Suenter la petra terrada dalla davosa fin d’jamna ei il CB Trun/Rabius serendius ella capitala per recaltgar proxims puncts el campiunadi da 3. ligia. Dad aura frestga cun il vent obligatori a Cuera duei quei gartegiar, per puspei saver mirar encunter anavon en la tabella.
Auter ch’il giug dalla fin d’jamna vargada entscheiva la equipa dalla Cadi empau dormulent il giug. Aschia vegn Cuera gia suenter quater minutas da finir l’emprema attacca cun igl 1:0. Ei para denton che quei gol ha buca aunc destadau ils da Trun propi. Adina puspei vegn Cuera empau malsegirs en il davos tierz dil CB Trun/Rabius. Aschia seresulta era il 2:0 ella 20avla minuta dil giug. Cun in bal ault vegn igl attaccader da Cuera lantschaus bein e marca senza problems il secund gol per l’equipa da casa.
Pér uss paran ils hosps dad esser arrivai cumpletamein sin il plaz a Cuera. Cuort suenter vegn Gianin Derungs tier in siet da distanza, quel vegn frenaus digl adversari e croda anavos sin Robin Monn che vegn da sittar in bien siet ch’il goli da Cuera meina denton ora tier in corner.
Duas minutas suenter vegn Gianin Derungs da metter a ferm in bal ella zona da puniziun da Cuera. Il defensur da Cuera muossa pauc inschign e freina igl attaccader cun in foul. Aschia vegn Patrizio Decurtins tier la schanza da marcar siu proxim gol ella sesiun entras in penalti. Cun saung freid fa el il gol e porta in niev slontsch en la partida.
Silsuenter ei il giug ditg fetg ulivs e senza occasiuns remarcablas. Cuort avon pausa vegn Cuera denton aunc tier ina schanza excellenta entras il giugadur sill’ala dretga. El vegn da cuorer sin gol en in cumbat dad in encunter in. Livio Lozza, il goli dil CB Trun/Rabius, parescha denton quei siet e mantegn aschia il resultat stretg entochen pausa.
Il te da pausa ed ils plaids dil trenader ston haver fatg bein al CB Trun/Rabius. Sco che la secunda mesadad entscheiva muossan ils hosps ina tut autra fatscha. Aschia sedat en la 51avla minuta gia l’emprema occasiun per egualisar il giug puspei. Quella vegn denton frenada bein dil goli da Cuera suenter che Orlando Monn ei vegnius lantschaus da Gianin Derungs dall’ala dretga giu.
Il CB stat denton adies vinavon e vegn aschia tier bunas entochen fetg bunas occasiuns da marcar il 2:2 ed era dapli. Adina ei denton ina comba digl adversari denteren ni ch’il goli da Cuera tegn vinavon il resultat. Aschia capeta ei en la 70avla minuta che Cuera vegn suenter in corner dil CB tier ina cunterattacca fetg malsegira. Treis giugadurs da Cuera encunter in defensur da Trun. All’entschatta para ei sco sch’il CB vegn buca strufegiaus per la munconza dil luvrar defensiv en quella acziun. Cun bia cletg ed agid dil CB Trun/Rabius croda il bal denton tuttina ord in smugl en la reit tier il 3:1. Entochen quell’attacca haveva la equipa da Trun giu sut controlla igl adversari e strusch schau vegnir lez en l’atgna mesadad pli.
Mo otg minutas pli tard vegn il giugadur da Cuera sin l’ala seniastra da mitschar dalla defensiun da Trun cun in tempo nundetg e marchescha senza cumpromiss il 4:1 per Cuera. Il CB ha denton vinavon luvrau anavon e vegn suenter in siet da Robin Monn naven dil cunfin dalla zona da puniziun aunc tier il 4:2 en la 83avla minuta. Per dapli tonscha ei denton buca ed il giug finescha senza puncts per il CB Trun/Rabius.
Proxima fin d’jamna frunta l’equipa da Claudio Bundi a pustget sin l’quipa da Landquart che sesanfla il mument sut il streh da relegaziun. Ei ha num da mussar ina reacziun, sminuir ils sbagls e dar vinavon cun la curascha sco entochen da cheu.
informaziuns: 3. ligia, gruppa 1; Cuera 97 2 – CB Trun/Rabius 1 Grp. 4:2 (2:1)
gols: 4. Cuera, 20. Cuera, 24. Patrizio Decurtins, 70. Cuera, 78. Cuera, 83. Robin Monn
remarcas: CB Trun/Rabius senza Denis Monn, Ramon Orlik, Silvan Muoth (blessai), Geo Cauzza, Lucas Seiler, Tizian Duff, Aurelio Carigiet (absents)