Suenter ina liunga preparaziun entscheiva la runda da primavera per il CB Trun/Rabius encunter il capogruppa FC Bad Ragaz. Il plaz da ballapei a Ri-Au sepresenta gia fin mars en cundiziuns perfetgas, aschia che ils giugadurs dil CB van cun pleina motivaziun en quei giug.
Omisduas equipas entscheivan fetg disciplinau; Bad Ragaz ha il surpli, vegn denton buc da surmuntar la defensiun dil CB Trun/Rabius. Suenter in culp liber ella 14avla minuta, nua che la defensiun dil CB ei buc allerta ed era buc propi datier avunda dils giugadurs, vegn igl attaccader da controllar in bal liung e sa survir quel ad Orlando Caluori che marca igl 1:0 per Bad Ragaz. Suenter 21 minutas vul il defensur central Thomas Starcevic sclarir il bal ord l’atgna mesadad; quei siet ord rodund 60 meters anfla nunspitgadamein la via directa en la reit dil CB tier il 2:0. Muort la blessura da Matia Friberg e Damian Schmed sto il CB gia far ell’emprema mesadad duas midadas. Entochen pausa semida denton nuot pli, aschia che las equipas van cun il resultat da 2:0 ella pausa.
La secunda mesadad entscheiva in tec meglier per Trun/Rabius. Inaga Patrizio Decurtins e duas gadas Nico Caduff vegnan cuort suenter pausa tier bunas caschuns da scursanir il resultat, denton maunca la davosa precisiun tier lur siets. Ella 53avla minuta sieta il giugadur da miez Sandro Kressig il 3:0 per Bad Ragaz, quei suenter ina fetg biala acziun singula. Il 4:0 ella 81avla minuta sieta Marco Mühlebach suenter ina attacca sur la vart ora. Aschia va quella partida a fin cun il resultat final da 4:0 en favur da Bad Ragaz.
Proxima dumengia frunta il CB Trun/Rabius ordlunder sin l’equipa da Landquart. Cun Landquart spetga in adversari encunter la relegaziun sin il CB, aschia che l’equipa dalla Cadi sto mussar ina reacziun.
informaziuns: 3. ligia, gruppa 1: FC Bad Ragaz 1 – CB Trun/Rabius 4:0 (2:0)
gols: 14. Orlando Caluori, 21. Thomas Starcevic, 53. Sandro Kressig, 81. Marco Mühlebach
CB Trun/Rabius: Livio Lozza, Lucas Seiler, Damian Schmed, Mathias Flepp (C), Mirco Pfister, Rovin Schmed, Matia Friberg, Orlando Monn, Nico Caduff, Robin Monn, Patrizio Decurtins – reservas: Sandro Orlik, Elia Schmed, Silvan Cajacob, Lucas Maissen, Andri Carigiet, Gianin Derungs
FC Bad Ragaz: Flurin Ambühl, Nando Bersorger, Thomas Starcevic, Jan Kohler, Sandro Kressig, Marco Mühlebach (C), Vitor Antonio Monteiro Da Silva, Orlando Caluori, Noel Sprecher, Zivan Mitrovic, Sascha Bless – reservas: Athanasios Pagonas, Felix Horni, Manuel Horni, Salvatore Rauti, Nicola Radosevic, Nando Thöny, Lenard Hoxha
remarcas: CB Trun/Rabius senza Ramon Orlik, Denis Monn, Silvan Muoth (blessai), Nic Culan Jacomet, Tizian Duff, Enea Decurtins, Geo Cauzza, Aurelio Carigiet (absents)