Per il secund giug da campiunadi frunta il CB Trun/Rabius ordlunder sin l’emprema equipa digl FC Landquart. Cun Landquart spetga in adversari egual sin l’equipa dalla Cadi. Cunquei che domisduas equipas sesanflan ella davosa part dalla tabella, ei quei in giug da gronda impurtonza el cumbat encunter la relegaziun.
Punct las 14:00, da bial’aura e ferm vent, dat igl arbiter liber il giug sin la plazza da bal a Landquart – Ried. La partida entscheiva ulivamein ed ha pil pli liug el miez dil plaz. Trun/Rabius vegn gia naven dall’entschatta tier entginas caschuns da marcar, denton maunca la davosa precisiun. Era Landquart emprova adina puspei da vegnir malsegirs avon il gol da Trun, quei pil pli entras spertas cunterattaccas. Cun excepziun dalla 25avla minuta, nua che Landquart vegn tier lur megliera caschun sur la vart dretga ora, senza pli grond success. Suenter 40 minutas sa Gianin Derungs recaltgar il bal en la zona da puniziun dil defensur e mo pli vegnir frenaus cun ina retenida. Il penalti resultont marca Patrizio Decurtins segir tier il 0:1 per il hosp dalla Cadi. Cuort avon pausa vegn Landquart aunc inagada tier ina buna caschun, denton sieta igl attaccader il bal sur il gol ora, aschia che las equipas van cun il resultat da 0:1 ella pausa.
La secunda mesadad entscheiva in tec meglier per Trun/Rabius; entras Gianin Derungs ed Orlando Monn vegnan l’equipa da Trun/Rabius tier bunas entochen fetg bunas caschuns da marcar, denton vegnan quellas buc nezegiadas. Landquart surpren silsuenter la bitgetta dil giug. In proverbi el ballapei di: tgi che fa buc els davon, survegn els davos. Suenter in bal liung ord la defensiun da Landquart sa Trun/Rabius mo sclarir tier ina corna. Suenter la corna nunnecessaria ed in schischuri avon gol dil CB anfla il bal la via vid il maun dad in defensur da Trun. Il penalti dispiteivel en la 72avla minuta marca David Micevski cun tutta forza tier igl 1:1. Buca meins che 9 minutas pli tard retscheiva Landquart il secund penalti. Suenter che Trun/Rabius ha defendiu memia heziau croda igl attaccader a tiara en la zona da puniziun. Era quei penalti sieta David Micevski segir e porta en avantatg l’equipa da casa cun 2:1. Duront las davosas minutas dilg giug emprova Trun/Rabius d’egualisar la partida, denton senza succsess. En la 90avla minuta siara Landquart il sac dil tuttafatg. Suenter in sbagl da baghegiar si il giug vegn Marc Pirovino persuls avon il gol e marca il 3:1. Aschia va quella partida a fin cun il resultat final da 3:1 en favur digl FC Landquart.
Per Trun/Rabius ei quei ina terrada absolut buc neccessaria; davon buc fatg ils gols e davos buc defendiu cun cumpleina concentraziun. L’equipa dalla Cadi sto sminuir ils sbagls individuals e mussar ina solida prestaziun sur 90 minutas. Trun/Rabius sto mussar ina reacziun sin quellas duas terradas, autruisa vegn ei grev da mantener il contact tier il miez dalla tabella. La caschun leutier ha il CB Trun/Rabius proxima dumengia a Pustget encunter Triesenberg.
informaziuns: 3. ligia, gruppa 1; FC Landquart 1 – CB Trun/Rabius 3:1 (0:1)
gols: 40. Patrizio Decurtins (P), 72. David Micevski (P), 81. David Micevski (P), 90. Marc Pirovino
CB Trun/Rabius: Livio Lozza, Elia Schmed, Damian Schmed, Mathias Flepp (C), Mirco Pfister, Rovin Schmed, Lucas Maissen, Orlando Monn, Nico Caduff, Patrizio Decurtins, Gianin Derungs – reservas: Aurelio Carigiet, Matia Friberg, Enea Decurtins, Silvan Cajacob, Andri Carigiet
FC Landquart 1: Fadri Dennler, Yaron Bless, Renato Oswald (C), Suad Gerzic, Men Hermle, Jetmir Hashani, Manuel Candrian, Simeon Raphael Eckert, Gian Huber, Marc Pirovino, David Micevski – reservas: Sandro Hertner, Irvin Cutuk, Mate Lekishvili, Mirco Fausch, Christian Lampert, Shayi David Iwadi
remarcas: CB Trun/Rabius senza Ramon Orlik, Denis Monn, Silvan Muoth, Sandro Orlik, Robin Monn (blessai), Lucas Seiler, Nic Culan Jacomet, Geo Cauzza (absents)