Suenter duas victorias da campiunadi ed ina victoria el quartfinal dalla cuppa Grischuna, frunta il CB Trun/Rabius sin l‘equipa promovida da Panaduz.
Trun/Rabius entscheiva fetg bein il giug e vegn gia suenter 5 minutas tier l‘emprema caschun da marcar. Gianin Derungs recaltga ault il bal e va tut persuls en direcziun dil gol, il goli da Panaduz parescha denton siu siet che ei buc plazzaus bein avunda. Trun dat vinavon en il tact ed astga giubilar per l‘emprema gada ella 11avla minuta. Patrizio Decurtins meina ora gest treis adversaris e marca cun in siet sut la traversa igl 1:0 per l‘equipa da casa. Quei gol para buc dad haver fatg bein alla equipa dalla Cadi. Suenter ina malcapientscha ella defensiun da Trun/Rabius sa Panaduz – empau ord il nuot – egualisar la partida entras Dennis Däscher ella 35avla minuta, quei cun in siet plazzau ord biebein 17 meters. Trun/Rabius dat ord ils mauns il giug cumpleinamein. Ei dat memia bia sbagls individuals ed igl engaschi constat buc pli diltut. Cuort avon pausa, numnadamein ella 43avla minuta, sa Panaduz ir en avantatg cun 1:2 entras Nicolas Brunies. Quei suenter in bal liung ed in pass ella zona da puniziun nua chi’gl attaccader sa stuschar en. Aschia van las equipas cun il resultat dad 1:2 ella pausa.
Suenter pausa surpren Trun/Rabius puspei la controlla dil giug, denton vegnan els buc malsegirs el davos tierz dil plaz. Panaduz defenda bein e lai strusch tier caschuns da marcar. Suenter 68 minutas ed in culp liber sieta Andrin Knellwolf igl 1:3 per Panaduz, quei suenter in culp liber ed in disuorden avon gol. Gia ella 72avla minuta sa Orlando Monn scursanir sin 2:3 cun in siet direct suenter ina corna. Entochen la fin emprova Trun/Rabius cun tutta vehemenza d’egualisar la partida, denton maunca la davosa precisiun. Aschia che la partida va a fin cun il resultat final da 2:3 en favur da Panaduz.
informaziuns: 3. ligia, gruppa 1; CB Trun/Rabius 1 Grp. – FC Bonaduz 1 2:3 (1:2)
gols: 11. Patrizio Decurtins , 35. Denis Däscher, 43. Nicolas Brunies, 68. Andrin Knellwolf, 72. Orlando Monn
CB Trun/Rabius 1 Grp.: Livio Lozza, Orlando Monn, Lucas Maissen, Mathias Flepp (C), Elia Schmed, Rovin Schmed, Patrizio Decurtins, Robin Monn, Andri Carigiet, Nico Caduff, Gianin Derungs, – reservas: Aurelio Carigiet, Sandro Orlik, Silvan Cajacob, Mirco Pfister, Enea Decurtins, Samuel Flepp, Andrin Wolf
FC Panaduz 1: Alessandro Caluori, Silvan Tscharner, Andre Filipe Cleto Cerqueira, Florian Hartmann, Andrin Knellwolf, Brando Lussu, David Gartmann (C), Dennis Däscher, Jon Jenal, Nicolas Brunies, Patrick Barros De Sousa, Silvan Fetz, Marco Dias Simoes Ribeiro, Linus Caprez
remarcas: CB Trun/Rabius senza Denis Monn, Ramon Orlik, Silvan Muoth, Mattia Friberg (blessai), Geo Cauzza, Lucas Seiler, Tizian Duff, Damian Schmed (absents)