Suenter las victorias encunter Landquart e Triesenberg, frunta il CB Trun/Rabius Grp. per il 9avel giug da campiunadi sin l’equipa promovida da FC Walenstadt. Muort l’absenza dil goli Livio Lozza vegn Nic Culan Jacomet – empau nunspitgau – tier sia premiera denter las petgas dil CB.
Da bial’aura d’atun ed avon ina biala culissa d’aspectaturs dat igl arbiter liber il davos giug da campiunadi da quella stagiun a Pustget. Il giug entscheiva fetg uliv e caschuns da marcar dat ei fetg paucas. Suenter biebein 10 minutas vegn Mirco Pfister tier in siet da distanza ch’il goli da Walenstadt Gzim Ademi sa sclarir via la traversa ad ina corna. Walenstadt vegn tec a tec meglier el giug ed era tier entginas mesas caschuns da marcar, denton maunca la davosa precisiun ni che Nic Culan Jacomet sa parar ils siets. Cuort avon pausa vegn Trun/Rabius aunc tier ina sperta cunterattacca sur l’ala seniastra ora, denton munchentan ils attaccaders il bal ella zona da puniziun. Era il siet da Orlando Monn ella 38avla minuta munchenta per pauc la finamira. Aschia van las equipas cun il resultat da 0:0 ella pausa.
Suenter pausa semuossa il medem maletg sco avon pausa: Ei dat dirs cumbats, il giug ha pil pli liug el miez dil plaz e caschuns da marcar dat ei paucas e sche, plitost per casualitad. Suenter 55 minutas vegn Walenstadt tier ina corna, la flanca sa il defensur Mirko Pfiffner spedir en direcziun dil gol, denton sclarescha Mirco Pfister il bal sin lingia. Suenter 59 minutas tarmetta Damian Schmed in bal liung en direcziun da Gianin Derungs; el semetta atras encunter ils defensurs e va direcziun gol, denton cuort avon sittar vegn el retenius dil defensur. Robin Monn e Patrizio Decurtins vegnan silsuenter tier duas ulteriuras caschuns, denton sa il goli da Walenstadt mintgamai sclarir tier cornas. Cuort avon la fin dil giug vegnan ils hosps aunc tier ina buna caschun, quei suenter ina corna da Trun/Rabius che meina tier ina sperta cunterattacca, denton sietta igl attaccader sper il gol ora. Aschia va la partida a fin cun il resultat final da 0:0.
Mirau sur igl entir giug ora ei il pari il gest resultat per quella scuntrada, per gudignar il giug han domisduas equipas mussau memia pauc engaschi ell’offensiva. Proxima sonda frunta il CB Trun/Rabius ordlunder sin l’equipa da Schluein/Glion. Per tegner petg alla equipa dalla Foppa drova ei denton in megliera prestaziun e dapli engaschi.
informaziuns: 3. ligia, gruppa 1; CB Trun/Rabius 1 Grp. – FC Walenstadt 1 0:0 (0:0)
gols: –
CB Trun/Rabius 1 Grp.: Nic Culan Jacomet, Mirco Pfister, Mathias Flepp (C), Damian Schmed, Elia Schmed, Rovin Schmed, Patrizio Decurtins, Orlando Monn, Robin Monn, Nico Caduff, Gianin Derungs, – reservas: Sando Orlik, Matia Friberg, Enea Decurtins, Silvan Cajacob, Andri Carigiet, Lucas Seiler
FC Walenstadt 1: Gzim Ademi, Patrick Loop, Mirko Pfiffner(C), Daniel Jud, Paul Doyen, Kevin Karisik, Gian Luca D Agostino, Nicola Loop, Kristian Divkovic, Ardi Qehaja, Jan Gubser, Anto Topic, Timo Gervasoni, Danino Brazerol, Pierluigi Cecchini, Nico Jäger
remarcas: CB Trun/Rabius senza Ramon Orlik, Denis Monn, Silvan Muoth (blessai) Tizian Duff, Geo Cauzza, Livio Lozza, Lucas Maissen, Aurelio Carigiet (absents)