Cumenzau il campiunadi senza success

Suenter ils usitai giugs da preparaziun sco era il success en la cuppa svizra entscheiva il mintgadi da campiunadi pil CB Trun/Rabius cun in giug da casa. La giuvna equipa da Claudio Bundi frunta sin il FC Triesenberg che ha saviu rinforzar l’equipa duront la stad vargada cun enqual niev giugadur. Pia ina dira nusch sco entschatta dil campiunadi.

Il giug semuossa all’entschatta da sia ruasseivla vart. Suenter biebein diesch minutas han ils da Trun/Rabius denton cletg ch’igl arbiter schula buca in penalti pils hosps suenter in clar foul encunter igl attaccader da Triesenberg. Cuort suenter quella scena critica anfla in bellezia siet da Daniel Lopez mo la traversa dil gol ed il CB ei aschia era vegnius tier sia emprema pusseivladad dad ir en avantatg. Ils aspectaturs ston denton spitgar in’uriala entochen che la proxima schanza a favur dalla equipa da casa vegn. Era quella vegn puspei da Daniel Lopez, che tucca cun massa discletg per la secunda gada mo la traversa dil hosp. Cuort suenter in dus ulteriurs siets da Trun, che portan denton negin prighel pli grond, supplichescha igl arbiter las equipas en las cabinas per la pausa.

Suenter pausa vegn l’equipa da Triesenberg meglier ord cabina e sa en la 53avla minuta profitar d’in sbagl collectiv dil CB. Suenter ina sperdita dil bal amiez il plaz ed ina sperta cunterattacca vegnan els da marcar il 0:1. Quei malgrad che Livio Lozza tegn aunc miraculus igl emprem siet digl attaccader. Il secund siet ha el denton buca pli schanza da sviar naven dil gol.

Cun il buordi da 0:1 si dies ston ils da Trun/Rabius mussar ina reacziun. Quella stat denton per gronda part ora. Cuntrari eis ei plitost ils hosps, che vegnan tier ulteriuras schanzas suenter cunterattaccas. Il giug ha denton liug per gronda part ordeifer dallas zonas da puniziun ed ils aspectaturs vesan aschia plitost paucas schanzas da vaglia. Ei cuoza entochen la 73avla minuta ch’ils da Triesenberg vegnan da marcar il 0:2, puspei vegnan ils da Trun/Rabius strufegiai cun in cuntergol suenter ina cunterattacca.

Suenter il resultat da 0:2 vesan ils aspectaturs duas equipas che neutraliseschan pli u meins ina l’autra. Sco ins di bugen: ils ins ston buca pli ed ils auters san buca pli. Cun ina prestaziun solida dalla defensiun da Triesenberg vegnan ils giugadurs da Claudio Bundi buca pli tier grondas schanzas ed il giug finescha cun 0:2 senza success per l’equipa da casa.

Tut en tut havess saviu scher en oz in ni l’auter punct pil CB Trun/Rabius. Suenter pausa han ils hosps denton nezegiau meglier las schanzas ed aschia priu cun tut ils puncts ord la Surselva. Pils da Trun/Rabius vala ei dad emblidar la terrada aschi spert sco pusseivel e seconcentrar sin il proxim giug da casa che ha liug mesjamna proxima encunter l’equipa dad Uznach.