Mesjamna vargada ei l’emprema equipa dil CB Trun/Rabius semesirada cun l’equipa dad Uznach, ch’ei ina dallas novas equipas en gruppa 1 dalla tiarza ligia. Ils da Trun/Rabius vulan mussar ina reacziun sin la terrada dalla fin d’jamna vargada e recaltgar ils emprems puncts.
Gia naven dall’entschatta ei clar che Claudio Bundi ha tschentau en l’equipa sin attaccar igl adversari baul ed aschia vegn Maico Lutz gia suenter ina minuta tier igl emprem siet sin gol. Mo sis minutas pli tard vegn il CB tier in culp liber ord biebein 20 meters. Cun in siet ord il cudisch plazzescha Daniel Lopez il bal exact en il cantun dil gol e marca cun quei igl 1:0 per l’equipa da casa.
Trun/Rabius vegn era vinavon tier bunas occasiuns d’alzar il resultat. Neginas da quellas portan denton fretg. Aschia vegn Uznach empau ord il nuot en la 19avla minuta cun in siet da dumengias tier il 1:1. Livio Lozza che sutschazegia il bal e sto schar mitschar quel en sia reit.
En la 22avla minuta egalisescha Uznach en caussa sbagls individuals ed in bal dalla defensiun setschenta directamein avon ils peis da Maico Lutz. Cun in siet en il cantun cuort reussescha ei da marcar il 2:1. Pia duei la direcziun giavischada puspei esser dada.
Entochen pausa vesan ils aspectaturs ina equipa da casa che piarda empau la controlla dil giug e lai vegnir igl adversari nunnecessariamein tier ina duas bunas occasiuns. Lez vegn denton buca da trer in profit ord quellas.
In quart d’ura suenter pausa fan ils hosps dad Uznach il proxim schenghetg als da Trun/Rabius. Daniel Lopez vegn tier in bal rebattiu ord las retschas dil hosp. Cun bia sentiment reussescha ei ad el da menar il bal elegantamein sur il goli ora e da marcar il 3:1.
Suenter il tierz gol muossa l’equipa da casa denton puspei ina fasa pli fleivla e selai per part en sin discussiuns ed acziuns senza senn. Aschia piardan els sco era avon pausa puspei empau la controlla dil giug.
Prigulus sin il gol dils adversaris vegn ei denton pér puspei en la 86avla minuta, cu Lucas Seiler liberescha in bal ord biebein 60 meters. Péz a cup croda quel buca sur il goli dad Uznach. Cuort suenter vegnan ils da Trun/Rabius aunc inaga tier ina corna. Quella vegn sittada da Daniel Lopez ed anfla suenter ina sviada Aurelio Carigiet. Ad el reussescha ei da marcar il 4:1 ed aschia decider il giug dil tuttafatg.
La reacziun giavischada ei gartegiada ed ils emprems puncts ein a schetg. Malgrad fasas pli fleivlas e certas hecticas duront il giug muossa il CB ina buna prestaziun a Pustget. Gia ils 25 d’uost va ei vinavon pils da Trun cun ina jamna englesa. Il mardis frunta Trun/Rabius sin Cuera97 en rama dalla cuppa grischuna. La sonda va ei vinavon cun la proxima sfida en tiarza ligia, numnadamein encunter igl FC Rapperswil Jona ch’ei era novs en gruppa 1.
CB Trun/Rabius: Livio Lozza, Mirco Pfister, Mathias Flepp, Lucas Seiler, Andre Silva, Mattia Friberg, Aurelio Carigiet, Daniel Lopez, Nico Caduff, Robin Monn, Maico Lutz
reservas: Andrin Wolf, Andri Carigiet, Patrizio Decurtins, Joao Vitor Tome dos Santos, Livio Vincenz, Enea Decurtins
absenzas: Matteo Bergamin, Orlando Monn, Silvan Muoth, Nic Culan Jacomet, Tizian duff, Denis Monn, Rafael Tome dos Santos, Rovin Schmed, Elia Schmed