Ella 19avla runda da campiunadi frunta il CB Trun/Rabius Grp. a Pustget sin la latiarna cotschna da Flums. Per l’equipa da casa fuss tut auter che ina victoria ina trumpada.
Il giug entscheiva meglier per l’equipa da Trun, denton vegnan els buc tier bunas caschuns da marcar. Ella 25avla minuta vegn Robin Monn mess a tiara ella zona da puniziun; il penalti sa Livio Janka marcar a moda suverana tier igl 1:0 per il caucasa. Trun emprova vinavon da far pressiun sin la defensiun da Flums, denton vegnan las acziuns buca giugadas ora bein. Suenter ina corna da Trun ed ina malcapientscha el miez dil plaz vegn Flums tier ina cunteratacca. Quella san els nezegiar ed egualisar la partida tier igl 1:1 ella 35avla minuta. Entochen pausa emprova Trun da puspei ir en avantatg, denton gartegia ei buc da marcar il secund gol. Aschia che las equipas van cun il resultat dad 1:1 ella pausa.
Il te da pausa para dad haver fatg bein als giugadurs da Trun. Els entscheivan furius la secunda mesadad e san gest giubilar dublamein: Ella 46avla minuta marca Gianin Derungs il 2:1 suenter ina biala cumbinaziun – ed ella 48avla minuta sieta Elia Schmed il 3:1 sin pass da Gianin Derungs. Ella 68avla minuta marca Patrizio Decurtins il 4:1 per Trun/Rabius, quei suenter che l’offensiva da Trun ei secumbinada atras bein. La partida para dad esser decidida, denton ha Trun/Rabius anflau plascher da sittar gols e vegn ella 83avla minuta entras in culp liber da Livio Janka tier il 5:1. Il 6:1 marca Tizian Duff ella 88avla minuta, quei suenter ina sperta cunteratacca ed in bi siet da distanza.
Trun/Rabius ei stada la megliera equipa oz ed ha nezegiau las caschuns avon gol cun saung freid, aschia che quella victoria ei meritada. Proxima sonda frunta Trun/Rabius ordlunder sin il capogruppa da Schaan, leu spetga in auter caliber sin l’equipa dalla Cadi.
informaziuns: 3. ligia, gruppa 1; CB Trun/Rabius – FC Flums 6:1 (1:1)
gols: 25’ Livio Janka, 35’ Flums, 46’ Gianin Derungs, 48’ Elia Schmed, 68’ Patrizio Decurtins, 83’ Livio Janka, 88’ Tizian Duff
CB Trun/Rabius: Livio Lozza, Damian Schmed, Lucas Maissen, Livio Janka, Mirco Pfister, Rovin Schmed, Mathias Flepp (C), Robin Monn, Orlando Monn, Elia Schmed, Gianin Derungs, – reservas: Sandro Orlik, Denis Monn, Silvan Muoth, Tizian Duff, Nico Caduff, Clau Berther, Patrizio Decurtins
FC Flums: Gianluca Kurath, Pascal Kurath, Raphael Zindel, Roger Bless, Abger Haddad, Filip Obradovic, Dominik Dort, Valon Aliji (C), Kristian Divkovic, Sandro Danner, Abdül Samed Ipek, Fatlind Aliji, Rimon Biljali, Shuajb Abdiu, Matteo Salvetti, Erhan Rushiti
remarcas: CB Trun/Rabius senza Ramon Orlik, Beat Cadruvi, Remo Alig, (tuts blessai) Lucas Seiler, Geo Cauzza, Andri Carigiet (absents)