Damai ch’era il mender tierz-davos dalla tiarza ligia sto tgunsch far il pass en quarta ligia drova il CB Trun/Rabius aunc treis puncts per era matematicamein mitschar dalla relegaziun. Encunter la secunda equipa da Domat che ha sulettamein in punct dapli che l’equipa dalla Cadi seporscha la dumengia suentermiezdi a Pustget ina buna schanza.
Da bellezi’aura e temperaturas da varga 30 grads dat igl arbiter liber il 20avel giug dalla sesiun. Gia suenter 5 minutas suonda ina duscha freida per l’equipa da casa. In culp liber da Domat ord liunga distanza anfla la fin finala il pei d’in hosp che ha neginas miserias da marcar il 0:1. La reacziun da Trun/Rabius vegn vehement e las proximas 20 minutas suonda ina caschun sin l’autra. Robin Monn vegn duas gadas da sittar ord buna posiziun, tucca denton inaga la petga e l’autra ga parescha il ferm goli da Domat. Era Gianin Derungs ed Elia Schmed vegnan suenter bialas cumbinaziuns buca da surmuntar il goli. Ella 29avla seresulta il squetsch dil caucasa lu finalmein en in gol. Gianin Derungs dat in pass sil‘ala a Robin Monn, lez meina ora in defensur e survescha il bal a siu frar Denis che setta quel directamein el cantun liung. Schegie ch’il caucasa vegn aunc tier ulteriuras caschuns van las equipas cun il resultat dad 1:1 ella pausa.
Suenter pausa surpren Domat la bitgetta e lai circular meglier il bal. Denton san era ils hosps buca nezegiar las schanzas. Ella 57avla minuta vegn il caucasa tier in culp liber ord buna posiziun. Il siet da Robin Monn vegn sviaus e setschenta avon ils peis dad André Silva che plazzescha il bal bein ponderau el cantun liung. Igl emprem gol d’il Portughes che gioga dapi la primavera per Trun/Rabius munglass ussa dar segirtad, mo ei vegn tut auter. L’equipa dalla Cadi gioga hectic e piarda bia bals nunnecessaris. Aschia cuoza ei buc ditg ch’il 2:2 croda. In gol dispiteivel cunquei ch’igl attaccader ha tuccau il bal cul maun. Silsuenter suonda ina fasa cun massa schanzas sin domisduas varts. Ina da quellas nezegia Toni Cathomas ella 72avla minuta cun in volley sur il goli ora e marca aschia il 3:2 per Trun/Rabius. Domat betta ussa tut anavon, denton mussa Livio Lozza ina ferma prestaziun e tegn tut ils siets che vegnan sin siu gol. Muort las largias ella defensiun vegn Trun/Rabius aunc tier entginas cunterattaccas. André Silva tucca inaga la traversa ed inaga la petga. Ella davosa minuta cuora Livio Vincenz persuls enviers gol e vegn frenaus dad in defensur da Domat che vesa persuenter la carta cotschna. Il culp liber che setschenta els mauns dil goli ei lu la davos’acziun dil giug. Ina impurtonta victoria per Trun/Rabius che ha cunzun avon pausa giugau fetg ferm ed aschia segirau da restar en tiarza ligia.
gols: 5‘ 0:1 Domat, 29‘ 1:1 Denis Monn, 57‘ 2:1 André Silva, 63‘ 2:2 Domat, 72‘ 3:2 Toni Cathomas
formaziun: Livio Lozza; Andrin Wolf, Mathias Flepp, Lucas Seiler, Elia Schmed; Aurelio Carigiet, Mirco Pfister; Robin Monn, Denis Monn, Nico Caduff; Gianin Derungs
reservas: Rovin Schmed, Toni Cathomas, Livio Vincenz, André Silva, Andri Carigiet, Matia Friberg