Suenter ina liunga mesa sesiun d’atun spetga sin ils da Trun/Rabius aunc il davos giug dalla runda. Quel ha liug el Principadi da Liechtenstein, numnadamein a Triesen. Als hosps sepresenta in grond plaz en ina cundiziun maximala. La devisa ei clara. Treis puncts per saver sedistaccar dil streh da relegaziun.
Ei schabegia sco igl onn vargau a Triesen puspei cun la emprema attacca dil cau-casa. Suenter in sbagl da communicaziun dils da Trun/Rabius vegn igl attaccader da Triesen da prender en il bal en il cantun dalla zona da puniziun e metter il tal senza cumpromiss en il cantun liung tier igl 1:0. Pia gia en disavantatg suenter gnanc siat minutas.
Il CB muossa denton ina buna reacziun e controllescha per gronda part il giug. En general dat ei paucas acziuns che savessen menar ad in gol. En la 26avla minuta survegn Lucas Maissen denton la schanza entras in siet suenter in corner. Quel anfla denton buca la via en la reit. Entochen pausa reussescha ei als hosps da tener ault la pressiun ed aschia adina puspei da vegnir tier mesas pusseivladads. Il gol vul denton buca gartegiar. Aschia va ei tier il te da pausa cun il disavantatg ch’ei entochen pausa buca pli meritaus.
La pausa ha denton sco gia pliras gadas buca fatg bein a quels da Trun/Rabius. Cun dus treis siets da distanza che Livio Lozza tegn bein, vegnan ils da Triesen meglier ord la cabina. En la 64avla minuta vegn il CB buca da sclarir in bal sco giavischau. Aschia vegn igl adversari tier ina occasiun e lai puspei buca suppliccar duas gadas. Aschia aulzan els il resultat sin 2:0. Puspei ei la reacziun da Trun/Rabius buna ed aschia capeta ei en la 74avla minuta che Patrizio Decurtins vegn da scursanir il resultat sin 2:1 suenter in bi pass da Matia Friberg. Mo treis minutas pli tard ei la defensiun da Trun/Rabius puspei buca sortida idealmein ed aschia sto Livio Lozza aunc inagada mussar ina parada per buca dar il giug ord ils mauns puspei. Mo duas minutas pli tard, vegn Triesen tier in culp liber ord ina buna posiziun. Quel vegn deviaus dil mir, denton directamein avon ils peis digl attaccader. Lez sa encurir ô il cantun e stauscha en la reit il bal tier il 3:1. Puspei vargan mo duas minutas entochen che Trun/Rabius ha la schanza da scursanir il resultat puspei. Denton era il goli da Triesen muossa enqual biala parada e tegn igl avantatg per sia equipa. En la 87avla minuta astga il defensur da Triesen ir senza pli gronds disturbis cun il bal da quei da 60 meters ed avon la da zona da puniziun metter il bal sin il congiugadur che sieta il 4:1 senza gronda discussiun. Pia la proxima frida pils hosps dalla Cadi.
Mo era suenter quei gol vegn Tru/Rabius aunc tier duas entochen treis fetg bunas occasiuns da gols. Mo oz vul ei puspei inaga buca reussir da far dapli gols al CB Trun/Rabius.
Suenter in liung temps supplementar schula igl arbiter la fin finala giu il giug tier il resultat da 4:1 en favur da Triesen. In’ulteriur giug spiars cun in facit cuort: Davon buca fatg ils gols e davos survegniu els memia tgunsch.
Suenter quei giug va ei per las equipas da 3. ligia en la pausa d’unviern. Temps per seruassar e lu attaccar danovamein en la runda da primavera. Cun la fin finala mo 13 puncts sil conto eis ei stau ina mesa seiun mediocra per il CB Trun/Rabius. Ei vala da trenar bein la primavera e luvrar vid ils sbagls individuals per lu saver mussar che l’equipa s’auda claramein buca en zona da relegaziun el campiunadi da 3. ligia.
CB Trun/Rabius cun: Livio Lozza, Mirco Pfister, Mathias Flepp, Silvan Cajacob, Toni Cathomas, Robin Monn, Orlando Monn, Rovin Schmed, Lucas Maissen, Patrizio Decurtins, Andri Carigiet
reservas: Matia Friberg, Aurelio Carigiet, Enea Decurtins
absenzas: Lucas Seiler, Tizian Duff, Geo Cauzza, Damian Schmed, Elia Schmed, Gianin Derungs (Absents) Ramon Orlik, Silvan Muoth, Denis Monn, Nico Caduff (blessai)