CB Trun/Rabius recaltga proxims puncts

Mesjamna vargada ei l’emprema equipa dil CB Trun/Rabius semiserada cun l’equipa da Cuera97 2 ch’ei seformada per gronda part daniev per questa sesiun. La giuvn’equipa da Cuera porta actualmein la latiarna cotschna en gruppa in dalla tiarza ligia. Per ils da Trun/Rabius, che sesanflan suenter ils emprems quater giugs mo pauc sur il streh da relegaziun, munta ei da tener ils treis puncts a casa e far in pass anavon en la tabella.

Ils sspectaturs vesan en las empremas diesch minutas neginas acziuns prigulusas. Pér en la 11avla minuta, suenter in foul fugus da Lucas Seiler, vegn Cuera tier in culp liber ord buna posiziun. La flanca encunter la zona da puniziun vegn sviada cun bia discletg da Mathias Flepp en igl agen gol tier il 0:1 per ils hosps. 

Suenter quei schoc vegnan ils da Trun/Rabius tier empau dapli acziuns da giug. Aschia vegnan tuts attaccaders dall’equipa da Claudio Bundi en las proximas 15 minutas tier schanzas excellentas, che havessen tuttas stuiu seresultar en in gol. Senza nezegiar gnanc ina da quellas eis ei denton vegniu sco ei ha stuiu vegnir ed ils hosps vegnan cuort suenter empau ord il nuot tier lur secunda occasiun e nezegian quella per marcar il 0:2. Il caucasa ein en general memia lunsch naven digl adversari. En neginas retschas vegnan els da schar ir bein il bal. Cun ina tala prestaziun duront il temps da giug restont, smanatscha la blamascha a Pustget encunter il davos dalla tabella.

Ei cuoza entochen pauc avon pausa ch’il CB vegn suenter ina biala cumbinaziun denter Elia Schmed, Mirco Pfister ed Aurelio Carigiet da marcar igl 1:2 entras Robin Monn.

En cabina para il trenader dall’equipa da casa da ver anflau ils dretgs plaids. Directamein suenter pausa dictescha il CB Trun/Rabius il giug ed aschia seresultan el tact da minuta bunas occasiuns encunter il gol da Cuera97. En la 52avla minuta freina il defensur da Cuera Robin Monn cun in foul en la zona da puniziun. Suenter ponderar in’uriala muossa igl arbiter sin il punct da penalti. Daniel Lopez far buca supplicar duas gadas e nezegia la schanza tier il 2:2 entras igl emprem penalti dalla sesiun per Trun/Rabius. 

Era cun in pari astga il CBTR buc esser cuntents quella sera. Aschia tegnan els ault la pressiun visavi igl adversari e vegnan adina puspei da surmuntar la defensiun. En la 58avla minuta vegn Robin Monn lantschaus cun in bi pass ella gassa da Matia Friberg e marca il 3:2 pil caucasa.

Suenter quei gol ei l’aria lu puspei empau ora tier l’equipa da casa e las gnarvas dils aspectaturs vegnan strapazzadas entochen la fin dil giug. Suenter 93 minutas liberescha igl arbiter tut ils cumpigliai ed ils da Trun/Rabius selegran sur dils proxims treis puncts sin lur conto.

Sco proxim fruntan ils da Trun sonda ils 25. da settember sin l’equipa da Netstal. L’equipa dil cantun Glaruna sesanfla sin il 11avel plaz cun treis puncts.