En ina partida cun temperaturas plitost freidas ha il CB Trun/Rabius mussau in ferm caracter e priu cun ina meritada victoria da 0:2 treis impurtonts puncts da Triesenberg.
L’entschatta dalla partida ei stada plitost equilibrada, denton cun mintga minuta ha l’equipa dalla Cadi anflau meglier el giug. Ella 20avla minuta ha Daniel Lopez dau gl’emprem segn offensiv cun ina gronda caschun, la quala il goli da Triesenberg ha denton aunc saviu impedir. Mo ina minuta pli tard ha il CB Trun/Rabius tuttina tuccau il gol: suenter ina bein battida corna dad André Silva ha Mathias Flepp marcau igl emprem gol per ils Sursilvans cul tgau. Il CB Trun/Rabius ha silsuenter controllau il giug; la 30 avla minuta eis ei denton aunc vegniu tier ina malsegira acziun avon il gol dils Sursilvans. Suenter in prigulusa attacca da Triesenberg ha Aurelio Carigiet reagiu ferm e spindrau il bal gest avon la lingia da gol.
Era suenter pausa ei la squadra dalla Surselva restada la pli activa. Ella 58avla minuta ha Robin Monn sittau in ferm siet da distanza ch’ei denton mo ius ella petga. La risposta ei denton suandada spert. Mo tschun minutas pli tard ha Daniel Lopez dau in exact pass ella gassa sin Robin Monn, il qual ha mess quel cun saung freid ella reit. Aschia ein ils Sursilvans i cun 0:2 en avantatg. Triesenberg ha empruau da vegnir anavos ella partida ed ha aunc giu ina buna schanza cun in culp liber ella 71avla minuta. Denton era quella gada ei il bal mo ius ella petga dil CB Trun/Rabius.
Cun bia cumbat, disciplina e buna lavur da squadra ha il CB Trun/Rabius finalmein saviu festivar ina meritada victoria ordeifer. Ussa spetga gia il proxim punct culminont: il derbi encunter l’US Schluein/Ilanz.
CB Trun/Rabius: Livio Lozza, Lucas Seiler, Mathias Flepp, Elia Schmed, Aurelio Carigiet, Matia Friberg, Rovin Schmed, Denis Monn, André Silva, Nico Caduff, Daniel Lopez
reservas: Livio Vincenz, Enea Decurtins, Robin Monn, Andri Carigiet, Samuel Flepp