Il CB Trun/Rabius ha hospitau la sonda vargada tier igl FC Sargans. Igl adversari era partius ferm ella sesiun ed haveva gia recaltgau ord ils emprems treis giugs siat puncts. L’equipa dalla Cadi ha perencunter saviu gudignar tochen dacheu mo in da ses treis giugs.
Il giug dalla sonda suentermiezdi ha entschiet ruasseivlamein e cun paucas caschuns da gol. Muort las grevas relaziuns dil plaz eis ei ad omisduas equipas all’entschatta buca reussiu da schar circular schuber il bal. Cugl augment dil temps da giug ha il CB Trun/Rabius anflau meglier el giug ed ei vegnius tier empremas pusseivladads. Deplorablamein han quellas buca saviu vegnir nezegiadas per ir en avantatg. Encunter la fin dall’emprema mesadad ei Sargans vegnius pli ferms ed ha marcau cuort avon pausa igl 1:0. Suenter ina cumbinaziun sur il miez ei in attaccader vegnius tarmess persuls avon il gol, nua ch’el ha mo aunc stuiu stuschar il bal en gol.
Suenter la midada da vart leva il CB Trun/Rabius mussar ina reacziun. Quei ei era reussiu all’equipa dalla Cadi ellas empremas 20 minutas dalla secunda mesadad. Las schanzas han denton buca saviu vegnir nezegiadas, cunquei ch’il goli da Sargans ha fatg enzacontas bunas paradas per liberar il gol. La 65avla minuta ha Sargans augmentau suenter in corner al 2:0, suenter ch’il bal ha buc pudiu vegnir sclarius consequentamein en la zona da penalti.
Rodund diesch minutas pli tard gartegia al CB Trun/Rabius igl emprem gol. Daniel Caldeira ha dau in corner directamein sin gol e cun empau sustegn dil goli dils adversaris ei il bal setschentaus ella reit. L’equipa dalla Cadi ha silsuenter buca saviu marcar in gol malgrad ulteriuras schanzas. El temps supplementar ha Sargans fatg tut clar entras Pablo Müller cul 3:1. Il CB Trun/Rabius ha denton aunc buca dau suenter ed empruau vinavon da far squetsch. Daniel Caldeira ei aunc inagada vegnius tier ina finiziun ed ha mess il bal el cantun liung. Per dapli ha ei denton buca pli tunschiu – il giug ei ius a fin cun ina stretga terrada da 3:2.
Suenter quella prestaziun plitost mediocra dil CB Trun/Rabius sesanflan el ussa sil 10avel plaz dalla tabella. Gia mesjamna sera seporscha alla squadra la proxima caschun da recaltgar puncts. A casa frunta ella sin la secunda da Cuera 97 ch’ei actualmein alla cua dalla tabella.
informaziuns: 3. ligia, gruppa 1; FC Sargans : CB Trun/Rabius Grp. 3:2 (1:0)
gols: 35’ Jerome Lamm, 65’ Sven Mathias, 75’ Daniel Caldeira, 90+2 Pablo Müller, 90+4 Daniel Caldeira
CB Trun/Rabius 1: Livio Lozza, Elia Schmed, Lucas Seiler, Mathias Flepp, Andrin Wolf, Mirco Pfister, Matia Friberg, Nico Caduff, Robin Monn, Daniel Caldeira Lopez, Maico Lutz
reservas: Aurelio Carigiet, Andri Carigiet, Livio Vincenz, Gion Decurtins
remarcas: CB Trun/Rabius senza Silvan Muoth, Roel Schmed, Nic Culan Jacomet, Tizian Duff, Orlando Monn, Patrizio Decurtins, Matteo Bergamin, Enea Decurtins, Denis Monn, Manuel Silva