Schliata prestaziun a Sevelen

Per il 16avel giug dalla stagiun ei il CB Trun/Rabius serendius la dumengia tier la latiarna cotschna dalla tabella a Sevelen. Il caucasa che ha sulettamein treis puncts sil conto sto bunamein gudignar per mantener la speronza da mitschar dalla relegaziun. Il CB sa cun treis puncts vargar Domat ella tabella e vinavon sedistaccar dalla cua. 

Ils hosps dalla Cadi entscheivan bein il giug e laian circular il bal atras las atgnas retschas. Auter che dus siets da distanza seresultan denton neginas schanzas malsegiras. Suenter diesch minutas vegn Sevelen l’emprema ga avon gol da Livio Lozza, ei maunca denton era l’exactadad tiel davos pass. Silsuenter piarda Trun/Rabius il fil e s’adattescha al tempo da Sevelen. Ei suonda ina fasa cun massa sbagls sin omisduas varts e strusch scenas da gol. Sevelen emprova cun bals liungs da vegnir malsegirs, denton ha la defensiun tut sut controlla. Il trenader dils hosps, Claudio Bundi, ei insumma buca cuntents cun la prestaziun da sia offensiva e mida gia avon pausa treis gadas. Quellas midadas dattan in tec slontsch ad il giug e cuort avon pausa vegn il CB aunc tier ina buna acziun. In siet da Robin Monn vegn spindraus entras in defensur da Sevelen sin lingia ed il siet suandont da Matia Friberg munchenta la finamira per pauc. Aschia van las equipas cun in 0:0 ella pausa.

Il trenader para da haver anflau ils dretg plaids ella cabina e Trun/Rabius vegn enteifer cuort temps tier pliras schanzas. Ina da quellas sa Gianin Derungs nezegiar ella 54avla minuta e marca il 0:1 cun in siet cul péz el cantun bass ord 16 meters. Il CB smacca ussa sil secund gol e vegn tier duas bunas occasiuns entras Enea Decurtins e Gianin Derungs. Il goli da Sevelen vegn denton da parar omisdus siets. Suenter quellas schanzas va il tempo dil giug puspei a piarder ed ei va vinavon sco avon pausa. Malgrad il resultat stretg han ins denton buc il sentiment ch’il caucasa possi marcar in gol en quei giug. Memia paucas ideas anavon e memia stabila para la defensiun dils dalla Cadi. Cunquei che era Livio Vincenz suenter ina biala combinaziun ed Andri Carigiet cun in siet vegnan buca dad alzar il resultat quentan tuts ch’il giug mondi a fin cun 0:1. Sevelen setta ella secunda minuta dil temps da puniziun aunc inaga in bal liung ella da sedisch e per ver setschenta il bal suenter in smugl ella reit. Il schoc sesa profund e Trun/Rabius vegn buca pli da reagir aschia ch‘il giug va a fin cul resultat dad 1:1. Dus puncts spiars en ina moda e maniera absolutamein nunnecessaria encunter in fetg fleivel adversari. Uss vala ei da mussar ina reacziun sin quella prestaziun el giug da casa a Tavanasa encunter Walenstadt la proxima dumengia.