Ulteriura victoria per CB Trun/Rabius

La dumengia vargada ha Trun/Rabius gudignau il giug da casa encunter Domat e resta cun quels treis puncts definitivamein en tiarza ligia. Aschia sa l’equipa ir senza squetsch el giug ordeifer encunter Gams che sesanfla quater puncts davon ils Sursilvans. 

Da bellezia aura entscheiva Trun/Rabius fetg animau il giug e fa squetsch sin la defensiun da Gams. Ell’otgavla minuta piarda il davos um dil caucasa il bal e Gianin Derungs sa trer encunter il gol. En sia tipica maniera lai el aunc selischnar in defensur el vit e setta il bal suveran ellas maschas. Ils aspectaturs ein aunc vid analisar la scena ch’in defensur da Gams fa puspei in sbagl fatal. Quella ga metscha Nico Caduff ed era lez plazzescha il bal cun saung freid el cantun liung – 0:2 suenter gnanc 10 minutas. Trun/Rabius smacca vinavon, mo savens maunca il davos pass. Plaunsiu ei era l’equipa da Gams serevegnida dil schoc e vegn tier enqual schanza. Igl attaccader Loris Scherzinger profitescha dad ina malprecauziun ella defensiun e scursanescha sin 1:2. Suenter quei gol sesviluppescha in giug aviert cun bunas caschuns sin domisduas varts. Auter ch’in gol entras Aurelio Carigiet che vegn annulaus muort ina posiziun dad offside crodan denton negins gols pli entochen pausa. 

Suenter pausa surpren Trun/Rabius beinspert la bitgetta dil giug e vegn tier entginas bunas occasiuns. Ella 59avla minuta anfla Enea Decurtins bia spazi amiez il plaz e dat in bi pass ella gassa sin Gianin Derungs. Lez varga cun dus crutschs il defensur e marca ord 18 meters siu secund gol dil di. Igl 1:3 para dad esser la decisiun en quei giug. Mo suenter dus schenghetgs dalla defensiun da Gams fa era Trun/Rabius in sbagl el giug anavon e Gams sa lantschar in conter. Negjip Qengaj siara giu quel freidamein e procura ella 66avla minuta aunc inaga per tensiun. L’equipa dalla Cadi lai denton buca stermentar e vegn cuort suenter tier in siet ella petga entras Toni Cathomas. La scena va vinavon e Toni Cathomas vegn aunc inaga vid il bal. El dat in pass ella da sedisch sin Toni Risch, il qual semeina entuorn il defensur e marca siu emprem gol en tiarza ligia. Quella coproducziun dils Tonis tiel 2:4 ha ussa definitivamein priu la speronza all‘equipa da casa dad aunc recaltgar in punct. Gams vegn ellas davosas minutas dil giug strusch pli datier dil gol da Livio Lozza. Ils Sursilvans han perencunter aunc entginas caschuns, mo in gol vul buca pli gartegiar.

La giuvna equipa da Trun/Rabius ha sur ina gronda part dil giug mussau ina ferma prestaziun e gudignau meritadamein. Ella tabella sesanfla l’equipa ussa cun 30 puncts sil sisavel rang e mo pli in punct davos Gams. Cun treis puncts la sonda proxima a casa encunter Mels ha Trun/Rabius la caschun da serrar giu la sesiun sil tschunavel rang, tgei che fuss grondius!