Suenter la victoria da 5:2 encunter encunter Triesenberg frunta il CB Trun/Rabius ella davosa runda dil campiunada da 3. ligia sin la secunda equipa da Cuera97.
Il giug entscheiva meglier pil hosp dalla Cadi. Trun/Rabius emprova da far squetsch sin la defensiun da Cuera e sa gia giubilar ella 8avla minuta per l’emprema gada. Suenter ina corna vegn Cuera buc da sclarir endretg il bal, Orlando Monn vegn da spedir ina flanca ella zona da puniziun nua che Patrizio Decurtins spetga e marca cul tgau il 0:1 per Trun. Igl avantatg tegn denton buca ditg; gia ella 10avla minuta sa Nico Walser egualisar la partida suenter ch’ils attaccaders da Cuera han astgau guder memia bia libertads. Buc 5 minutas pli tard vegn Cuera suenter in sbagl da Trun/Rabius tier ina sperta cunterattacca e Nico Walser marca cun in siet bass plazzau il 2:1 pil caucasa. Trun/Rabius lai buc stermentar e fa vinvon pressiun sin la defensiun da Cuera. Ella 25avla sa Robin Monn recaltgar il bal ella zona da miez e tarmetter Patrizio Decurtins ella profuntidad; el vegn da semetter atras e marca il 2:2. Suenter ina corna da Robin Monn ella 32avla minuta vegn Trun/Rabius puspei dad ir en avantatg, Damian Schmed marca cul tgau il 2:3 pils hosps. Ei va denton puspei buc ditg che e Cuera vegn puspei d’egualisar, ella 42avla minuta sa Alessandro Mogus marcar il 3:3 suenter ina sperta cunterattacca. La reacziun da Trun/Rabius lai denton buc spitgar ditg. Cun ina sperta attacca sur Mathias Flepp e Patrizio Decurtins ella 43avla minuta, semetta Robin Monn atras encunter il defensur da Cuera e marca il 3:4 per Trun. Ed ei vegn aunc meglier per Trun; ella 45avla minuta marca Patrizio Decurtins siu 3. gol dil di, quei suenter ch’el ha menau ora la defensiun incl. il goli da Cuera. Aschia che las equipas van cun il resultat da 3:5 en la pausa.
La secunda mesadad entscheiva meglier per Cuera 97, denton vegnan els buc da scursanir il resultat. Ella 64avla minuta lantscha Mirco Pfister igl attacader Robin Monn ella profunditad, el va en direcziun dil gol e metta giu sin Orlando Monn che sa stuschar en tier il 3:6. Il punct final en quella partida metta il capitani Mathias Flepp ella 78avla minuta; suenter ina corna da Denis Monn sa el marcar cul tgau il 3:7. Entochen la fin capeta buca pli bia, aschia ch’il giug va a fin cun il resultat final da 3:7 per Trun/Rabius.
Trun/Rabius ha nezegiau las caschuns cun saung freid ed aschia meritau da gudignar il davos giug da campiunadi encunter Cuera 97. Suenter quella victoria siara Trun/Rabius giu il campiunadi 2023/2024 cun 25 puncts sil 10avel rang. Mirau anavos fuss ei segir stau pusseivel da recaltgar dapli puncts en in ni l’auter giug, denton sto l’equipa nezegiar meglier las caschuns da marcar e sminuir ils sbagls individuals. Avon ch’ei va ella pausa da stad lein nus aunc engraziar a nos fideivels aspectaturs che sustegnan nus duront l’entira sesiun a Pustget sco era als giugs ordlunder.
informaiuns: 3. ligia, gruppa 1; Chur 97 2 – cB Trun/Rabius 3:7 (3:5)
gols: 8’ Patrizio Decurtins, 10’ Nico Walser, 15’ Nico Walser, 25’ Patrizio Decurtins, 32’ Damian Schmed, Alessandro Mogus, 43’ Robin Monn’, 45+1’ Patrizio Decurtins, 64’ Orlando Monn, 78’ Mattias Flepp
Cuera 97 2: Tim Mordasini, Luis Carlos Sampaio Goncalves, Luciano Cherry, Andrea Ricchiello, Diogo Filipe Machado Teixeira, Nico Walser, Ruben Francisco Rodrigues Detommaso (C), Khalil Gasem, Zoran Manojlovic, Vendim Gashi, Vendim Gashi, Alexander Silva Suznjevic, Jesse Neuhaus, Fabio Grazia, Davide Rosafio,
CB Trun/Rabius: Livio Lozza, Geo Cauzza, Damian Schmed, Livio Janka, Mirco Pfister, Lucas Maissen, Mathias Flepp (C), Andri Carigiet, Orlando Monn, Robin Monn, Patrizio Decurtins, – reservas: Rovin Schmed, Tizian Duff, Clau Berther, Elia Schmed, Nico Caduff, Beat Cadruvi, Denis Monn
remarcas: CB Trun/Rabius senza Sandro Orlik, Ramon Orlik, Remo Alig, Silvan Muoth (tuts blessai), Gianin Derungs, Lucas Seiler (absents)