Dir cumbat cun victoria meritada 

La davosa fin d’jamna ha il CB Trun/Rabius mussau con bia che schai en el campiunadi da 3. ligia cun grond engaschi e curascha. Suenter il resultat suveran da 3:0 encunter l’equipa da Landquart ei l’emprema equipa dil CB serendida la sonda vargada el Principadi dil Liechtenstein per semesirar cun il FC Triesenberg che sesanfla sin il secund plaz en la tabella. 

Il plaz ch’ei normalmein en in stan bunamein perfetg semuossa tut auter als da Trun. Damai ch’in giug da 2. ligia denter Vaduz e Puschlav ha giu liug avon il giug da 3. ligia ei il plaz en schliata cundiziun e fetg malulivs. Aschia sepresenta als aspectaturs sco gia sminau in giug fetg grop cun bia fouls e pauc ballapei. Era las occasiuns sin gol ein plitost raras. Las empremas 20 minutas vargan senza schanzas grondas. Tut en tut sepresenta il hosp dalla Cadi denton meglier e vegn adina puspei tier mesas schanzas avon gol digl adversari. Ei cuoza denton entochen la 29avla minuta per ch’in gol seresulti ord las breigias. Gianin Derungs reagescha bein e dat spert in culp liber dall’alla dretga giu sin Robin Monn che dat directamein la flanca sin l’altezia dalla lingia da tschun da Triesenberg, nua che Damian Schmed sesaulza pli ad ault che tut ils adversaris e metta il bal cun in bellezia tgaua en gol. 

Entochen pausa va ei vinavon cun in giug pauc attractiv e bia fouls. La defensiun da Trun/Rabius mantegn denton la nulla senza vegnir en grondas miserias. 

Suenter pausa paran ils adversaris dad esser pli a dies al CB che aunc avon pausa. Denton gia en la 47avla minuta anfla in pass da Triesenberg la fallida adressa cun la tala da Gianin Derungs. Igl attaccader vegn tier ina buna occasiun e fa buca supplicar duas ga. Cun tut sia rutina metta el il bal sper il goli ora tier il 0:2. Mo duas minutas pli tard vegn il goli da Triesenberg malsegirs e sieta promt il bal els peis agl adversari. Robin Monn vegn denton buca da nezegiar la schanza e plazzescha il bal sper il gol ora. Cun il resultat 0:2 gia aschi baul en la secunda mesadad, vegn il CB denton en ina leva hectica. Adina puspei vegn igl adversari frenaus cun pigns fouls ella mesadad da Trun/Rabius. Ils culps libers da Triesenberg ein adina in motiv dad esser attents. Denton era entras quels vegn il caucasa buca tier ina schanza concreta ni schizun tier in gol. Per gliez ei la defensiun dils hosps memia segira quella sonda. 

Cuntrari plitost – la 62avla vegn Gianin Derungs aunc inaga lantschaus e vegn en in cumbat dad in encunter in cun il goli da Triesenberg. Il defensur vegn denton da pigliar giu Gianin e da frenar giu il siet. Entochen la fin dil giug va ei vinavon cun bia fouls ed era acziuns malgestas dalla equipa da casa. Adina vegn empruau da dar suenter senza ch’igl arbiter vegni da castigiar il pertuccau. Per gronda part e cun il resultat positiv vegn Trun/Rabius denton d’ignorar il secuntener dil caucasa. La fin finala schula igl arbiter giu il giug. 

En general eis ei buca stau in giug pigl egl digl aspectatur. Denton cun ina prestaziun solida naven da davos entochen davon eis ei reussiu inaga dapli al CB da vilentar il favorit ordvart. Proxima fin d’jamna frunta Trun sin la equipa da Walenstadt ch’ei vegnida promovida da 4. ligia. L’equipa songagliesa ei denton sin via cun bia slontsch e sesanfla aschia sin il tierz plaz dalla tabella. Cun dus giugs senza cuntergol vala ei denton era per l’equipa da Claudio Bundi da tener vinavon la cadenza pils davos giug dalla runda d’atun e confirmar las bunas prestaziuns.