Suenter ina intensiva preparaziun entscheiva il campiunadi da 3. ligia finalmein per il CB Trun/Rabius. L’emprema equipa ha 4 giugadurs da tschep che han calau, ni midau tier la secunda equipa. 5 giugadurs giuvens ein vegni vitier niev, plinavon ha Trun/Rabius presentau als aspectaturs sias novas monduras.
Il giug entscheiva meglier per il hosp da Mels, denton mauncan las claras caschuns da marcar. Ella 16avla minuta piarda Trun/Rabius il bal el moviment anavon, Mels vegn cun in pass el dies dalla defensiun ed in siet da Sven Assfalk da marcar il 0:1. Il giug ei silsuenter fetg ulivs ed ei dat dirs cumbats el miez dil plaz. Suenter 33 minutas vegn Trun/Rabius tier in culp liber ord biebein 25 meters. Denis Monn sieta il culp directamein ella cruschada, sin il bal che rebatta reagescha Gianin Derungs il pli spert e tauscha en tier 1:1. Cun quei resultat va ei era en la pausa.
La secunda mesadad entscheiva sco quei che la emprema ei ida a fin, ei dat sin domisduas varts paucas acziuns offensivas e bia dirs cumbats el miez dil plaz. Igl arbiter muossa buca meins che 8 gadas la carta melna a giugadurs dallas equipas. Trun/Rabius vegn entras Patrizio Decurtins tier duas bunas caschuns da marcar ed era Mels ha entginas pusseivladads, denton maunca tier Trun sco era tier Mels il saung freid avon gol. Empau ord il nuot croda igl 1:2 per Mels ella 73avla minuta, Marco Wildhaber sieta ord rodund 30 meters in streh ella reit. Silsuenter emprova Trun/Rabius tut il pusseivel d’egualisar la partida e vegn ella 92avla minuta tier in penalti che Patrizio Decurtins sa marcar a moda segira tier il 2:2. Cun la davosa acziun da giug vegn Mels denton aunc inagada tier in culp liber ord 27 meters. Il giugadurs rutinau Marco Wildhaber sieta ella 94avla minuta il bal directamein egl anghel dalla reit tier il 2:3 per ils hosps. Aschia va quella partida a fin cun il resultat final da 2:3.
Per Trun/Rabius suonda gia gievgia sera la proxima caschun da recaltgar ses emprems puncts. L’equipa dalla Cadi frunta allas 20:15 a Trun-Pustget sin Bogn Ragaz.
informaziuns: 3. ligia, gruppa 1; CB Trun/Rabius – FC Mels 2 2:3 (1:1)
gols: 16’ Sven Assfalk, 33’ Gianin Derungs, 73’ Marco Wildhaber, 90+2’ Patrizio Decurtins, 90+4’ Marco Wildhaber
CB Trun Rabius: Livio Lozza, Mirco Pfister, Lucas Maissen, Mathias Flepp (C), Elia Schmed, Denis Monn, Rovin Schmed, Robin Monn, Orlando Monn, Andri Carigiet, Gianin Derungs, – reservas: Aurelio Carigiet, Sandro Orlik, Matia Friberg, Enea Decurtins, Silvan Cajacob, Silvan Muoth, Patrizio Decurtins
FC Triesenberg: Leandro Hardegger, Aron Hermann, Adrian Zogg, Luca Di Nita, Julian Schlegel, Ben Ackermann, Dario Eberle (C), Dominic Baur, Luca Maggion, Nedim Bajrektarevic, Sven Assfalk, Michael Tschirky, Kevin Bigger, Marco Wildhaber, Mile Mitrovic, Raphael Weber
remarcas: CB Trun/Rabius senza Ramon Orlik (blessaus), Geo Cauzza, Lucas Seiler, Tizian Duff (absents), Damian Schmed, Nico Caduff (serrai)