Suenter la terrada da 4:2 encunter Cuera 97 l’jamna vargada frunta l’emprema equipa dil CB Trun/Rabius el 7. giug da campiunadi sin l’equipa da FC Landquart 1.
Il giug entscheiva meglier per il caucasa, gia ella 4. minuta vegn il CB Trun/Rabius tier l’emprema caschun da marcar entras Robin Monn, denton sieta igl attaccader sper il gol ora. Trun/Rabius ha vinavon il surpli dil giug ed emprova dad ir en avantatg. Suenter 25 minutas vegn Orlando Monn tarmess da Rovin Schmed ella profunditad; cun sia spertadad semetta el atras encunter il defensur e sa mo vegnir frenaus cun in foul dil goli da Landquart ella zona da puniziun. Il penalti che seresulta marca Patrizio Decurtins segir tier igl 1:0 per Trun/Rabius. Silsuenter emprova Trun/Rabius da marcar il secund gol, denton maunca la davosa precisiun. Landquart vegn ella 38avla minuta tier lur emprema caschun da marcar, denton parescha Livio Lozza il siet da Jetmir Hashani. Aschia che las equipas van cun il resultat da 1:0 ella pausa.
Il te da pausa para dad haver fatg bein all’equipa da casa; gia la 48 avla minuta sa Trun/Rabius giubilar per la secunda gada. Cun ina sperta cunterattacca vegn Orlado Monn tarmess ella profunditad da Lucas Maissen, el cugliuna il defensur da Landquart e porta il bal ella zona da puniziun. Sia flanca sa il goli parar, denton mo entochen tier Patrizio Decurtins che reagescha il pli spert e sietta il 2:0 per Trun/Rabius. Silsuenter tschessa il giug empau, la defensiun da Trun/Rabius stat fetg bein e defenda fetg disciplinau, aschia che Landquart vegn tier neginas caschuns da marcar. Suenter 88 minutas siara il CB Trun/Rabius il sac dil tuttafatg, Nico Caduff vegn lantschaus cun in bal liung; el semetta atras encunter il defensur, siu siet deviau vegn tier Gianin Derungs che lai buc supplicar duas gadas e marca cun saung freid il 3:0 per Trun/Rabius. Aschia va la partida a fin cun il resultat final da 3:0 en favur da Trun/Rabius.
L’emprema equipa dil CB Trun/Rabius ha mussau ina fetg disciplinada prestaziun e strusch schau tier caschuns da marcar, aschia che quella victoria ei meritada. Proxima sonda frunta Trun/Rabius ordlunder sin igl FC Triesenberg che sesanfla sin il secund plaz.
informaziuns: 3. ligia, gruppa 1; CB Trun/Rabius 1 Grp. – FC Landquart 1 3:0 (1:0)
gols: 25. Patrizio Decurtins (P), 47. Patrizio Decurtins, 87. Gianin Derungs
CB Trun/Rabius 1 Grp.: Livio Lozza, Mirco Pfister, Mathias Flepp (C), Damian Schmed, Elia Schmed, Rovin Schmed, Lucas Maissen, Patrizio Decurtins, Orlando Monn, Robin Monn, Gianin Derungs, – reservas: Aurelio Carigiet, Sando Orlik, Matia Friberg, Enea Decurtins, Silvan Cajacob, Andri Carigiet, Nico Caduff
FC Landquart 1: Noé Niggli, Simeon Raphael Eckert, Renato Oswald (C), Manuel Candrian, Men Hermle, Yaron Bless, Joao Paulo Sousa Madureira, Shayi David Iwadi, Marc Pirovino, David Micevski, Jetmir Hashani, Mirco Fausch, Andrej Sofric, Antonio Da Silva Barbosa, Mate Lekishvili, Flurin Brändli, Paulo Fonseca Pereira
remarcas: CB Trun/Rabius senza Ramon Orlik, Denis Monn, Silvan Muoth (blessai), Lucas Seiler, Tizian Duff, Geo Cauzza (absents)