Fa l’emprema equipa il proxim pass? Senta la secund’equipa enzacu la vegliadetgna? E vegn il cau da juniors puspei d’anflar avunda arbiters e grilleurs per ses numerus turniers? Per la redacziun dil «bènaltè!» datti mintg’onn numerusas pusseivladads co emplenir las paginas.
Historias da success, muments emoziunals, persunas engaschadas e bialas regurdientschas dat ei avunda. Tuttina havein nus priu la decisiun da prender in’autra perspectiva per quella 11avla ediziun. Nus havein buca mo vuliu mirar anavos, mobein oravontut anavon. Il futur ei in tema che fascinescha, provochescha e sveglia marveglias.
Tgei midadas spetgan nies club ils proxims onns? Co influenzescha l’intelligenza artificiala era in club regiunal sco il CB Trun/Rabius? Co savess nossa infrastructura semidar? Tgei siemis e visiuns han giugadurAs, trenaderAs e funcziunariAs? E co ein ils trenaments gia semidai ils davos onns – e tgei svilups stattan aunc avon nus?
Fatg ei: Il futur ei buca screts en crap. El vegn formaus dallas persunas che s’engaschan di per di pil club – sil plaz, sper il plaz ed era davos las culissas. Mintga trenament, mintga giug, mintga funcziunariA e mintga voluntariA contribuescha in toc alla historia dil CB Trun/Rabius.
Nus sperein che quell’ediziun dil «bènaltè!» detti impuls, fetschi ponderar e magari era semiar in tec. Pertgei senza visiuns dat ei negin svilup – e senza persunas che stattan ensemen per in club dat ei era negin futur. En quei senn giavischein nus a Vus buna lectura e bien divertiment culla 11avla ediziun dil «bènaltè!».
Il «bènaltè!» 2026 en fuorma da PDF saveis vus telecargar cheu.