Il CB Trun/Rabius ha terminau la sesiun da 3. ligia cun ina petra terrada encunter igl FC Mels. Malgrad in avantatg da 3:0 suenter l’emprema mesadad han ils Sursilvans stuiu schar ir ils treis puncts ed han spiars 3:4. Cun ina victoria havess l’equipa dalla Cadi saviu serrar giu la sesiun sil tschunavel plaz; uss terminescha ella sin il siatavel rang.
Avon il giug han ils juniors F ed E dalla Cadi che havevan gudignau il Menzli Cup accumpignau ils giugadurs sin il plaz e retschiert ina cuorta gratulaziun. Da bial’aura ed avon il publicum da casa han ils indigens lu entschiet il giug cun bia slontsch.
Il CB Trun/Rabius ha dominau l’emprema mesadad cun in ballapei cultivau e numerusas schanzas. Ella 21avla minuta ha Nico Caduff mess in pass exact el miez sin Gianin Derungs che ha stuschau il bal sur la lingia per il meritau 1:0. Per Derungs che ha giugau siu davos giug da campiunadi ei quei stau in mument tut special.
Mo duas minutas pli tard ha Robin Monn augmentau sin 2:0. Suenter esser semess atras encunter la defensiun adversaria ha el plazzau il bal el cantun liung. Il CB Trun/Rabius ha vinavon fatg squetsch e teniu il giug sut controlla. Suenter ina biala cumbinaziun ha Daniel Lopez dau in scharf pass sin Robin Monn e lez ha puspei menau suveran il bal ella reit dil gol. Cun quei clar avantatg ein las duas equipas idas ella pausa.
Suenter pausa ei il giug denton midaus cumpleinamein. Las tschun midadas da giugadurs han disturbau empau il ritmus dils indigens, ferton che Mels ha augmentau la pressiun. Ils hosps han profitau da malsegirtads dils dalla Cadi e reduciu il resultat e cuort suenter han els gia procurau per l’egualisaziun.
Amiez quella fasa difficila ha Gianin Derungs survegniu ina commuentonta ovaziun. Cura ch’el ei vegnius remplazzaus ella 55avla minuta han ses congiugadurs purtau el sin in tron ord il plaz sco engraziament per sia liunga carriera.
In punct pareva aunc segirs, denton pauc avon la fin han ils hosps marcau il gol decisiv e gudignau la partida.
Malgrad quella terrada resta il facit dalla runda da primavera positivs. Il CB Trun/Rabius ha mussau bunas prestaziuns e sa mirar anavos sin ina sesiun reussida che finescha cul siatavel plaz ella tabella.
informaziuns: 3. ligia, gruppa 1; CB Trun/Rabius vs. FC Mels 3:4 (3:0)
gols: 21’ Gianin Derungs 23’ Robin Monn 32’ Robin Monn 51’ Olsi Mehmetaj 60’ Luca Bleisch 67’ Veton Aliji 70’ Robin Lymann
CB Trun/Rabius 1: Livio Lozza, Elia Schmed, Lucas Seiler, Mathias Flepp, Andre Da Silva, Mirco Pfister, Enea Decurtins, Nico Caduff, Robin Monn, Daniel Lopez, Gianin Derungs
reservas: Toni Cathomas, Denis Monn, Aurelio Carigiet, Andrin Wolf, Andri Carigiet, Aurelio Carigiet, Matia Friberg
remarcas: CB Trun/Rabius senza: Silvan Muoth, Roel Schmed, Nic Culan Jacomet, Tizian Duff, Orlando Monn, Patrizio Decurtins, Matteo Bergamin