Il CB Trun/Rabius ha giugau il tierz giug dalla primavera ordeifer a Sargans encunter il capo-gruppa.
Cunquei che Sargans sesanfla sigl emprem plaz ella tabella havevan ils Sursilvans nuot da spiarder. Il giug ha entschiet cun squetsch da vart da Sargans. Suenter gia 8 minutas ein els aschia vegni da marcar igl 1:0. Ils giugadurs dil CB Trun/Rabius han denton buc schau pender ils tgaus ed empruau dad egualisar il giug. Ei ha dau entginas schanzas per omisduas equipas. Ella 26avla minuta vesa Nico Caduff ch’il goli digl adversari ei buc posiziunaus bein e setta aschia cun in siet ord la distanza il bal ella reit. Aschia ein ils Sursilvans puspei anavos el giug. Tochen pausa ei il giug staus pli u meins ulivs.
Suenter la pausa ei Trun/Rabius turnaus cun bien slontsch ord cabina. Gia suenter paucas minutas vegn Mirco Pfister tier in bien siet, denton ha quel tuccau mo la petga. Era Nico Caduff ei vegnius aunc inaga en ina buna posiziun, mo il bal ei ius encunter la traversa. Sinaquei ei igl adversari vegnius empau pli ferms ed ha procurau per zacontas scenas prigulusas. Ella 75avla minuta ha Lunik Iseni marcau il gol decisiv per ils indigens – siu secund dil giug – e fixau il resultat sin 2:1. En la fasa finala ha Trun/Rabius empruau da reagir ed aunc fatg pressiun sin la defensiun dils adversaris. Matteo Bergamin ha schizun tuccau per la tiarza ga il metal dil gol, mo il pari ei buca pli reussius. Aschia finescha il giug cun ina stretga terrada da 2:1 en favur dil capo-gruppa.
Il CB Trun/Rabius ha cun ina buna prestaziun giugau in ferm giug encunter il leader ed havess meritau silmeins in punct.
Ussa ston els mirar anavon sil giug dalla proxima sonda el derbi encunter ils Lumnezians che sesanflan ella tabella in plaz davon Trun/Rabius.
informaziuns: 3. ligia, gruppa 1; FC Sargans vs. CB Trun/Rabius 2:1 (1:1)
gols: 57’ Orlando Monn, 65’ Zoran Manojlovic
CB Trun/Rabius 1: Samuel Flepp, Elia Schmed, Lucas Seiler, Mathias Flepp (C), Orlando Monn, Rovin Schmed, Matia Friberg, Nico Caduff, Robin Monn, Mirco Pfister, Gianin Decurtins
reservas: Matteo Bergamin, Enea Decurtins, Toni Cathomas, Denis Monn, Patrizio Decutins, Aurelio Carigiet
remarcas: CB Trun/Rabius senza: Andrin Wolf, Silvan Muoth, Roel Schmed, Nic Culan Jacomet, Tizian Duff, Livio Lozza, Andre Canas Da Silva, Daniel Lopez, Andri Carigiet