Per il 3. giug da campiunadi frunta il CB Trun/Rabius la gievgia sera ordlunder sin l’emprema equipa da Sargans. Suenter duas terradas filadas en seria eis ei uras per l’equipa dalla Cadi da finalmein recaltgar ils emprems puncts.
Il giug entscheiva fetg uliv. Sargans emprova da vegnir sur las alas e cunzun cun bals liungs tier sias empremas caschuns, denton stat la defensiun da Trun/Rabius fetg bein e lai tier pauc ni nuot. Suenter ina sperta cunterattacca vegn Trun/Rabius ella 13avla minuta tier in culp liber. Robin Monn porta il bal sin Elia Schmed, el mantegn la survesta e survescha a Nico Caduff il bal ʺPfannenfertigʺ che marca il 0:1 per Trun. Trun/Rabius ha surpriu il dictat dil giug e sa beinspert giubilar per la secunda gada. Suenter ina corna vegn Sargans buca da spedir il bal endretg, aschia che Patrizio Decurtins sa recaltgar anavos il bal e purtar ina flanca sil tgau da Gianin Derungs che marca cun saung freid il 0:2 per Trun/Rabius. Sargans vegn aunc tier entginas situaziuns da standard, denton defenda l’equipa dalla Cadi fetg engaschau. Entochen pausa tschessa il giug empau ed ils cumbats han pil pli liug el miez dil plaz. Aschia van las equipas cun il resultat da 0:2 ella pausa.
La secunda mesadad entscheiva danovamein cun ina duscha freida per Trun/Rabius. Cun empau cletg anfla in culp nunvuliu da Fabian Schai ord biebein 40 meters la via en gol, aschia ch’ei stat suenter 47 minutas 1:2. La risposta da Trun/Rabius vegn denton immediat. Ella 49avla minuta tschenta Robin Monn il bal per in culp liber; el sieta il bal ella traversa, Orlando Monn reagescha il pli spert e marca cul tgau igl 1:3 per l’equipa dalla Cadi. Sargans emprova vinavon da scursanir, denton mauncan claras caschuns da marcar. Suenter in corner da Sargans ella 66avla minuta vegn Mathias Flepp da sclarir cul tgau sin Elia Schmed. Il defensur tarmetta allura in bal liung en direcziun da Nico Caduff. Il giuven giugadur semetta atras encunter il defensur sco era encunter il goli e marca a moda suverana igl 1:4 per Trun/Rabius. Cuort avon la fin tucca l’equipa da Sargans mo la traversa e Trun/Rabius ha entras Gianin Derungs aunc la caschun d’alzar il resultat, denton sa il goli parar siu siet. Aschia va la partida a fin cun il resultat final dad 1:4 en favur da Trun/Rabius.
L’emprema equipa dil CB Trun/Rabius ha mussau ina fetg engaschada prestaziun e meritau quella victroria. Il proxim giug ha liug venderdis sera ils 6-9-2024 dallas 20:15 uras a Pustget. Lu frunta l’equipa dalla Cadi sin l’equipa promovida da Sevelen.
informaziuns: 3. ligia, gruppa 1; FC Sargans 1 – CB Trun/Rabius 1 Grp. 1:4 (0:2)
gols: 13. Nico Caduff, 15. Gianin Derungs, 47. Fabian Schai, 49. Orlando Monn, 66. Nico Caduff
CB Trun/Rabius 1 Grp.: Livio Lozza, Mirco Pfister, Lucas Maissen, Mathias Flepp (C), Elia Schmed, Rovin Schmed, Robin Monn, Patrizio Decurtins, Orlando Monn, Nico Caduff, Gianin Derungs, – reservas: Aurelio Carigiet, Sandro Orlik, Matia Friberg, Enea Decurtins, Silvan Cajacob, Andri Carigiet, Silvan Muoth
FC Sargans 1: Christian Hermann, Chris Tanner, Benjamin Weber, David Becker(C), Rahulan Sivalingam, Liun Roner, Kevin Willi, Marco Giordano, Valentino Zollino, Kevin Bigger, Sandro Willi, Gianluca Kurath,
Sven Mathis, Ramon Kolb, Fabian Schai, Corsin Wachter, Adrian Santa, Robin Wachter
remarcas: CB Trun/Rabius senza Ramon Orlik, Denis Monn (blessai), Geo Cauzza, Lucas Seiler, Tizian Duff, Damian Schmed (absents)