Suenter ch’il CB Trun/Rabius ha spiars la dumengia vargada igl emprem giug da campiunadi encunter Mels, fruntan els per il secund giug a Mutteins sin igl FC Bogn Ragaz. Cun Bogn Ragaz spetga in ferm adversari che ha ambiziuns per la promoziun sin l’equipa dalla Cadi.
Il giug entscheiva da vart dil caucasa fetg disciplinau, Bogn Ragaz ha il surpli da giug, vegn denton buc da surmuntar la defensiun dil CB Trun/Rabius che stat fetg bein. Ella 30avla minuta dat ei suenter ina malcapientscha ella defensiun da Trun/Rabius in culp liber ord 22 meters per Bogn Ragaz. Manuel Horni sieta il culp liber sin via directa al 0:1 per ils hosps. Il CB Trun/Rabius lai buca stermentar da quei gol e vegn cuort avon pausa entras Gianin Derungs tier la megliera caschun da marcar, denton maunca la davosa precisiun tier il siet. Aschia che las equipas van cun il resultat da 0:1 ella pausa.
La secunda mesadad entscheiva cun ina duscha freida per Trun/Rabius, Noah Berry sieta ord 30 meters sur il giuven goli Livio Lozza ora e marca il 0:2 per Bogn Ragaz. La proximas minutas emprova Bogn Ragaz da serrar si il sac, denton tegn la defensiun sut la bitgetta da Damian Schmed petg a tut las attaccas. Suenter 60 minutas e gest treis midadas vegn Trun/Rabius meglier el giug e sa scursanir ella 68avla minuta entras Nico Caduff, quei suenter ina fetg biala acziun singula ed in siet ord biebein 30 meters. Silsuenter emprova Trun/Rabius tut il pusseivel d’egualisar la partida e vegn era tier bunas caschuns. Sco emprem ha Patrizio Decurtins ina fetg buna caschun, denton sa il goli Flurin Ambühl sclarir en extremis. Trun/Rabius vegn aunc tier entginas situaziuns da standard, denton maunca mintgamai fetg pauc ed era in tec il cletg per saver marcar. Aschia va quella partida a fin cun il resultat final dad 1:2 en favur da Bogn Ragaz.
L’emprema equipa dil CB Trun/Rabius ha mussau ina fetg engaschada e disciplinada prestaziun, denton per la secunda gada en roda buca saviu raccoltar puncts. La giuvna equipa trenada da Claudio Bundi sa denton emprender ord quella terrada ed ha mussau ch’ella ei sin la dretga via.
informaziuns: 3. ligia, gruppa 1; CB Trun/Rabius – FC Bad Ragaz 1 1:2 (0:1)
gols: 30. Manuel Horni, 48. Noah Berry, 68. Nico Caduff
CB Trun/Rabius: Livio Lozza, Mirco Pfister, Lucas Maissen, Damian Schmed, Elia Schmed, Mathias Flepp (C), Rovin Schmed, Robin Monn, Orlando Monn, Andri Carigiet, Gianin Derungs, – reservas: Aurelio Carigiet, Sandro Orlik, Matia Friberg, Enea Decurtins, Silvan Cajacob, Nico Caduff, Patrizio Decurtins
FC Bogn Ragaz: Flurin Ambühl, Noah Berry, Jan Kohler, Manuel Horni, Sandro Kressig, Vitor Antonio Monteiro Da Silva, Marco Mühlebach (C), Orlando Caluori, Corvin Kühne, Noel Sprecher, Zivan Mitrovic, Athanasios Pagonas, Kilian Büchel, Felix Horni, Nando Bersorger, Sandro da Costa Rodrigues, Nicola Radosevic, Lenard Hoxha
remarcas: CB Trun/Rabius senza Ramon Orlik, Denis Monn, Silvan Muoth (blessai), Geo Cauzza, Lucas Seiler, Tizian Duff (absents)