Sittar igl emprem gol, gudignar in final, parar in «bènaltè», giubilar culs fans; mo era stuer bandunar il plaz cun ina carta cotschna, rumper ils ligioms, stuer prender plaz sin baun, udir cloms e commentaris maltschecs d‘aspectaturAs – tut quei evochescha emoziuns tier pign e grond sin e sper il plaz. Quei ei secapescha buca mo il cass tier giugs naziunals ed internaziunals, mobein era la realitad a Pustget cun nossa famusa «Curva Kiosc».
Era la sesiun da ballapei 2024/2025 ei stada per part empau (memia) emoziunala per enqual pertuccau – quei pils motivs enconuschents. Plinavon havein nus en atgna caussa motiv da vegnir empau emoziunals. Vus tenis numnadamein enta maun la 10avla ediziun dil «bènaltè!» – quei che renda nus in techet loschs e satisfatgs. Dapi 2016 havein nus retschercau, scret e publicau ina pluna artechels davart il CB Trun/Rabius ed il ballapei en general e cun quels – speronza – delectau vus, caras lecturas e cars lecturs.
Il tema principal «emoziuns» havein nus era uonn puspei empruau da dilucidar da differentas perspectivas
– seigi quei la teoria, statisticas, exempels da giugs ed emoziuns ord la televisiun ni il stadion sez, experientschas da giugadurAs e trenaderAs dil CB e schatgs dalla litteratura ni documentaziuns en fuorma da film. En quei senn sperein nus da saver delectar vus in‘ulterira ga culla cumparsa dil «bènaltè!» e giavischein a vus tutTas buna lectura e bien divertiment cullas paginas suandontas.
Il «bènaltè!» 2025 en fuorma da PDF saveis vus telecargar cheu.