minuta 27 nua che Netstal survegn in tir liber naven da 5 meters sur la lingia miez. La flanca che resulta ordlunder vegn sittada directamein en la zona malsegira dall’equipa dalla Cadi ed anfla il tgau dad Andrin Wolf che gartegia igl agen gol. Nus scrivin gia la 32avla minuta, in bal liung sur la vart dretga ed ina flanca enamiez che vegn sittada cul tgau porta Netstal cun 3:0 en avantatg. Ina dètga schlepra per l’equipa dalla Cadi ch’ei ussa dumandada, quei vegn era pretendiu dad ina equipa che dat momentan sut siu potenzial. Entochen pausa sedattan denton buc pli grondas acziuns.

Suenter pausa fa Claudio Bundi, il trenader dil CB Trun/Rabius, duas midadas. El porta Nico Caduff per Andri Carigiet ed André Silva per Matia Friberg. Mirar sche quellas midadas portan fretg. Ei va buc ditg; ella 48avla minuta setta l’equipa dalla Cadi siu emprem gol. La flanca da Mirco Pfister anfla il tgau da Gianin Derungs che metta quella beinfatga a casa, sco en ses megliers temps. Otg minutas suenter, pia la 56avla minuta, vegn Gianin Derungs tarmess en la gassa ed il goli da Netstal seglia malfatg en el. Igl arbiter schula sinaquei e muossa sil punct. Il penalti astga Daniel Lopes sittar e quel setta el inschignadamein sin la vart seniastra sut la latta en, il niev stadi intermediar ei 3:2. Quei dat naturalmein curascha all’equipa dalla Cadi che ha era silsuenter bunas schanzas dad egualisar la partida. Mo malgrad en quella buna fasa, piarda l’equipa dalla Cadi en in mument nunusitau silla vart dretga il bal. L’equipa da casa reagescha spert e setta entras in conter il 4:2 ed ei vesa puspei ora pli grev per ils hosps. Quella schlepra han ins era viu vid l’equipa da Claudio Bundi che veva entschiet bein la secunda mesadad. Nus siglin tochen en la 71avla minuta, nua che ina flanca da Gianin seglia vid il maun dad in adversari ed igl arbiter schula directamein il secund penalti pils hosps. Quella gada setta Gianin grad sez naven dad 11 meters e marchescha en medema maniera sco avon Daniel Lopes siu secund gol dalla partida. Il CB Trun/Rabius scursanescha puspei la distanza sin mo in gol differenza (4:3). Silsuenter dat ei puspei schanzas sin omisduas varts. Ils hosps emprovan da dar bal e sittar aunc in ni dus gols e Netstal reagescha sch’ei sedat la pusseivladad. La fin finala semida nuot pli vid il resultat ed ei stat tier il 4:3 per Netstal. Puspei stat quella differenza da mo in gol, denter in remis ni ina sperdita – sco gia quater gadas questa sesiun. La mesjamna ils 30-9 va ei schon vinavon per il CB Trun/Rabius; quella gada a casa a Mutteins encunter Landquart, nua che la finamira ei naturalmein da tener ils treis puncts a casa.