Suenter la victoria da 4:1 encunter l’emprema equipa da Sargans l’jamna vargada, frunta il CB Trun/Rabius el 4. giug da campiunadi sin l’equipa promovida da Sevelen. Muort absenzas e differentas blessuras sto il trenader Claudio Bundi far entginas midadas ell’equipa da Trun/Rabius.
Il giug entscheiva da vart da Trun/Rabius fulminont ed il caucasa astga gia giubilar per l’emprema gada suenter 3 minutas. Nico Caduff vegn lantschaus cun in bal liung, el semetta atras encunter la defensiun da Sevelen e survescha il bal a Patrizio Decurtins che marca el cantun igl 1:0 per Trun/Rabius. Gia ella 11avla minuta sieta Patrizio il 2:0, quei entras in bal ella gassa da Nico Caduff. Trun ha vinavon il surpli dil giug e vegn ella 26avla minuta tier in penalti. Patrizio Decurtins surpren la responsabladad e marca a moda segira il 3:0 per Trun. Aschia sieta igl attaccader da Trun/Rabius enteifer 26 minutas in hattrick. Silsuenter piarda Trun/Rabius dil tuttafatg il fil dil giug e Sevelen vegn ella 37avla minuta tier in penalti, denton sieta il giugadur sperasora quel. Cuort avon pausa sa Sevelen denton scursanir suenter in corner sin 3:1. Aschia van las equipas cun il resultat da 3:1 ella pausa.
La secunda mesadad entscheiva Sevelen meglier che l’equipa da casa e vegn tier differentas caschuns da marcar, denont tegn Daniel Monn l’equipa dalla Cadi el giug. Silsuenter ha il giug liug pil pli el miez dil plaz; ei dat dirs cumbats e la qualitad pren giu cuntinuadamein. Ella 63avla minuta vegn igl attaccader da Sevelen mess a tiara ella zona da puniziun, aschia ch’ei dat il secund penalti per ils hosps. Quel marca Elduan Isufi a moda suverana al 3:2. Il giug va vinavon sco entochen dacheu; ei dat dirs cumbats e las equipas han mo mesas caschuns da marcar che vegnan buc nezegiadas. Ella 87avla minuta ei Enea Decurtins pli sperts che il goli da Sevelen e prepara aschia il 4:2 entras Gianin Derungs. Aschia va la partida a fin cun il resultat final da 4:2 en favur da Trun/Rabius.
L’emprema equipa dil CB Trun/Rabius ha mussau duront las empremas 35 minutas ina fetg buna prestaziun e marcau cun saung freid ils gols. Silsuenter ha l’equipa dalla Cadi tschentau anavos in gang memia fetg e fatg nunnecessariamein grev la veta a sesez. Tut en tut ei la victoria meritada, denton sto la giuvna equipa vegnir da purtar sur 90 minutas ina prestaziun disciplinada. La proxima fin d’jamna gioga il CB Trun/Rabius Grp. ordlunder il giug da ¼ final dalla cuppa Grischuna encunter Moesano Calcio.
informaziuns: 3. ligia, gruppa 1; CB Trun/Rabius 1 Grp. – FC Sevelen 1 4:2 (3:1)
gols: 3. Patrizio Decurtins, 11. Patrizio Decurtins , 26. Patrizio Decurtins (P), 44. Pedro Ribeiro, 63. Elduan Isufi (P), 87. Gianin Derungs
CB Trun Rabius 1 Grp.: Daniel Monn, Mirco Pfister, Lucas Maissen, Damian Schmed, Elia Schmed, Rovin Schmed, Patrizio Decurtins, Mathias Flepp (C), Andri Carigiet, Nico Caduff, Gianin Derungs, – reservas: Aurelio Carigiet, Matia Friberg, Enea Decurtins, Silvan Cajacob, Orlando Monn, Geo Cauzza
FC Sevelen 1: Bejadin Sazimanoski, Altin Jahiji, Mateo Sibona, Pedro Ribeiro Barbosa, Riccardo Licci, Armend Eljezi, Niclas Pepelnar, Dario Fuoco (C), Leandro Ziörjen, Elilnayan Subendran, Nico Calò, Marco Müntener, Hélder Filipe Moreira Nunes, Elduan Isufi, Finn Halter, Jakub Michal Wojtowicz, Sebastian Fuchs
remarcas: CB Trun/Rabius senza Ramon Orlik, Denis Monn, Silvan Muoth, Robin Monn (blessai), Lucas Seiler, Tizian Duff, Sandro Orlik, Livio Lozza (absents)