Ils 9 d’uost 2025 ha giu liug igl emprem «Di da ballapei» organisaus dils treis clubs dalla Cadi – CB Sedrun-Mustér, CB Trun/Rabius e l’US Danis-Tavanasa. Cun grond plascher havein nus astgau beneventar totalmein 66 affons e giuvenils quei di a Sedrun – in grondius diember da participontAs.
Suenter haver retschiert ina mondura da trenar (sponsurada dad Intersport Curschellas) ed in pèr cuortas informaziuns ein ils affons e giuvenils vegni parti en gruppas tenor vegliadetgna. Igl avonmiezdi ed ina part dil suentermiezdi han els empriu en siat posts la diversitad dil ballapei – naven dalla posiziun da goli, exercezis tecnics e tactics tochen al sittar sin gol. Silsuenter ha giu liug in pign turnier pils affons e plirs giugs pils giuvenils.
Pil bien gartetg da quei engraziein nus sinceramein a tut ils commembers dil comité d’organisaziun, allas gidontras ed als gidonters che han accumpignau ils affons e giuvenils duront quei di, als geniturs per dar suatientscha e la pusseivladad da separticipar a quei di – e grondamein a nos numerus sponsurs che han susteniu nus finanzialmein cun regals attractivs; denter auter la RAIFFEISEN ed RTR. ENGRAZIEL FETG!
Entginas impressiuns da quei di reussiu anfleis vus cheu sut. Ei vivi il ballapei! 🙂
