Per il sisavel giug dalla runda da primavera ha la squadra dil CB Trun/Rabius giugau a Mutteins encunter l’equipa da Walenstadt al di dallas mummas.
L’equipa giuvna dalla Cadi ha entschiet meglier la partida e controllau il giug duront las empremas minutas. Tuttina ei ella novavla minuta capitau in sbagl ella defensiun dil CB Trun/Rabius – quei suenter ina malcapientscha. In attaccader da Walenstadt ha saviu profitar da quella situaziun ed ei persuls avon il goli Livio Lozza e marca il 0:1. La squadra da casa ha denton buca schau pender ils tgaus ed ei vegnida bein anavos el giug. Entochen pausa ei la partida stada plitost equilibrada, cun caschuns sin omisduas varts.
Suenter il te da pausa ha il CB Trun/Rabius mussau ina buna reacziun. Ella 56avla minuta ha Gianin Derungs mess il goli da Walenstadt sut squetsch, aschia che la balla ei arrivada tier Nico Caduff, il qual ha marcau il meritau 1:1. Mo tschun minutas pli tard ha Nico Caduff schizun saviu marcar siu secund gol dalla sera. Suenter in bi pass dad André Silva ha el terminau cun segirtad al 2:1. Walenstadt ha empruau silsuenter da turnar anavos el giug, mo l’equipa dalla Surselva ha defendiu cun grond engaschi e buca pli lubiu bia. Aschia ei la partida ida a fin cun ina victoria meritada da 2:1 pil CB Trun/Rabius.
L’equipa giuvna dalla Cadi, cun siat giugadurs che havessen aunc la pusseivladad da giugar tier ils juniors A, ha mussau ina fetg ferma prestaziun e sa far in ulteriur pass anavon ella tabella. Per il proxim giug spetga gia la proxima sfida ordeifer encunter Triesenberg.
CB Trun/Rabius: Livio Lozza; Andrin Wolf, Mathias Flepp, Lucas Seiler, Elia Schmed, Aurelio Carigiet, Matia Friberg, Enea Decurtins, Andri Carigiet, Nico Caduff, Gianin Derungs
reservas: Denis Monn, Rovin Schmed, Toni Cathomas, Livio Vincenz, Mirco Pfister, Sandro Venzin, André Silva