Suenter dus giugs ordvart astga l’equipa da Claudio Bundi puspei ir alla catscha da puncts a Pustget. Entochen dacheu ei il cletg buca staus sin la vart dils da Trun. Aschia seresulta daniev la posiziun sut il streh da relegaziun. Cun Triesenberg spetga in’equipa fisicamein fetg ferma che ha denton era qualitads tecnicas. Tut auter che sempla ei la sfida per il CB Trun/Rabius era muort munconza da differents giugadurs blessai.
Als aspectaturs sepresenta in giug aviert che ha ditg e liung neginas occasiuns malsegiras. L’equipa da casa vegn bein el giug e lai aschia era buca tier bia avon igl agen gol. Gia baul semuossa in giug fetg cumbativ e fisic. Il tempo dil giug ei consequentamein buc aults ed il ritmus dil giug vegn adina puspei interruts da fouls. Per l’emprema mesadad han ils dus golis buc in stregntga dumengia. Senza pli grondas occasiuns supplicchescha igl arbiter tier il te da pausa.
Suenter il te vegn la equipa da Trun/Rabius puspei bein el giug. Denton puspei seresultan neginas occasiuns malsegiras ord il giug dil caucasa. Ei cuoza entochen en la 63avla minuta ch’igl attaccader dils hosps vegn bunamein da vargar la defensiun dils da Trun/Rabius e vegn frenaus cun in foul en la zona da puniziun. Igl arbiter muossa immediat sil punct da penalti. Cun bia cletg gartegia ei al tiradur da marcar il 0:1.
Suenter biebein 70 minutas vegn il giug pli e pli grops. Ei cuoza entochen la 85avla minuta che in sbagl dil caucasa resulta en ina corna pigl adversari dil principadi. La corna vegn deviada e setschenta puspei ella reit da Livio Lozza. Pia 0:2 en in giug entochen dacheu fetg uliv e senza grondas occasiuns.
L’equipa da casa lai denton buca pender il tgau e vegn entras in culp liber en la 89avla minuta tier ina fetg buna occasiun da scursnir il retard. Livio Janka plazzescha il bal mo in pèr centimeters memia ault e fa tremblar la traversa dil gol. La pressiun vegn tenida aulta dil CB ed aschia tucca ina flanca en la zona da puniziun cuort suenter il maun dil defensur da Triesenberg. Igl arbiter decida era cheu immediat sin penalti. Patrizio Decurtins vegn denton buca da nezegiar la schanza da scursanir il retard e plazescha il siet sur il gol ora.
Era suenter quei penalti emprovan ils da Trun/Rabius tut per aunc vegnir da tener a Trun in ni l’auter punct. Mo cun tutta buna veglia vul il bal oz buca anflar la reit pil CB Trun/Rabius. Aschia finescha il giug suenter in dir cumbat cun 2:0 pil hosp da Triesenberg.
Per il CB vala ei buca da schar pender pertgei il proxim impurtont giug spetga gia da Gliendisdis Pastgas. Lu frunta l’equipa dalla Cadi numnadamein sin il CB Lumnezia en il miez final dil Cup Grischun puspei a Pustget.
CB Trun/Rabius: Livio Lozza, Mirco Pfister, Mathias Flepp, Silvan Cajacob, Lucas Seiler, Gianin Derungs, Orlando Monn, Rovin Schmed, Nico Caduff, Patrizio Decurtins, Elia Schmed
reservas: Aurelio Carigiet, Enea Decurtins, Tizian Duff, Livio Janka
absenzas: Geo Cauzza, Lucas Maissen (Absents) Ramon Orlik, Silvan Muoth, Denis Monn, Mattia Friberg, Robin Monn, Sandro Orlik (blessai), Damian Schmed (serraus)