Suenter l’aulta terrada dad 8:1 encunter il capogruppa da Schaan frunta il CB Trun/Rabius ella 21avla runda dil campiunadi da 3. ligia sin igl FC Triesenberg. Cunquei che la l’Associaziun da ballapei dalla Svizra Orientala sa aunc far midadas pertuccont las equipas che vegnan relegadas, ei quei in giug da gronda impurtonza pil CB Trun/Rabius.
Il giug entscheiva fetg uliv, denton muossa igl FC Triesenberg ch’els ein vegni a Pustget per gudignar il giug. Duront las empremas minutas fa Trun/Rabius grev la veta a sesez cun malexactadads e cun schar memia bia libertads als adversaris. Ella 14avla minuta vegn Triesenberg da marcar il 0:1 suenter ina attacca sur l’ala. Quei gol para dad haver destadau il caucasa che vegn entras Gianin Derungs ed Andri Carigiet tier lur emprema caschun da marcar. Suenter 28 minutas sa Trun/Rabius egualisar la partida. Andri Carigiet semetta atras encunter plirs giugadurs e tarmetta cun in fetg bi pass ella profunditad Orlando Monn che marca cun saung freid igl 1:1. Buc ina minuta suenter va Triesenberg denton puspei en avantatg, quei suenter in bal liung ed ina durmida collectiva dil CB. Trun/Rabius emprova vinavon d’egualisar. Suenter ch’il bal vegn gudignaus ault tauscha Gianin Derungs il bal ella zona da puniziun sin Robin Monn che marca il 2:2. Cuort avon pausa va Trun/Rabius per l’emprema gada en avantatg. Suenter ina corna da Denis Monn ed ina tgaua da Damian Schmed, la quala il goli sa aunc parar, reagescha Gianin Derungs il pli spert e marca a moda suverana il 3:2. Aschia che las equipas van cun il resultat da 3:2 en la pausa.
La secunda mesadad entscheiva meglier per Triesenberg. Il hosp dil Principadi ha dapli dil giug e vegn tier bunas caschuns da marcar, denton tegn il giuven goli Livio Lozza differentas gadas fetg ferm ed aschia il CB Trun/Rabius el giug. Trun/Rabius sto denton spitgar ditg entochen ch’els vegnan da decider il giug. Pér ella 89avla minuta vegn il caucasa da sittar il 4:2, suenter ina sperta cunterattacca tarmetta Gianin Derungs igl attacader Daniel Pfister ella profunditad che marca il 4:2. Il 5:2 croda ella 91avla minuta, suenter ina midada da tempo da Mathias Flepp tauscha el vi sin Patrizio Decurtins, lez lai buc supplicar duas gadas e marca il 5:2. Aschia va quella partida a fin cun il resultat final da 5:2.
Trun/Rabius ha nezegiau las caschuns cun saung freid ed aschia meritau da gudignar il davos giug da casa. Per il CBTR vala ei ussa aunc inagada da sefocussar sin il davos giug da campiunadi che ha liug proxima sonda ordlunder encunter Cuera 97.
informaziuns: 3. ligia, gruppa 1; CB Trun/Rabius – FC Triesenberg 5:2 (3:2)
gols: 14’ Cedric Chevalley, 27’ Orlando Monn, 28’ Samuel Sokoli, 39’ Robin Monn, 41’ Gianin Derungs, 89’ Daniel Pfister, 90+1’ Patrizio Decurtins
CB Trun/Rabius: Livio Lozza, Rovin Schmed, Damian Schmed, Livio Janka, Mirco Pfister, Denis Monn, Mathias Flepp (C), Andri Carigiet, Orlando Monn, Robin Monn, Gianin Derungs, – reservas: Lucas Seiler, Tizian Duff, Patrizio Decurtins, Silvan Muoth, Clau Berther, Daniel Pfister
FC Triesenberg: Nikola Pupovac, Marius Beck, Hamza Sljivar, Lukas Büchel, Ricardo Maia de Sousa, Sebastian Beck (C), Zivan Mitrovic, Robin Gassner, Cédric Chevalley, Pascal Foser, Samuel Sokoli, Fernando Vogt, Lucas Viegas Soares Soares, Pius Sprenger, Borislav Pavicic, Reto Tscherfinger, Jovika Ilic, Diogo Afonso Cordeiro
remarcas: CB Trun/Rabius senza Sandro Orlik, Ramon Orlik, Beat Cadruvi, Remo Alig (tuts blessai), Geo Cauzza, Lucas Maissen (absents)